အခန်း၇၀။ လူစားလဲခြင်း
ထို့နောက် စက်ရုံတွင် လုပ်အားခရသော အလုပ်သမားဖြစ်လာပေမည်။ ဆန့်ကျင်ဘက်ကတော့ အလုပ်သေချာမလုပ်နိုင်လျှင် သို့မဟုတ် အလုပ်အတွက် အကျိုးမပြုလျှင် တခြားနေရာသို့ ပြန်ရောင်းစားခံရမည် ဖြစ်လေသည်။
“ အရှင့်သားရဲ့ ဆန်းသစ်လှတဲ့ အကြံဉာဏ်တွေကို ကျွန်တော်မျိုးမတောင် လိုက်မမီတော့ပါဘူး ”
ဆွေးနွေးပြီးသောအခါ စုမောအာက သက်ပြင်းချလျက် ပြောသည်။
“ ဒါပေမယ့် ကျွန်တော်မျိုးမအတွက် ပိုလေးစားဖို့ကောင်းတာက အရှင့်သားရဲ့ ကြင်နာသနားတတ်တဲ့ စိတ်ပါပဲ ”
“ အမယ် … ဒီကောင်မလေးတောင် မြှောက်ပြောတတ်လာပြီ ” ဟု လီယင်က မထိတထိ စလိုက်သည်။
“ အဲ့လောက်တောင် လေးစားနေရင်လည်း အနမ်းတစ်ခုလောက် ပေးပါလား ”
လီယင်က သူ၏မျက်နှာကို ညွှန်ပြကာ စပ်ဖြဲဖြဲ ပြောလိုက်သည်။
“ အရှင့်သားဟာ တော်တော်ကို ဆိုးတဲ့လူပဲ ” ဟု စုမောအာက စိတ်တိုကာ ပြန်ပြောလိုက်လေတော့သည်။
“ ဟီးဟီး ”
စသင့်သလောက် စပြီးသွားသောအခါမှာတော့ လီယင်က ဆက်မစတော့ပေ။ စုမောအာသည် မိန်းမပိုဆန်ပြီး ယွင်အာလို မရဲတင်း မသွက်လက်ပေ။ ယွင်အာအကြောင်းတွေးမိရင်းနဲ့မှ လီယင်သည် ယွင်အာကို မတွေ့ရသည်မှာ ငါးရက် ခြောက်ရက်ခန့်ကြာပြီဖြစ်ကြောင်း သတိထားမိသွားသည်။ ထို့ကြောင့် -
“ အခုတလော ယွင်အာကို မတွေ့ပါလား ” ဟု မေးလိုက်ရာ စုမောအာက ဝမ်းနည်းသွားသည့်ဟန်ဖြင့် ပြောလေသည်။
“ ယွင်အာက သူ့ရဲ့ နေမကောင်းတဲ့အစ်မဝမ်းကွဲအစား အလုပ်လာလုပ်တာပါ အရှင့်သား။ ဒါကြောင့် တနေ့ကပဲ သူ့အစ်မပြန်ရောက်လာပြီး လူပြန်လဲလိုက်ပါပြီ ”
“ ဟုတ်လား …. ”
လီယင် အနည်းငယ် စိတ်ညစ်သွားသည်။
“ ဒီကောင်မလေး ကိုယ်တော့်ကိုတောင် နှုတ်ဆက်မသွားဘူးပဲ ”
ထိုအခါ ယွင်အာနှင့် ရင်းနှီးသော စုမောအာက -
“ တကယ်တော့ ယွင်အာက အရှင့်သားကို နှုတ်ဆက်မလို့ပါ။ ဒါပေမယ့် အရှင့်သားက မြင်းစီးသင်ရင်း အရမ်းအလုပ်များနေတာရယ်၊ သူ့အစ်မကလည်း အဲ့နေ့မှာပဲ ရုတ်တရက်ရောက်လာတာရယ်ကြောင့် နှုတ်ဆက်ခွင့် မရလိုက်တာပါ အရှင့်သား ” ဟု ရှင်းပြလေ၏။
YOU ARE READING
ငါ့ရဲ့နောက်ဖေးခြံဝန်းက ထန်မင်းဆက်ဖြစ်နေတယ်
Mystery / Thriller"ငါ့ရဲ့နောက်ဖေးခြံဝန်းက ထန်မင်းဆက်ဖြစ်နေတယ်(လီယင်)" Author: Snail Carrying Home Genre: Historical, Military, Urban life Status: Completed Translator: Mocha ဇာတ်လမ်းမှာ လီယင်သည် သူ့အိမ်နောက်ဖေးရှိ ရှေးဟောင်းရေတွင်းကိုဖွင့်ပြီးနောက် ဘဝပြောင်းလဲသွားခဲ့...