أصبحت الدروب النوارة ظلام في وجه غلاب الخطاوي

2

-
قطـر/
نواره كانت جالسة على كراسي الانتظار الي بقسم العناية المركزة والضيق باين من عيونها،
ترددت وهي تطالع بجوالها..تكلم عمانها او عماتها؟ نفت هالفكره من راسها بسرعه وهي تدري ان ابوها بيعصب
تنهدت بقلة حيلة وهي تتحمحم قبل تتصل بنور ، ثواني ووصل صوت نور لمسامعها
نواره بهدوء: نوير عندك؟
نور باستغراب: لا بغرفتها ليش
نواره: اسمعيني وركزي معي ولاتسوين دراما، ابوي تعب بالطريق وودانا واحد للمستشفى لكن انا مادري كم كلّف لان الواضح انه مستشفى خاص..ابيك تشوفين حساب نوير كم فيه وحولي لي مبلغ كويس
نور بشهقه: ابوي تعبان؟! وش فيه
نواره بكذب: مافيه شي كبير الحمدلله تعبه العادي انخفض سكره فجأه بيقعد يوم يومين بالملاحظة ونطلع لاتعلمين نوير ابد ماقلت لها لانها بتكبر المواضيع
نور ابتسمت بسرعه: من الي ساعدكم؟
نواره بلا اهتمام: مدري ولد شكله قطري كان طالع من الحدود بس رجع وحنا معاه
نور ضحكت: شكلك بتروحين بدون زوج وترجعين بزوج قطري
نواره بحده: بنت مب وقت استظرافك وبياختك انتي سامعه وش قلت ولالا؟
نور كشرت: اوله يا النفسيه الخايسه خلاص طيب بروح الحين لكن لو قفطتني مالي دخل
نواره تنهدت: الله لا يحدني عليك بس
قفلت بوجهها وهي ترمي جوالها بجنبها
غلاب بهدوء: رجال مو ولد، وقطري صح، والمستشفى مو خاص ولا دفعت شيء من جيبي خلي فلوسش عندش
نواره فزت برعب: بسم الله انت للحين هنا! وش تسوي
غلاب: والله انا علمتش ماني متحرك من مكاني لين يقوم الوالد واتاكد ان امانته عنده وامشي
نواره بهمس: مافيه فايده حتى لو اتكلم اوفر جهدي بالكلام افضل
غلاب عقد حواجبه: ماسمعتش بس متاكد انه سب
ماردت نواره وهو تلفت حوله قبل يردف بتنهيده: الحين انتي عاجبش المكان الي حن فيه؟ يابنت الحلال استهدي بالله وقومي معي
نواره بحده: انت فليتها تراك قومي معي وقومي معي هب لك شحمه واذلف مني وراك مانيب جايه لو تنكع
غلاب باستغراب: وش تخربطين انتي مافهمت شي من كلامش
نواره حبست ضحكتها ولفت عنه: احسن
غلاب جلس لثواني قبل يقوم عنها وهو يطلع جواله ونواره همست: أخيرًا! فكه
غلاب: رها بالبيت انتي؟
رها بضحكه وهي تدّف مسعود عنها: ايه بالبيت وين بكون يعني
غلاب: لازم اشتري لش اسلوب .. تجهزي بمرش
رها باستغراب: انت مو رحت السعوديه؟
غلاب بهدوء وهو يرجع لنواره: لا بجيش واشرح لش
غلاب ناظر نواره: لا تتحركين من مكانش ابد بجيب شغله واجي
مشى عنها وهو مانتظر ردها حتى ونواره ناظرته باستغراب وصحت من أفكارها على رسالة التحويل وشهقت وهي تشوف المبلغ
على طول رفعت جوالها بعصبيه: نور يازفتة الطين وش هالمبلغ تستهبلين!!! الله ينكبك بتدري انك حولتي
نور بهياط دقت صدرها: اجل تطلبين من نور وتحولك مبلغ هين !
نواره بسخريه: بسم الله عليك يا بنت حاتم الطائي، كريمه من فلوس غيرك! ، لو مكلمه عمتي دانه ابرك
نور حطت يدها على راسها: انتي يعني ماعليك من احد! والله لو يدري ابوي لا ينحرك
نواره ابتسمت بغموض: ابوي لو درا بيستانس ماراح ينحرني، الي حصل بالماضي لحظة طيش شبابه وغضبه الجام، لكنه الحين كبير اليوم الهادي المنهلك من عصبيته باحلا ايام عمره الي سلبّت منه اهله، محد يفهم ابوي كثري يانور
نور هدّت وهي تتمعن بكلام نواره اللي قفلت بوجه نور وهي للآن ماستوعبت..
~
بيت ضـاحي/
وقفت سيارة غلاب قدام البيت وهو يتصل على رها اللي طلعت له بعد ثواني
رها ركبت بجنبه وهي تردف: وش سالفتك انت وش مهبب بعد
غلاب ونظره على بيت مشاعل: ثاري وش صار عليه؟
رها بتفاخر: كالعاده هربته لبيتنا شوفه الحين منزرع بين رزان وغالب كل واحد يوكله من جهه بينفع الولد
تنهد غلاب براحه: الحمدلله والله كنت شايل همه *ضحك بعد ثواني* شكل اللي صارلي من عيونه الدب
رزان شهقت وهي تتفحّص غلاب بعيونها: وش الي صارلك!! لايكون صارلك شيء كايد؟
غلاب بنفي: لا يابنت الحلال انا ماصابني شي نهائي بس ..
قاطعه صوت جواله واردف لرزان: اسكتي برد واعلمش بعدها
رد بابتسامه: هلا ضاوي
ضاوي وهو يعدّل غترته: هلا بالساحب.. وينك يارجال من صبح نتحراك
غلاب تنهد: والله ياضاوي حصل لي ظرف ماقدر اجيكم اليوم
ضاوي فز: اخوك ياسعود وش فيك فيك شيء تبي فزعه ولا شي
غلاب ضحك: وانت على طول مخك يشطح للمصايب والفزعات لا الحمدلله مافيني شي بس ظرف عائلي احله واجيكم الويكند مع اخواني ان شاءلله
ضاوي ابتسم: والله ؟ بتجي انت واخوانك؟
غلاب اومئ: ايه بسحبهم معي خل سعود يجهز عزبته
ضاوي: ابو مصلح محد يوصيه على عزبته زاهيه دايم .. يلا اجل فمان الله ماراح اطول عليك دقيت اتطمن بس
غلاب: في حفظه ياحبيبي يلا
قفل من ضاوي ولّف على رزان وهو يبدأ يسرّد لها كل اللي صايـر وطلبه إنها تقنع نواره تجي معهم..
~
بيت سعـد/
وريف وهي مبوزه: شل عمره وطلع مع شنقل بالشاص الخايس حقهم
موضي بإنزعاج: الله اكبر عليك ياوريف صكيتي براسي خلاص اذا جت مناوي بكره روحي انتي وياها للي تبين
دانه رفعت راسها عن ايبادها: انتي يا النزغه خلي اختي تريّح ياكافي بالعه راديو! قومي بس عاونيني نحط عشا ابوي
وريف رمت الخداديه الي كانت بحضنها: وبس هذي هي شغلتك يا وريف ، خدامة البيت !
موضي وسعت عيونها: وقص يقص هاللسان لاطلبوك في خدمه لابوي تفزين من طولك وتقولين تم وابشري
وريف اومئت بتسليك وهي تطلع للمطبخ ورا دانه
سمعو صوت ضاوي الي يصوّت من باب المطبخ الخارجي
وركضت وريف على طول لداخل
دانه بإبتسامه: حي الله الصوت وراعيه تعال اقلط
دخل ضاوي وعدّال وراه مكشر: وانا مالي ترحيبه منا ولا مناك
دانه ضحكت: يووه عاد انت العين ونظرها بعد بس ما دريت آنك معه ، وش جايبكم
ضاوي تركى على التيبل: جايين نتعشى مع جدي بالنيابه عن ابوانا لانهم رايحين البر عاد مصلح ومبارك لا دخلو البر فطسو فيه
دانه رمت عليه البيز: وجع بسم الله على اخواني
عدّال وهو يسحب الشاهي: جلسة السطح حقت شنقل ومنقل بمكانها ولا احد خذاها؟
دانه: لا على حطتها محد يتجرأ أصلًا يمسكها وش بيفكه من لسان بدير ويد رايف
ضاوي وعينه على الكوب الي كان بيشرّب فيه عدّال سحبه منه بسرعه: وجع لاتشرب بهذا شف لك غيره
عدّال باستغراب وصدمه: بسم الله وش فيك انت
ناظرتهم دانه ومن شافت ان الكوب كوب وريف ماقدرت تمسك ضحكتها وضحكت بأعلى صوت: يا الرجل القيوور انت ماقدر
ضاوي ابتسم بإحراج وهو يشرب من الكوب: وصلي لأهل الكوب انه خلاص صار بعهدتي
عدّال بعدم فهم: وش تخربطون انتم يابن الحلال خلني اشرب شاهيي
ضاوي سحبه: عانينا بنقعد في جلسة السطح لين يجي ابوي سعد، يسولف مع الشيبان بالديوانيه ظني انه مطول
عدّال بتكشيره: طيب ابي شاهي ياخي!
ضاوي وهو يسقط من الشاهي ويطلع صوت: عاد نعناع ومسكر على كيف كيفك
عدّال مد يده بيسحب الكوب بس ضاوي كان أسرع منه وعض يده بقوه
عدّال سحب يدينه وهو يكفخ راس ضاوي: وجع انياب اسد اعوذبالله
ضاوي بضحكه: رح رح بس جب لك كوب وجب ترمس الشاهي معك مايحتاج مكسرات اكيد في جلستهم فوق
دانه بصوت عالي طلّت من الدريشه: تراهم شوي ويعودون بسرعه اركضو قبل يجون
طلع ضاوي للسطح من الدرج الخارجي وعدّال رجع المطبخ ياخذ الشاهي وكوب وناظر دانه: تكفين يا عميمه وش قصة الكوبب ؟
دانه كشرت: استح على وجهك بعمرك وتقولي عميمه!عمت عين العدو
عدّال: مب وقت تصغرين نفسك علميني خلصي ابي اذله وامسك عليه ممسك
دانه تخصرت: ياسلام يعني انت تمسك عليه ممسك وانا انذبح! لا رجاءً مالي شغل فيكم رح بس
عدّال رمى عليها كوب ورقي قبل يركض لبرا
رقى وهو يستنشق الهوا بابتسامه: ياحلو هالمكان حلوااه
ضاوي طلع جواله بضحكه: خلني اجلطهم
عدّال كشر: لا تكفى بيجونا ركض هالحين
ضاوي وهو يصور: تم الإستحلال على جلسة شنقل ومنقل من قبل الضابط الكبير عدّال ورجل الأعمال القدير ضاوي والي في امه خير يقرب مننا
ارسلها وهو يضحك على فويسات بدر ورايف الي كلها سب
عدّال: هذول الي يبوني اتلهم هالحين
ضاوي وهو يسحب من المكسرات ويقط على عدّال: لا تحط عقلك بعقل وراعين
عدّال: اييه بتدافع عشان اخوك مير مايحتاج يدافع عنه لسانه ذا طوووله
ضاوي: بسم الله على اخوي قل ماشاءلله لا تعطبه ماعندي الا هو وسعود خايب الرجا ذاك مامنه رجا
عدّال كشر وهو يتذكر بندر الي كل يومين عندهم بالتوقيف: انا مستغرب محد اتصل علي للحين يقولي ولد عمك عندنا
ضاوي وهو يشرب الشاهي: عادي يعقل يومين ويدبر شهرين
عدّال بضحكة وهو يسمع فويس سعود الي يهاوش بدر ورايف على الفاظهم: قسم بالله ان سعود اسطورتي
ضاوي: وين مهمار ؟ ماشاف السنابات ابد من الصبح كل القروب يرسل الا هو
عدّال وهو يطلع اسم مهمار: تصدق ذكرتني اكلمه، قالي العصر انه عنده قضيه معقده وبيطوّل بس للحين ماله زيله
اتصل ووصله صوت مهمار المُنهك: هلا عديل
عدّال بقلق: وينك انت من العصر مختفي وش في صوتك
مهمار وهو يكح: شكلي زكمت
عدّال بعصبيه: تستاهل قايلك البس زين برد بس ماتسمع خلصت ولالا
مهمار وهو يقفل الابتوب: اي خلصت برجع الحين البيت وادقها نومه
عدّال: لا تعال بيت ابوي سعد تعش واشرب شي دافي بعدها كيفك رح نام
مهمار: يارجال خلني ..
قاطعه عدّال بحده: مابي اسمع اعتراض تعال وانت ساكت
كشر مهمار بلا رد وهو يسمع تقفيلة عّدال بوجهه: يقلع ابو حبك العنيف ياشيخ
طلع لسيارته وفتح قروب الواتس وهو يضحك بتفاجئ: اوله كل هالرسايل!
قعد يتصفحها واغلبها كانت سعود يهزئ بدر ورايف مره على الفاظهم ومره على سواقتهم السريعه ومره على طقطقتهم على غيم
صوّر وهو يردف: انا قادم الان بسرعة قرندايزر عشان اسابق الزمان واوصل جلسة السطح قبل شنقل ومنقل ترقبو
ضاوي:"انت سلمك الله عاد للحياة بعد دفنه"
سعود سجل فويس بعصبيه بانت بصوته: انتم تبون تجلطوني حشى وش هاللبس انت تستهبل منت شايف درجة الحرارة؟ محامي شكبرك شعرضك ولا انت قادر تلبس لبس يدفي! انا الي بنتظرك انت وشلة الأنس في الجلسة هذاني طالع الحيين
مهمار بضحكه: ماعليه مقبوله منك حتى التهزيء منك حلو ياشيخ له طعم ثااني
بدر: اذا تبون نسامحكم جب معك الحلا المربعات ذاك مع قهوة عمتي موضي اوف ياسلام
مهمار بسخريه: انت اعرف اسمه اول بعدين تشرط
استمر هواش مهمار مع بدر ورايف الي كان يحب ينرفزهم ويستمتع بهالشي وسعود الي يهاوشهم وكل شوي يطلع من القروب ويرجعونه
~
جلسة السطـح/
دخلو بدر ورايف يركضون وعدّال ومهمار فزو
عدّال بذهول: بسم الله الرحمن يالله جاراكم الدفاشه ماتعرفون تدخلون بالهون
رايف بعصبيه: لا ياشيخ انت وهو خير ان شاءلله وش شغلكم في جلستنا قم قم انت وياه
ضاوي فز: ابنك يامصلح ماباقي الا انت يازبوط النقعه تجي تطردني
سعود دخل وهو رافع حاجب: خير ان شاءلله وش هالصراخ!
بدر ابتسم بوسع وهو يسحب الحلا من يدينه بحماس: نذر انك اطلق اخ في الدنيا
رايف ابتسم وهو يحب راس سعود الي يدفه: ياحلوك حلواه بس
دخل مهمار وبيده ترمس القهوه: وانا جبت قهوة موضي مالي حبة راس؟
رايف كش عليه وبدر قلب عيونه وهم يجلسون بدون رد عشان سعود
سعود بهدوء: لا تلطسون كبودكم بالحلا والقهوه عشان نتعشى مع ابوي سعد
رايف ابتسم: ابشر على خشمي
بدر وهو يتلذذ بالحلا: من عيني ذي قبل ذي تامر امر
ضاوي ضحك بذهول: ياولد انت ساحرهم ولا ويش!
عدّال لف على مهمار وهو يتفحص حرارته: الحمدلله مابك حراره
مهمار: زكمه عاديه مافيني شي
عدّال صفق راس مهمار: قومك هالعقل المصدي
مهمار كشر: انت وراك ماتكمل جميلك سعود شفه يصفقني
عدّال لف على سعود الي يفكك بين رايف وبدر: هو الي لابس لبس مخنز مايدفي حتى صخله
ضاوي ضحك من قلب: جعل ربي يعين سعود
كملو جلستهم مابين ضحك وسوالف لين جتهم دانه تعلمهم ان ابوها وصل نزلو كلهم وسعود تنهد وهو يناظر فراغهم ويسرح بتفكيره، وش كثر كان يتمنى وبكل جمعه وضحكات يتمنى بندر بينهم نزل عيونه وهو يمسح على وجهه بهم وهو يحس انه السبب
ضاوي ربّت على كتفه وهو يقومه بهدوء: مالك دخل ولا انت مذنب بشيء ، الخايب خايب حتى لو بين عشرين صالح ، والصالح صالح حتى لو بين عشرين خايب .. خلها في بالك دايم يا سعود
~
بيت مصلـح/
في مكتب نجوان اللي كان بآخر البيت، كانت منغمسة تمامًا في عالمها الخاص بحل المعادلات وتفكيك رموز الشركات فتحت ريوف الباب بقوة ما تأثرت فيها نجوان لأنها كانت حاطة السماعات بأذانها
ريوف بتأفأف سحبت سماعاتها: ووجع وانا اقول هذي ليش ماتسمع!
نجوان بإنزعاج: أنتي ماعندك اي رُقي؟ أي ادب؟ أي اسلوب؟
ريوف رفعت حاجب: عشتو مخلين الادب والرُقي والاسلوب لك، خلصي بس وريف مسويه مناحه بالقروب فقررو مناوي ورجاوي يروحون ويروح معهم تجين معنا؟
نجوان بهدوء وهي ترجّع سماعاتها لأذانها: لا عندي اختبار
ريوف اومئت: كيفك
طلعت وهي تلبس عباتها وتطلع لرجاوي ومناوي الي بدو يمشون لبيت جدهم الي مايبعد عنهم شي كبير، كلهم بنفس الحي
نجوان رجعت ترسم لكنها تنهدت وهي ترمي القلم من جابت ريوف طاري بيت جدها سعد وهي ترجع لها أفكارها المتزاحمة عن مهمار واخر لقاء بينهم الي كان مشادة كلامية بسبب إن مهمار مايبغى المشرف على تدريبها يكون "رجل"
زفرت بإنزعاج وهي تشيل سماعاتها الي رمتها وتطلع من المكتب تدري وتمامًا إنها مستحيل تكمل دراسة وبالها مشغول بأشياء ثانيـة
رفعت جوالها وهي تدخل على محادثتهم الي آخرها كانت من مهمار :" للحين زعلانة علي؟"
رجعت تقفل جوالها وأتجهت لغرفتها وهي تبي تاخذ شور دافـي يريّح أعصابها..
~
بيت سعـد/
دخلو البنات وسلمو على موضي ودانه الي بالصاله
دانه باستغراب ابتسمت: وشو اليوم العالمي للاحفاد ولا ايش
رجاوي باستغراب: ليش وش
دانه: كل العيال فوق في جلسة شنقل ومنقل
مناوي بابتسامه: شفنا الدلوعه وريف تصيح من الطفش وسحبة رايف عليها فقلنا نجي نونسهاا وينها
موضي ابتسمت بحب: ياجعلني لا انا ولا بنتي ولا ولدي نخلا منكم قولو امين
ريوف ابتسمت بوسع: امين يا حلو هالدعوات عاد على هالدعوات الزينه نبي قهوه حلوه زيك من يدينك
موضي ضحكت: اي قولي كل هالمدح عشان القهوه بس ابد تبشرون بها ، سعود حبيبي جايب معه بوكسين حلا خذو العيال واحد والثاني خشته دانه بالمطبخ
دانه كشرت: خشيته لاني داريه بيقضون منه بدقايق ويرجعون لحقنا
موضي باستغراب: وين نجوان وعروب؟
ريوف: نجوان عندها اختبار وعروب ماهي هنا عند اهلها
سعد دخل وهو يسلم بصوت جهوري قبل يبتسم بوجه بانت تجاعيده: يامرحبا وانا اقول بيتي منوّر!
~
بيت طـامي/
كان هادي بشكل موحش، نوير نايمة عشان دوامها بكره بدري ونور كانت مقيله لذلك الطفش كان ياكلها اكل
جلست بالصاله وهي تتأملها بملل .. فتحت قروب صديقاتها اللي كانو يخططون يطلعون يتعشون بمطعم ويطلبون منها تجي
نور ناظرت بجوالها بتردد، لو تطلع ومحد يدري بيزعلون منها كثير خصوصًا نوير .. لكنها واصله معاها من الطفش والجوع
زمّت شفايفها بتفكير
~
قطـر/
دخل غلاب ووراه رها الي للحين ماهي مستوعبة شيء
غلاب ابتسم وهو يناظر نواره بمكانها: اول مره تسمعين الكلام ولاتعاندين
نواره بذهول: مين الي معاك!
رها تقدمت منها وهي تمد يدها بابتسامه: انا رها اخت غلاب
نواره باحراج وقفت وهي تصافحها: هلا رها
رها بحنيه: ياقلبي انتي وش رايك تمشين معانا نتعشى وننام ونريح وبكره نجيبك وانا بكون معك بالروحه والرجعه
نواره وهي تحّس وجهها يشتعل وودها تزنط غلاب: لا لا انا مرتاحه هنا ماعليك جيتك على عيني وراسي والله بس تخبرين ماقدر اكلف عليكم
رها بإصرار: انا عارفه ومقدرة إنك بغربة وماتقدرين تثقين فينا لكن والله مايمسك مننا شينه ولا كلافه ولا شي يلا لاترديني وانا جيتك
نواره ارتخت كفوفها وهي تنقل النظر بين رها وغلاب بحيره، لين استقرت عيونها بعيون غلاب الي يومئ لها بمعنى وافقي..
~
" الشخصيات الجديدة تم التعريف عنهم بجزئية المقدمة والشخصيات ارجعوله"
إنتهـى، ارائكم وتعليقاتكم💕؟