أصبحت الدروب النوارة ظلام في وجه غلاب الخطاوي

33

-
ريوف لحقتهم بسرعه: والله ماتطلعون بدوني خير وش النحاسه ذي بروح معكم وش بيضركم يعني لو جيت معكم بثقل عليكم مثلًا؟
دانه ناظرت نوير الي همست لها: بكلمك بموضوع
دانه لفت عليهم: انثبرو بس لا دخلتو الثلاثين وديناكم معنا يلا يا ماما انتي وهي اقعدوا واطلبو عشاكم
نوير ضحكت وهي تشوف وجيههم: بنجيب لكم قهوه وحلا والله لاتخافون
كشرو البنات ورجعت ريوف تجلس بحلطمه: وانا متاني بدخل الثلاثين ياحظي
نور دفتها: فوق آنك دبه بتكتميني قومي هناك
ريوف بعصبيه لفت على رجاوي ونجوان: وتقولون لي ليش تمردغينها ؟
مناوي كتمت ضحكتها: تعالي بس شوفي طلبت لك ذي الوجبه زينه خلاص اتممه ؟
نواره بملل ناظرت بجوالها وهي من بعد مكالمتهم ماسمعت منه أي خبر ،،
نور ناظرت بنواره: وش فيها نوير؟
نواره هزت كتوفها: مافيها شي بس يمكن تضايقت لانها ماشافت امي زي ماقالت
دانه وهي تعدّل عبايتها أخذت شنطتها العنابية وهي تلف على نوير: يلا أمشي خلصت
نوير بإستنكار: لابسه كعب ليش! ترا مطعم مو عرس
دانه ناظرت بكعبها الاسود: مو معب يادوب شوكه صغيره بعدين قلتي افخم مطعم لازم الكشخه
نوير كتمت ضحكتها: اذا ما وديتك البوفيه هذا وجهي
دانه بعصبيه: والله لو ما توديني افخم مطعم لا اسحب فيك اراضي الخبر خير!
نوير بتسليك: يمامي خفت زين بس امشي
ركبو سيارة نوير وحركت نوير للمطعم وهي ميته ضحك على ريوف ونور الي يطلون عليهم من باب الشارع
دانه بضحك: تكفين خلينا ناخذهم وربي رحمتهم ياعمري هم
نوير ابتسمت: ماعليك بعوضهم
دانه بشك: انتي وش وراك! الله يستر بس من ذا الطلعه
نوير تنهدت: موضوع طويل بس ماعليه قدامنا الليل بطوله نتكلم فيه لا نفقسها من اول الطلعه
نواره فزت وهي توسع عيونها من شافت غلاب ارسل لها صورة الحدود القطرية وكاتب "جايش ملتقانا غدًا"
بلعت ريقها وهي تكتب بسرعه "أنجنيت أنت ! وش اللي جايني!؟ بلا هبال غلاب خلاص قلت لك اللي عندي مو عشان رديت عليك يعني أبيك!"
قضمت أظافرها بتوتر وهي تنتظر رد منه لكن بلا ود
وزفرت بعصبية من راكان اللي يرسلها كل تحركاتهم ومصور المطار
رمت جوالها بغضب: يعني حبكت الا بذا اليوم كل الي في قطر بيجون الخبر!
نجوان باستغراب: وش فيك ؟
نواره تنهدت: ولا شيء ، نور تعالي ابوي بيكلمنا
فزت نور وهي تمشي ورا نواره رايحين لغرفتهم
نور بقلق: كيف بيكلمنا؟ يعني بيجي هنا خلاص؟ نوير رضت؟
نواره بانزعاج قاطعتها: بس يا مزعجه اكذب عليك بس عشان اقومك من عندهم امشي اجلسي وسكري الباب وراك
نور باستغراب سكرت باب الغرفه وهي تجلس: وش فيك وش صار؟
نواره بتوتر لفت الجوال عليها: كلهم جايين الخبر
نور وسعت عيونها: نعم نعم يعني حصه وولدها صدق بيجون وابوي بيجيبهم!!!!
نواره: تخيلي بعد وين بيجلسون؟ في بيتنا
نور بعصبيه: ابوي يستهبل ولا وش جا عقله؟
نواره وهي تهز رجولها: قلت لكم من البدايه خلونا مع ابوي لا نتركه ، شفتو الحين لوين وصلنا؟ بيجيبهم عندنا ويرزهم في وجيهنا
نور استوعبت وهي تشهق: وهذا وين جاي بعد!
نواره بسخريه: صباح الخير تو يوصلّك الإرسال؟
نور: وش بتسوين الحين؟ بعدين وش يقصد هو بإنه بيجيك! يمكن بس كلام
نواره بتوتر: هو يعرّف عيال عماني صديقهم ،، يعني اكيد بيجي هنا! ياربي يادانه وين اختفت ابي اسالها اكيد بيعلمونها العيال
نور ابتسمت بروقان: طيب ياشيخه وراك معصبه والله يونس لو مكانك برقص جاي طاق درب من قطر للخبر عشانك ويحبك وش يزعل بالموضوع؟
نواره بعصبيه: نور لاتجلطيني! انا قلت لك وقلت له وشوي وأسجلها فوق جبهتي انا ماني مستعدة لا للإرتباط ولا لزواج ولا لحب ولا لخرابيط متى تستوعبون؟
نور رفعت حاجب: نواره مو عشان علاقة ابوي وامي فشلت وعلاقة نوير بخطيبها السابق فشلت يعني كل علاقات العالم فاشله! هم لهم نصيبهم وانتي لك نصيبك
نواره زفرت: لا فاشله وحنا بالذات فاشله تبيني اروح قطر ولا هو يسكن بالسعوديه؟ هذا اول شي ، ماحد فينا بيتنازل للثاني ولا تارك بلده واهله عشان الثاني .. الفروقات كثير والاعباء اكثر هذي علاقه منتهيه قبل تبتدي وانتهى
نور كشرت: كيف تحكمين وانتي ماجربتي!
نواره ناظرت بجوالها على إسمه بشرود: فيه اشياء اذا جربتيها بتنوجعين اكثر من إنك تثبتين انها صح
نور عدلت جلستها: وفيه اشياء اذا ما جربتيها بتنوجعين لأنك فوتيها ، ترا وجع الندم اكبر من وجع التجربه
نواره ناظرتها: اقول قومي اذلفي عن وجهي بزر طول اصبعي وتتفلسف صدعتي برأسي خلينا من موضوعه ، نوير قررت شيء بس باقي ما تأكدنا منه بتكلم دانه ونشوف
نور عقدت حاجب: قررت شيء؟ وش قررت بعد يا كثر قراراتكم
نواره: بناخذ شقه نعيش فيها انا وانتي وهي
نور شهقت: تستهبلون وابوي وجدي؟ والله مايرضون!
نواره بتردد: ماهو هنا السالفه ، اننا بنكذب على الثاني باننا عند الثاني
نور هزت راسها: لا حشى انهبلتو انتو منتم صاحين ناقصين حنا وجع راس وبلاوي ومشاكل ؟ لو يعرفون وش بيصير فينا؟
نواره زفرت: اوهوه عاد صدعت انا منكم مدري القاها منكم ولا من هالتبن غليّب ، خلاص نشوف اذا رجعو دانه ونوير وش بيصير
نور وقفت: اروح اشوف اكلي وين صار ابرك ، عايله ما وراكم الا الهم والقروشه
نواره: انتي اول هم حبيبتي روحي بس يا ام بطين
كشت عليها نور قبل تطلع بينما نواره قلبت عيونها وهي تنسدح على السرير بشكل عرضي وهي تناظر السقف بتفكير في غلاب
~
مشب سعـد/
عدّال: هذا اللي قاله لي غالب يوم اتصل علي ، وشوفة عينك ادق على الحمير الثلاث ولا واحد فيهم يرد
سعود تنهد: مو مشكله خلاص نسد انا وياك لين يردون ، خل نطلع اول المفارش من المغسله ونرتب المقلط لين يجي جدي ونعلمه ماراح يعيي بيقلطهم اكثر مننا تعرفه دايم لاجانا غلاب هو الي يستقبله
عدّال اومئ: زين اجل بروح اطلع المفارش وانت رتب المقلط لين اجي
سعود طلع جواله: بكلم ريوف تجيب لي الاغراض متى بيوصلون هم؟
عدّال: يصور ثاري سناب توهم ماشين يمكن يوصلون الفجر ولا قبله بشوي
سعود اومئ: حافظهم الله
عدّال ناظره: لا والله الي منت خالي! سعود ياخوي شفيك من الصبح وانت خاطرك ماش
سعود رفع حاجب: وش فيه خاطري مافيه الا المسرّه يتهيألك
عدّال ضيق عيونه: تلعبها على مين يابو غيم؟ والله ان خاطرك فيه من الضيق ما يملاه مير تكلم لاتقعد ساكت والحكي ياكل فيك
سعود ابتسم بفتور: لاتخاف علي لو فيني شي تكلمت لكن مافيني شي بس ضغوطات الشغل ازمه وتعدي
عدّال تنهد بيأس: الله من العناد الي في ذا الراس بس
طلع عدّال وسعود تنهد وهو يقوم للمقلط وعيونه تراقب الجوال على إسم عروب، علاقتهم متوتره من بعد ذيك الحادثه وزاد عليه تصرّف ضاوي وجده
نزل جواله ودخل المقلط وابتسم وهو يشوف ريوف ترتبه
سحب منها المكنسه وهو يردف: انا قلت لك جيبيها ما قلت لك نظفيه!
ريوف بحميه: افا بس يابو ريوف تنظف واختك موجوده؟ اعقب واخسى
سعود مات ضحك: يالله منك انتي وبدير واحد يناديني ابو ريوف والثاني ابو بدر ، وبنتي ماملّت عينكم يعني؟
ريوف كشرت: حنا عيالك قبلها ولا عندك قول ثاني ؟ ترا فيه شي اسمه عقوق الابناء انتبه لاتفرق بينا وتزيد غلاها عننا وتاثم
سعود ابتسم: وانا اقدر افرق بينكم؟ القلب واحد وتقاسمتوه ماخليتو فيه مكان لاحد بعدكم
ريوف ابتسمت وهي تحضنه من جنب: يازين ذا المبسم بس ايه يارجال كذا من اول مو داخل علي وانت مجهم وجهك كانك شايل جبال فوق كتوفك
سعود طبطب على كتفها: لاتلهيني عن شغلي بحكيك يابنيتي وادخلي بيجي الحين المطيور شبيهك عدّال ماعنده بريكات بيقلط بوسطنا فجأه
ريوف كشرت وهي تبعد: وانتم متى تعتقوني من تشبيهكم المخيس ذا والله حرام عليكم بتقطعون نصيبي لو يسمعكم احد وانتم تقولون اني اشبهه
سعود ضحك بصدمه: ابنك يابوي والله الي ماعاد به مستحى هذا وتوك بالثنوي!
ريوف ضحكت بقمطه: يارجال امزح معك وش فيك هاك هاك خذ المكنسه والمنظفات انا انتهى دوري مع السلامه
طلعت ركض لداخل بينما عدّال دخل وهو شايل مفرش ، حذفه على الارض وهو يتنفس بسرعه: يدي الثانيه بتنكسر مع الاولى
سعود ضحك: والله اني داري انك بتقلط فجأه حمدلله روحتها
عدّال باستغراب: وش تقول انت منهي
سعود وهو ياخذ المفرش على جنب: ريوف
عدّال ضحك: يا حليلها خليفتي في البنات
سعود: كمل كنس وانا بطلع اجيب المفارش لا توجعك يدك
طلع سعود وسمع صوت ينادي: هلا مناوي وش بغيتي
مناوي: ولا عليك امر سعود بس المندوب وصل خذ الفلوس جبه او عط عدّال ، دانه مو فيه ولا كان خليتها تجيكم
سعود اومئ: ابشري بجيبه وخلي فلوسكم عندكم
طلع سعود وهو ياخذ الطلب ويحاسب
بينما مناوي مسكت راسها بفشله: الله ياخذك ياريوف
ركضت لداخل وهي ترمي الفلوس على ريوف: قومي عطي اخوك راح يستلم الطلب ورفض ياخذ الفلوس قايله لك عدّال مب جايني مافيه الا سعود ماشفت اخوي
نجوان ابتسمت: اقعدي بس وخلي فلوسك مستحيل ياخذها سعود ، هذا سعود وذا طبعه من عرفناه روحو بس اخذو طلبكم
مناوي بوزت: يختي والله فشله وجهي يحتّر وحنا ما نقصر طالبين عشا قبيله وكل ما جينا نطلع للمندوب يطلع سعود بوجهنا وهو الي يدفع!
نور باستفهام: سعود اخو ريوف ؟ اخو هالدبه هي وبدر؟ صدق ان الله خلق وفرق!
رجاوي ضحكت: اص لا تسمعك بس هذاهي جت
-
سيارة مهمـار/
مهمار وقف: اوقف هنا؟
لّف على بدر ورايف الي متحاشرين بالمقعد الي جنب السايق ومتلطمين ومسك ضحكته: الحين انا مافهمت انتم كذا يعني مسوين مجرمين زيهم؟ الله يخلف بس
رايف بقمطه: يلا بسم الله توكلنا على الله حسبي عليك انت وموترك
نزلوا ومهمار اردف: خلكم جنبي لا اشوفكم مسفحين بدوني بسكر السياره اصبرو
وقفو بدر ورايف وبدر يتفحّص المكان الي قدامهم بشارع بنظراته: يارب القاها عاد لو ما لقيتها بنجلط
نزل مهمار ومشى عندهم: انتبهو وانتم تقطعون الطريق
بدر كشر: ترا ابثرتنا توصيات شايفنا وراعين؟ امش بس جينا هالمكان مرتين
مهمار رفع حاجب: ومفتخر يعني؟ امش لا اهفك لكم وجه تسولفون بعد
رايف كشر وبهمس: عز الله انه حكم قرقوش مالقيت الا ذا يعني اخو عدّال وين بيطلع من أطباعه؟
بدر: هاه اجل اقول لضاوي عشان يحشرنا ؟
مهمار صفقهم على روسهم بعصبيه: وقته انت وياه تتساسرون امشو لا اخبز وجيهكم ترا قولوني بيهيض والسبه انتم الله يقلعكم انتم ودوابيركم
دخلوا المكان الي كان عباره عن ساحة مفحطين ويكثر فيها السرقه والهوشات ، كان اشبه بمكان مشبوه وكل الي فيه مولّين
مهمار فتح عيونه بصدمه: الله يبهتكم يالله انتم وش كنت تسوون هنا!
بدر بلع ريقه: صدقني بس دخلنا تجربه وطلعنا
مهمار بعصبيه: والتجربه ماحلت لكم الا في الاماكن ذي؟ تفاهمي معكم بعدين امشو الله يسود وجيهكم
رايف رفس بدر الي دعس رجله: اعمى انت ماتشوف كسرت اصابع يديني وبتلحقهم رجولي!
بدر كشر: انطم من التوتر ماقمت اشوف
لفو على المكان قبل يشهق بدر وهو يأشر: سيارتي ذي!
مهمار سحبه: على وين رايح انثبر لين تطلع السياره من المكان ونلحقها ونقدم بلاغ اهجد
بدر بعصبيه: شف الكلب كيف يفحط فيها بيخربها والله ماخليها ثانيه! هذاهو وقف
مشى بدر ورايف ومهمار ناظرو بعض بصدمه وهم يلحقونه
-
المطـار/
تنهد راكان بتوتر لمن دخلو الدمام ،
كان يشيل الشناط بينما امه مسنده ابوه عليها بتكشيره وهي ودها تشوته
طامي كان ضايق لأنه مايدري كيف بيدخل البيت وبناته ماهم فيه
ركبو السياره الي استاجرها راكان وساعد ابوه يركب ودخل الشناط وسمى بالله وهو يمسك الطريق على وصف ابوه
وصلو بعد حدود الاربعين دقيقه للخبر ولبيت طامي تحديدًا
نزلوا من السياره وطامي وقف ثواني وهو يتأمل البيت ولاهو داري كيف بيقوى يدخله
راكان ناظر ابوه بصمت بينما حصه دفت طامي وهي تاخذ منه المفتاح: ناقصه دراما انا
فتحت الباب وهي تدخل بينما راكان كتم ضحكته على وجه ابوه من تصرف امه
شال الشناط ودخل ورا امه بينما طامي كشر وهو يدخل وراهم: الواحد حتى ما يمديه يتاثر
حصه ناظرت البيت الي كان متوسط الحجم وبسيط باثاثه: اجل الفلوس الي لهطتها مني انا وابوي وينهي دام ذا البيت الي معيش فيه بناتك؟
طامي بعصبيه: الزمي حدودك واعرفي من تكلمين الظاهر انك نسيتي طامي وش سوا في سنين مضت ووش بيسوي بسنين جايه
حصه كشرت وهي تسكت بينما راكان تنحنح: اذكرو الله وتعوذو من الشيطان ، انا بروح اجيب شي ناكله وش تبون؟
طامي: الواحد بعد وش ياكل بعد العشا يبي له نشده ذي؟ والله من الفغاره جب كبسه
حصه بعصبيه: لاتقعد تصايح في ولدي وتكسر مجاديفه بالطلعه والدخله بناتك وش هم احسن به منه وانت رافع بهم السما!
راكان تنهد بضيق وطلع من البيت ، لكن سرعان ما داهمته ابتسامه وهو يستوعب انه في بلده
انبسط وهو يركب السياره ويتمشى قبل يجيب العشا ،، يحّس بإنه بدا يقترب من حياته الي راسمها في باله
ناظر بجواله ولا شاف رد من نواره الي بس تقرا ولا ترد وكشر بضيق: شكلهم مايبوني!
-
في المطعـم/
كانوا جالسين في مطعم إطلالته على البحر ،
ابتسمت دانه بروقان وهي تصوّر: والله يا ريوف ونور بيهولون فينا بس ما ينلامون المكان يموت
نوير: اتركي التصوير عنك بيعطونا عين ونتسمم
ضحكت دانه وهي تحط جوالها: الله على تفكير موضي بس
نوير ابتسمت: يا حلاتها هي وتفكيرها
دانه وهي تشرب من العصير: طوّل الاكل حطو هالعصاير واختفو جعت
نوير: عين ريوف ونور صابتنا في مقتل
دانه: خلي عنك الاكل وريوف ونور وعيونهم ، وش وراك ؟
نوير تنهدت: ما يخفى عليك سالفة راكان وابوي صح؟
دانه بلعت ريقها: وش جاب هالطاري!
نوير: بينجاب هالطاري كثير لأن ابوي قرر يجيبهم بكبرهم مو طاريهم وبس
دانه وسعت عيونهم: تستهبلين انتي كيف يجيبهم!؟
نوير: مو يجيبهم وبس هو جابهم وخلص .. راكان قال لنواره انهم اليوم بيكونون في السعوديه و في بيتنا
دانه: لا طامي استخف ، كيف في بيتكم ! بيجيبها هي وولدها عندكم !!
نوير: ماعادهو بيتنا ، هذا زمان الحين هو بيت حصه وولدها
دانه ارتخت ملامحها: نوير تراك من قعدنا وانتي سوالفك كلها كنها اسرار .. تكلمي بوضوح لأجل أفهمك!
نوير بتردد: ماراح نرجع نعيش في ذاك البيت دام ابوي فضلهم علينا وجابهم محلنا
دانه تنهدت: وبس ؟ بيت ابوي مفتوح لكم
نوير خذت نفس عميق وهي ماهي عارفه كيف بتقولّها ، دانه ناظرتها بشك: نوير؟ مو هذي كل السالفه صح ؟
نوير بلعت ريقها وهي تومئ: ماراح نعيش عندكم
دانه برّد وجهها: أجل وين بتعيشون !؟
نوير بهدوء: بنأخذ شقه نعيش فيها .. بس محد بيدري دانه محد يدري الا حنا وأنتي وبس ، وما قررنا نقولك انا ونواره الا لاننا نثق فيك وندري انك بتفهمينا وانك بتكونين سند لنا
دانه بصدمه: نوير الله يهداك كيف تعيشون لحالكم وكيف محد يدري وش فيكم انتم انهبلتو جنيتو وقعدتو! لا حبيبتي بتروحون وتخشون في عين حصه وولدها وتثبتون انه بيتكم ماهو بيتهم وش الضعافه ذي ! تكذبون وتعيشون لحالكم وتتغربلون عشانها هي وولدها!
نوير تنهدت وهي تفرك جبهتها: دانه حنا نحتاج مساحه لنا لحالنا لو لفتره بسيطه نرتب فيها افكارنا ونبتعد عن الضجيج والضغط ونقرر وش نبغى ، انا وخواتي هذي الفتره كلها عشنا باشياء كثيره واشياء ملخبطه وصدمات مانقدر نتقبل نصها .. نحتاج نرتاح وبالحيل
دانه تنهدت بحيره: ولو اني ماني راضيه لكن بعطيكم فرصه فتره وبس يا نوير بعدها تقررون وش تبغون يا عندنا يا عندهم زين ؟
نوير ابتسمت بإمتنان: كنا متاكدين انك بتفهمينا
دانه ابتسمت وهي تردف لأجل تغيّر الجو: وهذا الأكل ووصل بسلام بدون ما تصيبنا عيونهم في مقتل
ضحكت نوير وبدو ياكلون ويسولفون بعشوائية ونوير تحس بإنها ارتاحت من هالطلعة والكلام مع دانه وان في احد بيشاركهم همهم
~
طريق قطـر/
كان غلاب ماسك الطاره وبجنبه غالب وثاري منسدح ورا وهو يلعب
غالب بانزعاج: بس ياولد صجيت راسي بصياحك صاحي انت ولا مهبول
ثاري كشر: الله من جوك المخيس يا الشايب الواحد حرام يلعب بعد ولا جا وقت نومك؟
غالب لّف: هذا الي يبيني اقوم اكوفنه الحين
غلاب ضحك وهو يدف غالب بيده: يارجال اقعد وروّق وانت قم صب لنا من الكرك الي سويت مامنك فايده
ثاري عدّل جلسته بحلطمه: جايبيني عشان اخدكم مب عشان استانس
غالب لّف: وين كيسة الاكل الي خذينا من المحطه؟
ثاري: مب عندي شوفها بحضن غلاب يسوق ويبلع
غلاب اخذ السنكرس وهو يرمي الكيس على غالب: يحسدون الفقير على موتت الجمعه وش عليك مني خلني اكل
ثاري مّد لغالب كوب: امسك حرق يدي
غالب خذاه وغلاب فتح فمه وهو يلف عليه: شربني
ضحك غالب وهم يشرب غلاب وثاري جعد وجهه: الله يحوم كبدك انت وياه
غالب بضحكه لّف عليه: غرت يا حبيبي؟ تبي أشربك؟
ثاري ضرب يد غالب: انقلع عني اموت ولا اشرب منكم
-
آنتهى، ارائكم وتعليقاتكم؟