أنت ما أريد

22

- انتي متأكدة يا بابا ؟ انا م عايزك تحسي بأي ضغط خارجي او كدا لو حاسّة انو الموضوع دا ممكن يرجعك لورا عادي بلغيهو

- سيف ، الله ؟! هي قالت ليك موافقة ومتأكدة انو م ح تحصل ليها حاجة خلاص خليها

سكت وهو بعاين لوتين ، لمعة من الدموع اتكونت في عيونو قرب منها وقبّلها في جبينها وبعدها بعّد وقال ليها : ربنا يوفقك ويحفظك يا حبيبتي

م قدرت ترد بسبب الدموع الاتكونت في عيونها والغصة اللي قفلت حلقها .. امها قربت منها وحضنتها وقالت : يا حبيبتي ربنا يتم ليك على خير ان شاء الله

م ردت والدموع بدت تنزل من عيونها بس مسحتها بسرعة وابتسمت ليهم ، في حين سيف قال : ح يجوا يوم الخميس عشان الخطوبة

شذى : الليلة الجمعة يعني تاني اسبوع كويس في وقت ، جايين عشاء صح ؟

سيف : اي ، شوفوا الناقصكم شنو ورسلوهو لوائل

شذى : تمام ، نعمل بوفيه احسن صاح ؟

- اي ممكن

- طيب بالنسبة للزينة نعمل ............

تابعت تناقش سيف و وتين بتعاين ليهم وبتحاول تخفي توترها وخوفها قدر الامكان ...

•>•>•>•>•>•>•>•>•>•>

دفنت وجهها في المخدة وهي بتصرخ صرخة مكتومة رفعت راسها والدموع كانت مغطية وجهها ..

ختت يدها في صدرها مكان قلبها وهي بتقول بصوت متألم : ليه ياربي ليه ، انا عملت شنو في حياتي عشان يحصل لي كدا ؟ حسبي الله ونعم الوكيل اخخخ يا قلبي اخخ يا وجعتي اخخ منك يا احمـد من انا صغيرة وانا م شايفة غيرك عشان تجي تتجاوزني بالبساطة دي ؟ ليه يا ربي ليه م كنت انا ؟ ليه م شافني انا ؟ اخخ يا قلبي اخخخ ..

•>•>•>•>•>•>•>•>•>•>

تسارُع في الاحداث :

يوم الخطوبة :

وتين كانت في غرفتها ومعاها صحباتها .. الغرفة كانت مقلوبة وجايطة و وتين قاعدة في السرير وفي حضنها كيس كبير من الشيبس وبتاكل منو ، قربت منها هديل وسحبت الشيبس وقالت ليها

- يا غبية الناس وصلوا وانتي لسة قاعدة مرزوعة م لبستي ولا عملتي اي حاجة ؟ اعمل ليك شنو انا ؟

نسمة جات وقالت ليها بهدوء : هديلو م تعصبي ، اسي بتخلص من الميك اب في دقايق بسيطة وشعرها كمان بسيط والفستان بتلبس في ثواني

سيدرا قالت : اقعدي قولي ليها كدا ولحدي م الناس تمشي هي م ح تلبس حاجة

وتين رقدت في السرير وقالت ليهم بملل : شباب ياخ خلاص كلها دقايق زي م قالت نسمة وح اخلص

سيدرا قربت وقرصتها في كتفها وقالت ليها : قومي يا حيوانة عشان م انزلك ليهم كدا

وقفت من السرير وقالت : اووففف طيب طيب قمت ح ادخل آخد شاور واطلع