أصبحت الدروب النوارة ظلام في وجه غلاب الخطاوي

12

-
بدر بقمطه: انتي جني ولا مودمي يارب استرني بسترك
نور طقته مع راسه: لا تلف لا اكسر رقبتك تستعبط على راسي انت كيف جنيه جني يدخلك
بدر بعصبيه: وكسر انتي وذراعتس اجل وش جايبس الموتر ما تعلميني
نور شهقت وهي توها تستوعب انها بدون عباية: الله ياخذك قاعد تخز من الاول يا جعل عيونك الفقع
بدر بسخريه: من زينتس يا بنت الحلال ماشفت شي وانتي تخلين في الادمي عقل!
نور وهي تلّف عباتها عليها: ولا كلمه انطم رجعني خيام جدي سعد
بدر وسع عيونه: اجل انتي من بنات طامي !
نور رفعت حاجب وهي ترفس مقعده: اسمه عمي طامي ماهو خويك في الديوانيه هو تناديه حاف، ومالك دخل بنته ولالا رجعني وانت ساكت
بدر ناظر بالطريق قدامه: ارجعي افطسي ماني راجع لو تنكعين قد اني ماسك الخط
نور وسعت عيونها: نعم ! وش يعني وش اسوي انا الحين انزل اتهبد في البر ؟
بدر رفع حاجب: ومن قالتس تنزلين تتهبدين ؟ انطقي لين اخلص شغلي وارجعتس معي
نور ضيقت عيونها: وانا وش دراني عنك انك ماراح تسوي فيني شي ولا توديني مكان ! شوف ترا طرحتي معي والله العظيم الفها برقبتك الحين من ورا وتروح لربك
بدر كشر: وش ابي فيك جعلني العمى لو طليت بك ترا زاقه معي والنفسيه تبن اسكتي عني لا اديور عليك وارجعي افطسي وانتي ساكته
نور رفست المرتبه بأقوى من قبل: لاتطول لسانك وقص يبيلك دورات اسلوب ، انا من شفت ثوبك الي طالع فيه وانا غاسله يدي يع
بدر ناظر بثوبه حق النوم قبل يرفع راسه: خير ان شاءلله وش فيه ثوبي ولا تبغيني اتكشخ لعامل بقالة المحطه مثلًا؟
نور قلبت عيونها وهي ترجع تنسدح: الواحد يوم يصير ذوق مو عشان احد بس وش اقول كلكم الله يخلف
بدر: عشتو مو عاجبينك بعد ليه وش فينا ما فينا الا الزين
نور بطفش: كلكم غريبين ومو على مزاجي ولا على هواي
بدر ضحك بسخريه: ووش هواك ومزاجك عشان نواكبه يا الشيخه؟
نور كشرت: تتطنز انت وخشتك !
بدر طنشها وهو يمّد يده للمسجل وابتسم بحماس وهو يردد ورا الشيله: اذكار ربك لاتخليها الا يالرفيق الوافي المزيون خلك على عيني تداريها لا تسلك الفرقى علي بالهون..
قاطعته نور بإنزعاج وهي تمّد يدها لين المسجل
بدر رفع حاجب وهو يدف يدها: خير خير نعم
نور بعصبيه: وكسر لا تمسكني ، عاجبك الخياس الي انت تسمعه؟ صدق بيئه
بدر قلب عيونه: يا مواليد بريطانيا انتي سدي حلقك واذنك وانكعمي مالك شغل فيني وفي الي اسمعه
نور بإنزعاج: لا ما احب اسمع هذي الاشياء مو متعلم آداب واحترام الشخص الي معاك ؟
بدر بطفش: تراك طفشتيني انتي بلبل اداب واحترام وانتي ما دليتيه من قمتي وانتي تكفخين فيني نامي نامي نوم الظالم عباده
-
نور بحمق: نام عليك جدار قول امين ، الاحترام لاهله مو لك
بدر بإنزعاج: تراك اقلقتيني وبعدين يعني وش تبغين انتي خلينا نكمل طريقنا ونقضي خلقه مصدع من ازعاجكم امس
نور ضيقت عيونها: انت من اي واحد فيهم ؟
بدر رفع حاجب: وش دخلتس فيني صه بس
نور بإصرار: اي واحد فيهم خلص علي
بدر بطفش وهو يبيها بس تسكت: بدر
نور شهقت قبل ترفس المقعد بعصبيه: وكسر يكسر ذا اليدين انت الحيوان الي جايب ذاك الحيوان الكبير في الخيمه!
بدر مسك ظهره: وكسر يكسر يدينك انتي شوي وتطيريني من المرتبه ، بعدين وش الحيوان الكبير له اسمه واحترامه يا ام الاحترام اسمه القدير ضب من الحيوانات البريه القديره بس بقاط يسري بعروقكن
نور بتقزز: اييو قدرك الحيوانات القديره يا الحيوان القدير
بدر بعصبيه وصراخ ونفسيته بدت تقفل: تراي ساكت وقاصر الشر انطمي لا اتوثم بتس هنا
نور فزت من صرخته ورجعت لورا بخوف: لاتصارخ خوفتني!
بدر بسخريه: ساعه تلعلعين فوق راسي توس تخافين
نور قلبت عيونها وهي ترجع على الشباك بطفش: كم باقي طيب ونوصل؟
بدر وهو يضيّق عيونه: نص ساعه ونوصل المحطه
نور وسعت عيونها: نعم! نص ساعه عشان نوصلها اجل متى بنرجع خيام جدي سعد!
بدر ببرود: يعني يمكن يبي لنا ساعه ونص
نور بعصبيه من شافته متكي ويسوق برجلينه: اخطبوط انت سق زين لاتصدم بنا
بدر: ما تشوفين الارض القاحله الي انتي بها من تصدمين يعني الجن؟
نور: حتى ولو يمكن يطلع فيه حجار او حيوان كبير ما تدري ، تراي مو بايعه روحي انا
بدر بضحكه: نعم اختي وش اسم الحصى؟
نور كشرت: وش عليك انت انتبه وبس
بدر: انتي لو تسكتين بس كلنا بخير
نور تنهدت بملل وهي مو قادره ترجع تنام، طار منها النوم من اللي صار وكل شوي تشّد طرحتها عليها لأنها ناسيه نقابها مع نوير ومو معاها الا عبايتها وطرحتها،
وصلوا بعد صمت ربع ساعه دار بينهم لين وصل بدر المحطه وقف السياره وهو يردف: تبين شي اجيبه مع الخبز؟
نور: يعني جنتل مان الحين؟ ما ابي شي خلصنا بس
بدر كشر: والله ما يظفر المعروف فيتس
نزل بدر واخذ الخبز وباقي الاحتياجات الناقصه بمطبخ العزبه ونسوا يجيبونها معاهم ورجع وهو يفتح الباب الامامي الي وراه نور
فزت نور وهي ترجع على ورا: وجع ليش فتحت الباب هذا
بدر: فاتح بابك انا يا الدراما؟ فاتح الي قدام بحط الاغراض
نور قلبت عيونها بلا رد وبدر رجع يركب وهو يمسك الخط من جديد ، إمتدت يدينه للمسجل لكن نور صرخت بحده: لااا
بدر فز: لوا يلوي راستس خير ان شاءلله يا ذا الصوت الي ما ينقطع
نور: لا تشغل ذوقك مخيس يخرب صفاء ذهني
بدر بسخريه: الله يا صفاء الذهن ليتس تعطين قلبتس ولسانتس شوي من الصفاء اجل
-
عزبة سعـد، خيمة العيـال/
جلست نوير وهي تفرّك عيونها ، فيها نوم لكن عيا يزورها..لفت بنظرها على البنات وسالتهم غارقين بنومهم ، تنهدت بضيق ووقفت وهي تعدّل عليها البرقع اللي عطتها دانه وطلعت من الخيمة
تنفست بعُمق وهي تبتسم على الأجواء براد وصوت الابل والغنم في شبكهم وشروق الشمس الي ببدايته ،
تقدّمت وهي ناوية تروح تشيك على نور ومرّت من قدام بيت الشعر اللي كانوا العيال كلهم نايمين حتى رايف اللي دخل معاهم بعد الصلاة الا عدّال اللي كان بالدكه شاب ضو ويشرب شاهي
كشرت نوير من شافته وتعدّته لكن عدّال ابتسم: ما فيه صباح الخير يا ولد عمي يا حضرة الممرضة؟
نوير ببرود وهي مكمله طريقها: صباح الخير
عدّال ضحك من النرفزه اللي بانت بصوتها ،
نوير عقدت حاجبها وهي تتأكد من السيارات الموجودة .. قربت وهي تنتظر بدرايشهم وحده وحده لكنها مو لاقية نور ولا بأي سيارة فيهم
شهقت بخوف وهي ترجع راكضه لعدّال: عدّال عدّال تكفى
عدّال فز: بسم الله علامتس وش فيتس!
نوير برجفة: اختي اختي نور وينها!
عدّال رفع حاجب: نعم؟ اختس مو معكم؟ كيف تقولين وينها
نوير: لا ماني لاقيتها لا بالسيارات ولا بالخيمة!
عدّال: روحي شوفي خيمة الحريم يمكنها فيها
نوير ركضت: صح ذكرتني
دخلت خيمة الحريم وهي تتسحّب بشويش وتتأمل الوجيه النايمه ، مالقت وجه نور بينهم وطلعت وهي العبره بحلقها
عدّال الي كانت ينتظرها برا فز: هاه لقيتيها؟
نوير ناظرته برجاء: مالقيتها عدّال تكفى قلبي مو قادره اختي وينها؟!
عدّال بربكة: يابنت الحلال اذكري ربتس واهدي يمكن قامت تتمشى في البر خلينا نشوف حولنا
نوير بإنهيار: نور ما تحب البر ولا تواطنه عشان تتمشى فيه ، حتى جوالها مو قادره تدق التغطيه زفت
عدّال بتهديه: سمي بالله وامشي معي ندورها ماراح نخسر شي يمكن حبت تغير جو بعد اللي صار
مشت نوير وراه برجفه: مو قادره حتى اطلع
عدّال بهدوء مد ذراعه لها: تجودي فيني
نوير بتردد نفضته من راسها من جات صورة نور ببالها، مدت يدها وهي تمسك ذراعه برجفه: عدّال طيب لو هي طلعت وراحت وش بسوي لو كانت الحين طايحه من عضة كلب ولا رفسة ناقه ولا لذعة عقرب؟ الله ياخذني انا الغبيه الي وافقت اخليها تنام بعيد عني!
عدّال بتركيز وهو يتفحص بنظره: بسم الله عليتس لاتدعين على عمرس بنلقاها سالمه كبي الشيطان عنتس
دوروا حول الخيام والجبال القريبه لكن مالقوا أحد ،
نوير بتعب اردفت: مالقيناها وين بتكون راحت !
عدّال بتذكّر فز: طيب انتي هي بأي سياره؟ لايكون بسيارة رايف؟!
نوير اومئت: ايه هي بسيارة ولد عمتي موضي
-
عدّال رفع جواله بعتب: الله يهديك بس وماقلتي من اول ليه! اخلفتيني حتى ماطرى علي اسال الا هالحين
نوير بعصبيه: وش بيفرق باي سياره؟ اقولك اختي ضايعه تقول اي سياره!
عدّال وهو يحاول يلقط تغطيه: بروح ذاك الحزم القط شبكه ، لانه يا الفالحه بدر رايح بسيارة رايف ياخذ مقاضي العزبه
نوير شهقت: يعني نور معاه؟
عدّال: اكيد اجل وين بتكون بس بدق عليه احتياط خليك هناك برجع الحين
نوير بخوف: لا بروح معاك ماراح اجلس
عدّال تنهد: انتي باليالله تحركتي بالعقوم هالدور تروحين معي الحزم ! دقايق واجي ماني متاخر
جلست نوير وهي تحاول تهدى: لاتتاخر
راح عدّال ونوير تراقبه من بعيد ، بعد دقايق رجع لها وهو يبتسم: لقينا المفقوده ، نور معاه وهذاهم راجعين وامورها طيبه
نوير تنهدت براحه وهي تمسح الدموع العالقه برمشها: الحمدلله يارب الحمدلله والله قلبي كان بيوقف من الخوف والتفكير والمشاهد الي جات بعقلي!
عدّال ابتسم بهدوء وهو يمد ذراعه: بسم الله على قلبس
نوير مدت يدها وهي تمسك كم ثوبه الأسود: اسفه تعبتك معاي
عدّال الي متقدمها: لا تعب ولا شي بنات عمي ان ما فزعت لكم افزع لمن
نوير بهمس: سبحان من غير الاحوال اجل الوحش الي في المستشفى من!
عدّال: تراي سامعتس بس بتغاضى
نوير ما ردت عليه وتفكيرها بأختها وخوفها اللي هّد حيلها قبل شوي،
نزلوا لين وصلوا من جهة شبك الحلال ، لّف عدّال على نوير: تسمحين لي اوريك شيء ؟
نوير باستغراب: وش!
عدّال: تعالي وراي
مشى لين وقف عند الشبك ونوير مشت لين وقفت جنبه: وش الشي الي بتوريني ياه؟
عدّال بابتسامه أشر على وحده من الابل: شفتي الصهباء الي هناك ، ما ذكرتك بشي؟
نوير دققت بنظرها على الناقه بعدم تأكد: كأنها ناقتي الي هداني ياها جدي قبل نشد عنكم؟
عدّال ابتسم بتعجّب: ذاكرتك قوية!
نوير اتسعت ابتسامتها بحماس: يعني هي صدق! ابي اروح لها
عدّال رفع حاجب: متي امس من ضب والحين بتدخلين الشبك هذا؟
نوير: لا ماراح ادخل انت بتطلعها لي
عدّال ضحك: واثقه بعد بطلعها لك !
نوير لفت بتمشي: اجل بروح اكمل نوم افضل
عدّال بسرعه: لا لا خليك بطلعها الحيين
دخل الشبك وهو يطلع الصهباء لها ، وقفت نوير بحماس وهي تمّد يدها بشويش: الشيخه! اشتقت لك والله العظيم
عدّال ابتسم: امسكيها زين وش فيك خايفه
نوير بجحده: مو خايفه من قال!
عدّال كتم ضحكته وهو يشوف جسمها الي يبعد عن الناقه: لا صادقه مانتي خايفه من يقوله؟
نوير كشرت: لا تتطنز! خلاص دخلها بجيها بعدين
عدّال ضحك بصخب وهو يسحب الصهباء منها: نعنباك يا الذروقه
نوير تقدمت: خيمتنا نام فيها احد منكم ولا ؟
عدّال: لا كلنا ببيت الشعر ليش ؟
-
نوير: بروح اجلس فيها لين تجي نور مستحيل تغفى عيني قبل اشوفها قدامي
عدّال بسرعه: اجلسي بالدكه الحين وقت قومة جدي بينبسط لاشافك
نوير بتثاوب: اخاف يقومون العيال قبله
عدّال: لا ما يقومون الا الضحى العود
جلست نوير وعدّال وقف عند الحلال وهو يراقبها مره ومره يشغل نفسه بالابل ،
نوير شافت براد الشاهي حق عدّال وبتردد ناظرته وشافته صاد عنها فأخذته وهي تاخذ بياله وتصب لها
طلع سعد من خيمته واتسعت ابتسامته: نوير! ياحلاته من صباح والله
نوير ابتسمت بهدوء: صبحك الله بالخير يا جدي كيف اصبحت
سعد جلس جنبها: صباح فيه نوير وشلون ما يصير كله خير وسرور؟ يا كثر الشوق والله يا نوير
نوير ابتسمت بتأثر وهي تكبّح أسئلة كثيرة بداخلها ،
سعد نزل بنظره على الشاهي: انتي الي مسويته؟
نوير: لا عدّال
سعد رفع راسه وهو يشوف الواقف عند الحلال: اجل ذا عدّال ، احسبه بنيدر .. عدّال عدّال علامك واقف تعال اجلس معنا هنيا
نوير بتوتر: اجل انا استأذن منكم بشوف الحريم والبنات قامو ولا
سعد ضحك: اجلسي يا بنيتي عادي ولد عمتس وغطاتس عليتس مامن خلاف، البنات والحريم ماحولهم قومه الحين .. ابنشدتس يا بنتي هم ابوتس ونواره ، ما قنعني كلام مبارك ومصلح
نوير بتوتر: نواره يا جدي تزوجت قطري وكل فتره وفتره ابوي يروح عندها فتره
سعد بإستنكار: وانتي ونور لحالكم في البيت !
نوير بسرعه: عشان دواماتنا يا جدي وعادي الحمدلله ماعلينا خلاف
سعد بضيق: الله يهديه ويليّن راسه اليابس الي ماهو راضي يلين حتى بعد الولد
نوير رفعت حاجب: ولد؟ اي ولد؟
عدّال بسرعه سحب الشاهي بتغيير الموضوع: هاه يا جد جازلك الشاهي ولا
سعد ناظره باستغراب: دايم وشاهيك جايز لي يا عدّيل
طلعت غيم من خيمة العيال وهي تفرك عيونها ، ابتسم سعد بوسّع وهو يفتح يدينه: هلا هلا بالغيم ياهلا .. اجل راقده عند ابوها !
غيم أرتمت بحضن سعد وهي تردف: جوعانه
نوير ابتسمت من لطافتها ومدت يدها: تجين معي نسوي لنا فطور ؟
غيم اومئت وهي تمسك بيد نوير
عدّال: مالك لوا راقده عند امها ابوها والعيال شفهم وراك ببيت الشعر
سعد باستغراب: وراهم ببيت الشعر والبنات بخيمتكم!
عدّال يضحك: والله يا فاتك يا جدي احداث امس
بدأ يسرد له الاحداث امس ، ونوير بالمطبخ مع غيم يسوون فطور على قدهم هم وسعد وعدّال
توقفت سيارة بدر قدام الدكه على طلوع نوير وغيم من المطبخ ،
نزلت نور وهي حاطه طرحتها على وجهها بركض متجهه لأختها و بدر نزل وراها وهو ينزّل الاغراض وهمس بتكشيره: ولا حتى فكرت تساعد! ام العفن صدق
سعد رفع صوته: عساك ما روعت حفيدتي يا بدير
بدر بسخريه: اروعها؟ هي الي روعتني بسم الله علي منها بس
-
قطـر، بيت ضـاحي/
غزله ضيقت عيونها: غلاب انت منت خالي! لك ساعه وانت تحوس عندي وش وراك وش تبي
غلاب بتوتر: اسمعي يمه ابي اكلمش بموضوع مهم
غزله: خير اللهم اجعله خير وش هالموضوع ؟
غلاب: بتزوج نواره
غزله ناظرته لثواني بدون ملامح ، قبل تردف من لاحظت صمته وجديته: انت صادق ولا تلعب علي ؟
غلاب: يمه الله يهداش هذا موضوع ينلعب فيه؟
غزله بعصبيه حاولت تمسكها: غلاب تستعبط انت جايني بتتزوج بنت ما شفناها الا مره بحياتنا ولا نعرفها ولا نعرف اهلها ولا ندري من وين هي جايه ! لا انت منت بعقلك استخبلت موليه!
غلاب تنهد: يمه انا اعرفها واعرف اهلها من سنين بعد ، انتي تعرفينهم بعد اخوياي السعوديين هذي من بناتهم
غزله وسعت عيونها: العب بعقلي انت وشلون من بناتهم وهي جايه تستفزع فيك مع ابوها ولا حولهم سند ولا والي!
غلاب: موضوع طويل يا يمه .. تكفين انا جايش ابي نملك اليوم ونشهر زواجنا
غزله بصدمه: انت طايح على شي ؟ راسك فيه بلا ؟ صاحي ولا مخبول .. لا بالله الصحايه مجنبتك وش الي جايني فجأه بتتزوج هالبنت واليوم !
غلاب: يمه البنت عاجبتني وانا بسن زواج وخير البر عاجله وش الضرر لا تملكنا هاليوم ؟
غزله وقفت بعصبيه: ماني مناقشتك وانت عقلك طاير رح عن وجهي بكبر عقلي ولاني راده على خبالك!
غلاب احبها بترجي: يمه تكفين اسمعيني انتي مو همش سعادتنا وبس؟ وراه رافضه! عطيني سبب مقنع لو واحد
غزله بحده: انت الي عطني سبب واحد مقنع لـ الهبال الي تنطق به ، فزعت لها وبيض الله وجهك خلاص اهلها يكملون المهمه .. سالفة الزواج شلها من بالك وانساها ولا تناقشني وترفع ضغطي
غلاب تنهد بضيق: يمه لا تقفلينها بوجهي ، وش دخل الفزعه و اهلها الحين .. انا ابيها هي مالي في احد
غزله تكتفت: وان قلنا سايرتك ورحنا نخطبها وتملك عليها، تخطبها من مين ؟ وتملك عليها وتاخذها من بيت من؟ ماترد علي؟ وين ابوك حتى؟ حشى مانت بعقلك ماهي لعبه هي خطا زواج ! ابعد عن وجهي
دفته غزله وهي تتخطاه وهو زاد ضيقه .. اذا هذي ردة فعل امه الهينه اللينه وش ردة فعل ابـوه؟والوعد الي قطعه لـ نواره؟وش بيقول الحين لها؟
-
المستشفـى/
كانت نواره نايمه على كراسي الإنتظار وهي محتضنه شنطتها ومتمسكه فيها،
مرت إحدى الممرضات الي راحمه نواره وقومتها بهدوء: لو سمحتي اختي..شكلك نمتي بالغلط؟
نواره فزت وهي تطقطق رقبتها: ايه شكلي نمت بدون ما احس مشكوره
مشت الممرضه ونواره تنهدت بضيق وهي تستغفر: اللهم لا اعتراض يارب
تنهدت بضيق وهي تحّس بجبل فوق صدرها..اليوم هو اليوم الموعود الي كانت تماطل بالنوم امس لأجل يتأخر
-
آنتهى، ارائكم وتعليقاتكم💕؟.