أصبحت الدروب النوارة ظلام في وجه غلاب الخطاوي

34

-
بيت مصلـح/
كانت عروب منسدحه على سريرها تناظر الفراغ ، عيونها مافيها أي لمعة ووجهها باهت ، حتى غيم اللي كانت تصيح مره وتلعب مره وتحوّس الغرفة ماكانت تعطيها أي ردة فعل
كانت يدها على بطنها وهي تتحسسه طول الوقت
إندّق باب الغرفة وهي باقي على حالها ماتحركت
دخلت شمايل وهي تبتسم لغيم: غيوم حبيبتي أنزلي تحت شوفي وش جاب لك جدو من البقاله
غيم اللي كانت تلوّح بلعبتها بطفش فزت بوناسه وهي تركض لتحت
تقدمت شمايل وهي تجلّس على طرف السرير بتنهيدة: عروب امي انتي لين متى تبين تبقين كذا ؟
عروب بشرود لفت على جهتها: وش فيني
شمايل مسكت يد عروب الي على بطنها وهي تمسّد عليها بحنان: الموضوع صعب عليك أعرف .. ان الان تفقد ضناها حتى لو هو باقي بين احشائها صعب .. ومحد بيفهمه الا اللي مجرب عشان كذا انا اتكلم معك
عروب ناظرتها بإهتمام
خذت شمايل نفس قبل تكمّل: عشت هذي الحادثه من قبل ، وحسيت بروحي تطلع وانا احس بإن جنيني بيطلع مني وهو ميّت .. بكيت وترجيت الدكتوره ماتطلعه مني دخلت في مرحلة جنون وهذيان ، لكن هذاني قدامك بخير وعيالي حولي .. عوضني ربي بدال الطفل الواحد بخمسه يسوون عيوني ، كل شيء يصير لنا بهذي الدنيا خيره نركز على المفقود وننسى الموجود ليش ؟ غيم عندك و سعود عندك والدنيا قدامكم وباقي صغيرين بتجيبون بدال الواحد عشر بعد لاتضيقين عمرك يامي ترا الام هي عمود البيت ان زعلت وتشتت باقي افراده بيزعلون .. شوفي حال سعود و غيم هذي اليومين كيف ؟ ضايقه فيهم الدنيا والملل قتّل غيم .. قومي ياحبيبتي خذي لك شور ورتبي افكارك
عروب دمعت عيونها قبل تحط راسها بحضن شمايل الي ابتسمت وهي تمسّح على شعرها: الطريقه الي فقدتي فيها جنينك كانت مرعبه اكثر من فقده ادرك هذا الشيء ، بس الحمدلله انتي بخير بوسط اهلك بنحطك بعيونا ولانخليك تحتاجينه
عروب عدلت جلستها بوجهها المنتفخ من الصياح وعيونها الحمرا: اخاف ان سعود ماعاد يحبني ولا يبي يناظرني ، اخوي كان السبب في ان اخوه يطيح بمشكله وولده يموت وانا بالبدايه كنت منفعله من الي صار وضيّقت عليه اكثر
شمايل بضحكه: أنتي ماخذة أحّن خلق الله يا عروب وباقي تخافين ؟ شوفي حالته كيف من دونك وتدركين ان هذي كلها أوهام بعقلك الي صار صار يا عروب وانتي تعلمتي درسك .. تسمعين كلام سعود ولا عاد تطبين هذاك البيت وتحمين نفسك من شرور سعيد
عروب خذت نفس عميق قبل تمسح على وجهها وهي تومئ،
وقفت شمايل: بخليك تفكرين وترتاحين وغيم لاتشيلين همها عندي انا وجدها
عروب ابتسمت ببهوت: الله يخليكم لنا لا خلا ولا عدم
طلعت شمايل ونزلت للصاله وضحكت من شافت غيم بحضن مصلح وهي ماسكه سماعة الدكتور: هاه اشوفك صرت مريض يا مصلح ؟
مصلح بابتسامه وهو يلعب بشعر غيم: اصير متحرول لعيونها مو مريض وبس .. هاه كيف حال عروب
تنهدت شمايل وهي تجلس: الله يعينها هالبنيه بس ان شاءلله انها احسن ماعليه
مصلح ناظر بساعته ووقف وهو يبوس خد غيم: اعذريني يا الاميره لكن موعد نوم الشايب جا مافيني شّده للسهر ، رقدوها يا شمايل لاتخلينها تسهر ماهو زين عليها
غيم بوزت وهي تتكلم بلغتها الطفوليه ومصلح رفع حاجب: وش تقول ذي بس الواضح من وجهها تسبني
شمايل كتمت ضحكتها: ماتقول شيء حبيبتّي ، رح نام بس
رقى مصلح وشمايل شالت غيم الي تعالت ضحكاتها من دغدغة شمايل لها: يلا يا غيمتنا جا وقت النوم بكره اوعدك نلعب مع بعض الضحى طيب؟
اومئت غيم بضجر ورقو لغرفتها
طلعت شمايل بعد ما نامت غيم ومسكت جوالها وهي ترسل لعيالها بالقروب لأنهم مالهم حّس من طلعوا
-
نجوان ناظرت بالقروب ولفت على ريوف: أمي تقول متى بتجون ؟
ريوف بتثاوب: خل نرجع فيني نوم
وريف: شدعوه تو الساعه انثبرو بس شوي ويجون دانه ونوير بالقهوه والحلا
رجاوي ضحكت وهي تشوف قروبهم بالواتس: حرام عليك نور وش هالسب فيهم!
نور ابتسمت: احسن عشان يجون أسرع اجل يصورون لنا الحلا والقهوه يشهوون فينا وهم مطولين !
وريف فزت: وش رايكم ناخذها ونروح البحر؟ والله بخاطري
نجوان ناظرت الساعه: اذا جازمين خلونا نروح اول ما يوصلون دانه ونوير عشان مايتأخر الوقت
نواره بسرعه: اجل بتصل عليهم ماينزلون
رجاوي بضحكه: اشوف تو يطلع حماسك
نواره ابتسمت: اموت اموت على شيء إسمه بحر ما تتخيلين قد إيش، مستحيل أفوّت طلعات له
مناوي فزت: بسرعه البسو دانه تقول على وصول عشان نهجم عليهم ما يمديهم يقولون لا
ريوف طلعت من المقلط وهي لابسه عباتها ، ناظروها البنات وماتو ضحك
رجاوي بذهول: انتي متى رحتي ولبستي وماحسينا فيك!
مناوي: والله رهيبه هالبنت مو طبيعيه
ريوف ابتسمت بعبط وهي تعدّل عباتها: عشان اوقف لهم عند الباب ما يمديهم يرفضون الا انا راكبه السياره اعجلو انتو بعد يلا الهمام
مشت ريوف ونور ناظرتهم: وش يعني الهمام؟
وريف بضحكه: يعني بسرعه ، ماحد باقي يقولها الا امي وريوف
كشرت نور وراحت تلبس مع البنات
وقفت ريوف عند الباب وهي مسيفته وتطّل من الباب بنص وجهها
جت مناوي ونجوان وهم يعدلون عبايتهم
مناوي قربت وهي تطلع وجهها نفس ريوف ومتركيه عليها: ماجو للحين؟
ريوف: لا قومي عني يا الدبه كوعك كسر ضلوعي
مناوي كشرت وهي ترتكي زياده: ما الدب الا انتي شايفتني ابلع نص الليل ككاوات وبطاطس
نجوان قلبت عيونها: الحين حنا نسكتكم ولا نسكت ريوف ونور؟ والله بلشه يا الوراعين
نواره ورجاوي جو وهم يناظرون اشكالهم بضحك
نواره: تقول نوير خمس دقايق وتوصل
ريوف: وين سيدة زمانها ماجات لا تقعد تأخرنا ذي!
نور جت وهي متكشخه: وش عليك فيني يا حبك للمحارش اسكتي عني بس
ريوف فزت وهي تركض: جو
نوير ضحكت بذهول: يمه وش فيهم ذول
دانه مسكت راسها: وين نركب ذول كلهم فيه يالله ياربي وذي تركض بعد ريوف ووجع فضحتينا
طلعوا البنات وراها ونجوان فتحت الباب الي قدام ، ناظرته دانه: خير وش جايبك
نجوان: شايفه التكدس الي ورا انتي؟ زحفي بس
دانه كشرت وهي تزحف لها
كانو متحاشرين ورا ونور منسدحه فوقهم بالطول لان مالها مكان
ريوف كشرت وهي تدف رجل نور: وكسر بعدوها عني
نور بعصبيه: ووجع لك ساعه تدفدفين فيني ترا والله لا اقوم عليك اطلع رجولي من الدريشه يعني!؟
نواره بصداع: بس بس صدعتو براسي انطمو شوي ، شغلولنا شي انتم نروّق عليه بدل اصواتهم
-
ساحة التفحيـط/
توقّف بدر من ناداه واحد بإسمه ولّف بإستغراب ،
رايف ضحك: ياوك هذا الي قابلناه ذاك اليوم
مهمار وسع عيونه: وانتو امداكم بعد كونتو صداقات! لابوكم لابو ذا الخشش والله من وساعة الوجه الي فيكم
تنفس رايف بقوه: ياخي قل الحمدلله نعرفه وقف هذا المهبول
مشوا مهمار ورايف بشكل أسرع وهم يوقفون عند بدر
الولد ناظر رايف بتركيز قبل يضحك: ولد الا والله ذا انت وش جايبكم اليوم جازت لكم الشغله؟
مهمار تكلم من بين أسنانه: الشغله! يعني فحطتوا يا قليلين الخاتمه؟
رايف بلع ريقه وهو ينغز مهمار: اسكت تراك تذم شغلته لا يفصل علينا
فاضل: ايه وش عندكم اليوم وين رايح بدر اشوف الشرار يتطاير من عيونك
بدر ناظر سيارته بتسليك: مو رايح محل اناظر الاستعراضات بس
فاضل بإصرار: ياولد تلعب على مين انت عيونك شوي وتطّق
بدر بعصبيه: ياخوي وانت وش عليك تراك اشغلتني توكل بس
فاضل عدّل وقفته بغضب: وش عندك تنفخ انت جيت يومين وبتنفش ريشك علي؟ امسك لسانك لا ابلعك اياه
مهمار تدخل بسرعه بخوف وهو يسحب بدر: مايقصد يابن الحلال هّد بس عشانه متوتر شوي
رايف بلع ريقه وهو يعتذر من فاضل اللي ناظر بدر بوعيد قبل يمشي من عندهم
رايف بعصبيه لّف على بدر: انت صاحي ولا انجنيت؟ تبي تطلع لنا اكثر من عدو ماتبينا نطلع سالمين من هالمكان!؟
مهمار لوى ذراع بدر الي صرخ بألم: امش قدامي لابارك الله فيك ولا في سيارتك القرمبع ولا براسي الهاوي الي طاوعكم امش
بدر فك نفسه بصعوبه من مهمار وهو يصارخ: والله ما اخليهم عيال الكلب وسيارتي بجيبها بجيبها خايفين؟ قومو اذلفو مامسكتكم تدلون درب الطلعه
كمل بدر مشيّه وهو يوقف قدام سيارته ،، رفع راسه الي فيها وهو يرفع حاجب: خير يا الأخو مضيع حاجه؟
بدر بعصبيه: ايه مضيع .. مضيع سيارتي الي انت سارقها يا السلوقي
الولد ضحك بسخريه: لا الواضح انك تبيني انزلّك
بدر ضرب الباب بقوه: انزل كانك على ابوك انزل سارق سيارتي ولك عين تهدد
مهمار ورايف ركضو لين عندهم وهم يمسكون بدر الي تراجع خطوتين لأجل يفتح الولد الباب وينزل
فاضل قرب منهم وهو يناظر: مشاري فيه مشكله؟
مشاري شمر اكمامه وهو يناظر ببدر: الاخ عنده مشكله يقول السياره سيارته وسارقها يا السلوقي ، خل اوريه من السلوقي ماوراي شيء
فاضل ناظر بدر برفعة حاجب: وانت وش عليك سيارتك ولا مب سيارتك دامها راحت لنا يعني لنا ماعاد لك شي عندنا توكل
بدر ناظره بعصبيه وهو يمسكه بياقته: يعني انت يا النذل الخسيس الي سارق سيارتي ولك عين تجي تضحك بوجهي!
مهمار صرّخ في بدر من شاف طرف سكين بـ جيب فاضل: خلاص يا ولد امش قدامي واقطع ابشر بجيب لك بدالها عشر بس امش
رايف ناظر مشاري الي يناظر فيهم بحقد وتنرفز: خير وش تناظر لا انخز عيونك ذلحين
مهمار وسع عيونه وهو يمسك راسه: الله يقلعكم انا امسك من ولا امسك من *ناظر بدر برجا وهو يسحب يديه الي قابضه على فاضل بقوه* بدير تكفى خلاص امش والله ما ينتهي هاليوم على خير عندهم
بدر بتحدي دفع يد مهمار وهو معلّق نظره بفاضل: خل اشوف وش عندهم وش وراي ، مو هم يبون يطولونها ؟ وانا بالي أطول
مهمار لف بصدمه على رايف الي يتضارب مع مشاري وركض لهم وهو يحاول يفكك بينهم: الله يقلع بليسك توي مخليك متى مداك تتهاد معه
مهمار صرخ بألم من ضربوه بوسط هواشهم وتنهد بيأس وقلق وعينه على بدر لأنه شايف مع فاضل سكين
هجم على مشاري وهو يفتش بجيبوبه وتنهد براحه من درى مامعه شي وركض ناحية فاضل وبدر
وهو معتليه التوتر من هدوء فاضل المخيف وكيف انه للحين ساكت على كلام بدر ومدة يده ،، وهو بجيبه سلاح!
فاضل ناظر بدر ببرود: خلصت هياطك يابزر؟
بدر ارتفع ضغطه وضربه بأقوى ماعنده لدرجة افضل طاح بالأرض: البزر انت واشكالك يا ضعيف النفس
رايف تنفس بقوة وهو يبعد مشاري عنه ويمسح الدم من وجهه: الله يقلعك ماقوى باسك هديت حيلي يا مقطوع الحيل
مهمار بتوتر سحب بدر له بهمس: معه سكين يا تبن يا حمار يا كلب لي ساعه اشر بحواجبي حواجبي بتطير من وجهي وانت ولا حاس
بدر بهّت وجهه: سكين!؟
مامداه يكمل كلامه الا وفاضل قايم وهو يركض لهم بأسرع ماعنده،
الكل أنتبه لذا الإشتباك الحاصل بسبب علو أصواتهم والدم الي يغطي وجه ويدين رايف ومشاري ،
مهمار وسع عيونه وهو يشوف فاضل وبدر كان لّاف عليه ، صرخ بأقوى صوت وهو يحاول يسحب بدر من قدامه لكن بدر ثبّت أقدامه بأقوى ماعنده لأنه يدري لو تحرك الطعنه بتجي في مهمار
غرز فاضل السكين بكتف بدر الي صرّخ بألم وطاح بيدين مهمار الواقف
مهمار وسع عيونه بصدمه وهو مو قادر يستوعب الموقف بينما فاضل بلع ريقه وصرخ: مشاري الزبنه
ركض بسرعه ومشاري دّف رايف الي قوته منهده وركض ورا فاضل
رايف صرخ بقهر وهو يحاول يقوم من رجله الملتويه ، دمّع بقهر وهو يشوف بدر طايح بدمه بين يدين مهمار المتصنم من الصدمه
بدر تنفس بسرعه وهو باقي ما فقد وعيه: مهمار صحصح انا الي متصاوب مب انت قم ياورع
مهمار صحى على نفسه وهو ينزل للأرض وهو يصرخ بخوف وعصبيه: هذا الي تبيه يصير يا بدر هذا النتيجه!؟ الله يقلعني يوم طاوعتكم وجيت
ابتسم بدر بألم: سيارتي ورانا لاتوديني الا عليها
مهمار تأفأف بقلق وهو يشيله ويمّس على جرحه غترته: وانت ذا همك ضغطي انخفض حسبي عليك رجولي تصافق ماهي شايلتني.. بدر بدر اصحى تكفى لاتغمض عيونك قووم
حطه بالمرتبه الورانيه وركض لرايف الي تسنّد عليه بخوف: بدر قايم ولا ولا؟
مهمار حطه جنبه وهو يدوس السياره بسرعه جنونيه بينما رايف لّف وجهه على بدر الطايح بالمرتبه الي ورا بقلق
مهمار بعصبيه ضرب الدركسون: قايل لكم ومفهمكم ماراح نلحق احد ولا راح نسوي شي الا برا هالمكان نقدم بلاغ بس احكي على حمير مو اوادم انتم ما في قلبكم دم ولا رحمه في اهاليكم تروحون لذي الاماكن وتدخلون نفسكم ببلاوي ومشاكل ليه!؟ ماعندكم لا مسؤوليه ولا قلب بتظلون طول عمركم بزران الله ياخذني يوم طاوعتكم
رايف بتوتر وعصبيه: مهمار ماهو وقتك الحين تزّن فوق روسنا وتعاتب وتلوم! جيت معنا بارادتك لذلك اسكت ولا حرف
مهمار بعصبيه اكبر: انطم واسكت انت يا الردي لك وجه وعين ترادد ؟ ماجيت بارادتي جيت من خوفي لا تسوون بلوى اكبر من هذي ، انا معكم وسويتوا هذا كله وشلون لو اني ماني معكم ومخليكم على هواكم!؟ لكن حسابنا عسير
رايف سكت بقلق وهو يراقب بدر بعيونه وقلبه يرقص من الخوف
وصلوا المستشفى وهم ما يدرون كيف وصلو من التوتر والرعب الي عايشينه
نزل مهمار وهو ينادي الممرضين الي جو بسرير ناقل وهم يحطون بدر فيه ودخلوا لغرفة العمليات على طول
مهمار وقف قدام قسم العمليات وهو بعقال وطاقيه فوق راسه وثوبه كله دم بينما رايف جلس على الكرسي بتعب وهو مشمر اكمامه ووجهه ويدينه ورجوله كلها رضوض ودم ناشف
مهمار تنهد بضيق وهو يشوف رايف ينزل راسه ويدينه على عيونه وعرّف انه يبكي
جلس جنبه وهو يسحبه لحضن جانبي: خلاص اشش ان شاءلله مافيه الا العافيه
رايف جعد وجهه بألم ومهمار انتبه وهو يتأفأف: نسيت انك دخلت بهواش مع الزفت قوم اوديك الطوارئ
رايف هز راسه بقوه: والله ما اتحرك خطوه وحده من هنا بدون بدر
مهمار تنهد وهو يسنّد راسه على الجدار بتعب ،، ضغطه للحين منخفض وجسمه يرجف من الرعب والتوتر والضغط النفسي الي عاشه بكم دقيقه لكنها مرت عليه كانها سنه
رايف مسح على وجهه وهو يتحمحم يبعّد نبرة البكاء: جوالاتنا بتنفجر من الاتصالات
مهمار عض شفته: وش بقولهم الحين !؟
رايف سكت لثواني قبل يردف: مالك ذنب باللي صار الذنب ذنبي انا وياه حنا الي غلطنا
مهمار ضحك بسخريه: الذنب راكبني معكم يومني دريت وسكت وطاوعتكم ووديتكم بنفسي بعد وش قاعد تقول انت بس !
مهمار أخذ نفس عميق قبل يسمي بالله وهو يرد على سعود: سعود
سعود تنهد بإرتياح: ولد منجدكم انتم وش تسوون كل ذا ماتردون صارلكم من بعد المغرب وانتم مختفيين! وينكم متى بتجون
مهمار بلع ريقه: سعود
سعود رفع حاجب: مهمار وش فيك ! ليه صوتك قالب!؟ فيكم شي!؟
مهمار بتوتر: صاير شيء .. تعال مستشفى ***
سعود ناظر عدّال بقلق وهو يفز: مستشفى ! عسى ماشر وش صاير من الي فيكم تعبان!؟ بدير بدير ولدي فيه شيء !!! وينه عطني بسمع صوته
مهمار مسّك نفسه وهو يرفع راسه: لاتصعبها علي ياسعود تكفى تعال وبتفهم كل شي
عدّال بعصبيه سحب الجوال من سعود: تكلم وش صاير وش قايل لسعود انت حتى يختلف حاله .. سعود سعود تعال
عدّال ركض ورا سعود الي راح يركض بسرعه ناحية سيارته
ركب معه وهو يسكر الباب بصعوبه من سعود الي طاير
ناظر سعود بتفاجئ: وش فيك انت طاير مهمار يا تبن وش قايل له انت وش فيكم وش مهببين من مصيبه!
سعود انتبه لانسوي حادث ناقصين حنا
مهمار بلع ريقه بخوف من سمع صوت عدّال وقفل بوجهه على طول
عدّال ناظر الجوال بتفاجئ: الكلب قفله بوجهي ! سعود على الاقل انت قولي وش صاير بنفجر
سعود بصراخ: مدري مدري يا عدّال قالي تعال مستشفى *** وبس ما تشوفني مختبص ؟
عدّال وسع عيونه: مستشفى ! لا عز الله الي امسينا الليله يالله ياربي
سعود بقلق: بدر ورايف مالهم حس .. وسألت عن بدر وقال لاتصعبها علي!! اكيد بدر فيه شي
عدّال ميل فمه بضيق: انتبه للطريق لايصير حنا الي فينا شي حسبي عليهم والله ماخليهم
وصلوا المستشفى ونزلو وهم يركضون ورا بعض ، رفع عدّال جوال سعود الي بيده وهو يتصل بمهمار: وينكم؟
مهمار بتوتر وهو يحس قلبه طاح: عند غرفة العمليات
عدّال جمد بمكانه وهو يوسع عيونه: غرفة العمليـات!
سعود برّد وجهه وهو يتمسك في عدّال اللي سنده: ولد قوم صحصح معي لاتطيح امش امش والله ماخليهم
مهمار قفل منه وهو يناظر رايف بخوف: جاك الموت ياتارك الصلاه عدّال جا !
رايف وسع عيونه قبل ينسدح على الكراسي وهو يغمض عيونه: انا ميت لحد يجيني
مهمار بعصبيه دفه وهو يقومه: قم وقتك الحين يا عبيط
رايف بلع ريقه بخوف: اجل اشوف نفسي وهو يذكيني
مهمار متّر الممر روحه وجيه ووقف عند بدايته ، رجع وهو يركض بخوف وهو رافع ثوبه: جا جا والدخان فوق راسه
رايف عدل جلسته بقمطه ونزل عيونه بالارض ومهمار جلس نفسه
ركضو سعود وعدّال لهم وسعود اردف بقلق: وش فيكم وين بدر وش صاير!؟
مهمار بلع ريقه قبل ياخذ نفس: بنقولكم كل شي بس امسك الي وراك لا يجينا
عدّال قرب منهم بعصبيه: يعني زي ماتوقعت مسوين مصيبه !
سعود مسك عدّال: اهجد خل نفهم وش صاير ، تكلم انت وياه
رايف بقمطه: انا وبدر شفنا فيه ساحة تفحيط بالصدفه وحنا نفرفر فقلنا بندخل من باب الفضول وبنشوف بس وبنطلع بس تحمسنا ونزلنا ورجعنا ندور سيارة بدر ما لقيناها انسرقت بنفس المكان
سعود وسع عيونه بصدمه: الله لا يعطي عدوكم عافيه ! ساحة تفحييييط !!!!
عدّال شمر كمومه بينما رايف فز: سعود انت قلت نتكلم وبتمسكه
سعود تنهد بثقل وهو يمسك عدّال بتوتر: خلص كمل وش صار بعدها
مهمار كمل وجسمه يرجّف: علموني وانا جيت بحل الموضوع يعني عشان ما يروحون لحالهم قلت بنروح ندورها بالمكان واذا لقيناها ماراح نسوي شي بنجلس برا لين تطلع السياره ونلحقها ونقدم بلاغ بس بدر اخوك وتعرفه خالّف كل حكينا اول ما شاف سيارته هجم على الي سرقها وطعنه وانحاش والحين في غرفة العمليات مثل مانت شايف
سعود مسك راسه: الله لا يوفق عدوكم يالله كذا يعني حليتها انت يا الفالح !؟
عدّال نزل عقاله بعصبيه: ابعد ابعد والله ما يبرد كبدي فيهم غيره
مهمار فز بخوف من لسعه العقال وهو يرجع ورا رايف الي صرخ بوجع: رجلي رجلي وجع تراي داخل هوشه
سعود هز رجله بقلق وهو يمسك عدّال عنهم الي العصبيه معميه عينه وهو يلشط فيهم بالعقال
سعود: خلاص ولد مب وقتك ترا اعصابي تلفانه خلقه
عدّال بصراخ: ماتسمع الكلب وش قاعد يقول ؟ داخلين لي ساخطة تفحيط ومفحطين وداخلين هدات معهم بعد والسلوقي الثاني مطاوعهم ووراهم ساكت !! بنجلط انا بنجلط .. امس مستشفى وسجن واليوم مستشفى الله العالم بكره وين بنكون مو عايله انتم مسخره
سعود بقلق: بدير وش وضعه الله يكسر يدينه وين طعنه فيه !؟ الدكتور ماقال شيء؟
مهمار بنفي: ماقال شيء توهم مدخلينه قبل تتصل بشوي .. طعنه بكتفه
عدّال زفر وهو يجلس بعصبيه ويهز رجوله بتوتر: هين خله يقوم بس والله ان خليتكم ماني على مبارك يا سلق الشعيب.. قايلّك انا قايلك ما يغطون عبث وراهم مصيبه ما يتجمعون الثلاثه الا رابعهم الشيطان بزران ماهم رجال
رايف بنرفزه: رجال وغصب عن الي ما يرضى لا تقعد تغلط
عدّال لف عليه بعصبيه وهو يتقدم منه: لا منتم رجال ولا تدلون درب المرجله يا ورع لاتقعد ترادد الرجال يصون نفسه ماهو يدخل لي ساحة تفحيط ويفحط مع الداشرين ويتمشكل معهم والله من وساعة الوجه وانت ترادد انطم لا اقص لسانك لك
سعود بانزعاج وقف بينهم: بس بس خلاص ماهو وقتك انت وياه عدّال ترفق بالولد كله جروح ورضات ماهو وقت العتاب واللوم ماراح يفيد بشي هالحين
عدّال رجع لورا وهو مازال يناظر رايف بعصبيه ورايف لف بنرفزه وهو ساكت من وجع جسمه
سعود تنهد: رايف ليه مارحت الطوارئ امش معي اوديك
رايف بنفي: ماني متحرك لين يطلعون يطمنونا على بدر
عدّال بحده: يومك خايف عليه كان ما هزعت معه
مهمار مسك راسه: خلاص خلاص يا مسلم يا ادمي
عدّال رفسه مع رجله: انت تنطم حسابي معك بعدين والله ماخليك
مهمار كشر وهو يجلس جنب سعود ورايف
سعود طلع جواله الي يدّق: هلا جدي
سعد بتوجّس: وينكم انتم ! قمت من نومي المشب فاضي وباب الشارع مشرع صاحين انتم !؟ البنات كلهم في البيت !
سعود تنهد بثقل: اعذرني يا جدي نسينا نسكره ورانا
سعد رفع حاجب: وينكم فيه انتم ؟
سعود ناظر بالي حوله قبل يبتسم بسخريه: في الاستراحه مع الشباب
عدّال ضحك بسخريه: قال استراحه قال .. استراحه ولا أروع صراحه
سعد ضيّق عيونه: سعود .. نبرتك ذي أعرفها زين تراني لا تكذب علي ترا مافيني شدّه للكذب
عدّال تنهد وهو قافله معه وسحب الجوال من سعود: صاير شيء ، وحنا الحين بالمستشفى اصغر احفادك الغالين بدر ورايف ومهمار ذالفين لساحة تفحيط ومتمشكلين مع قليلين خاتمه والحين حنا بالمستشفى ***
سعود ومهمار ورايف توسعت عيونهم من فعل عدّال وسعد مسك راسه: الله لا يبارك فيكم من عيال كانكم تبون تجيبون لي الجلطه انا داري .. انا قايل هالهدوء هذا ما وراه الا المصايب تفو عليكم وعلى وجيهكم
سكر بوجهه ولبس ثوبه وهو يطلع بعصبيه
البنات كانو بالصاله استغربو مشيته وعصبيته بهذا الوقت، دانه: يبه على وين وش فيك معصب !؟
سعد بعصبيه لّف عليهم: وش فيني بعد غيركم ؟ عليتو كبدي الله يعل كبودكم كاني وصلت السبعين والشيب غزى راسي ولانتو راضين تريحوني ماغير اراكض وراكم مره في الدمام مره في الجنوب مره في قطر مره في مستشفى مره في سجن انتو تبون تذبحوني قبل يومي
البنات ناظرو بعض بتفاجئ
-
إنتهى، ارائكم وتعليقاتكم؟