مدّيت لك فرحة ومدّيت لي هم واستحيت أرد مدّت يدينك

part : 8

بيت الرّاسي
وقف بنص الدرج وهو يكلمه : حصل خير يلا انا نص ساعة واطلع
قفل منه ونزل وناظرهم جالسين يفطرون: السلام عليكم
ابو حاكم: وعليكم السلام
ام راكان : وعليكم السلام اجلس افطر
راكان : لا مالي نفس بس جيت اسلم
وهج : اسويلك قهوه؟
راكان : لا ارتاحي كملي فطورك وراك جامعه
وهج : ما بداوم اليوم
راكان ناظرها وهو باقي واقف : ليه؟
وهج نزلت الملعقه: بس كذا
راكان : زين بس انتبهي من الحرمان
ابرار وهي تشرب عصيرها: ليه تنتبه! حبيبي بس تقولهم وهج الرّاسي يمكن يخلونها تتخرج بعد!
راكان لف لها : مو كل شي بالاسم! ذا مستقبلك انتي مو مستقبل جدك!
ابو حاكم : وليه وشفيه جدها! هذا هو كبر ابوك وصار من احسن التجار وكبرتك بعده! وهذا انت عندك شركة باسمك! ياناكر المعروف!
راكان ناظره : انا مانكرت معروف احد! وصح انك دعمت ابوي بسمعتك والواسطات
سكت شوي واحتد صوته : بس انا مالك ولا ريال عندي! كل شي اشتغلته بتعبي انا ودراستي انا والشركة الي تتكلم عنها انا بنيتها من الصفر! مانـ..
قاطعه ابو راكان : ولدد تكلم مع جدك زين!
لف راكان لابوه الي طلع من مكتبه : ماقلت له شي! نتناقش
تقدم يسلم ع ابوه وطلع وهو معصب وهذا الي يخليه يفطر برا البيت واحيان مايفطر!
بسبب جده الي يعتبره هو سبب تمرد مهند وغرور ابرار الوحيده الي ماتأثرت فيهم وتشبهه بكل شي هي وهج!
وخاايف لا يخربونها بعد

-
بيت الناصر
صرخ بطفش : خلاااص والله العظ...
سكت اول ماضربه ابو بندر بالفنجال: وجع علامك تصارخ هذا وانت تعبان
ضحك فارس وناظر زياد الي مسك جرحه بألم: يبه دم!
فز ابو بندر وابو زياد بنفس الوقت وضحك زياد : امزح امزح
جلس ابو بندر وهو يستغفر ومعصب وابو زياد ناظره: هذا مزح! اعقل ياولد وانت وخر عنه كله منك
فارس : هذا جزاتي اساعده!
عناد : ليتنا من مساعدتك سالمين
ابو بندر : انشهد ماغير صدعت راسنا
فارس وقف : اجل دوروا لكم احد ترسلونه
ابو فيصل: اقول امش قول لابو محمد يجيب الاغراض الي عطيته بالورقه ولو تساعده يكون خير
فارس لف للعيال: انا ابي اعرف ليه بكل مره اقول شي يطلعون لي شغل! وكأني اقولهم تراني فا..
صرخ وضحك : امزح بروح بروح
ركض وطلع ونزل ابو بندر الفنجال ولف ليزيد الي يضحك: جدّي الفناجيل خلصت وانت بس تكسرها علينا!
ابو بندر: ليه دافع من حلالك انا!
ياسر بهمس : جدي اليوم نار مدري علامه
عناد : اسكت لا يسمعك ويفصل علينا بقوم اشوف فيصل وينه مختفي
من الصباح
طلع عناد ووقف ينادي فارس الي واقف عند ابو محمد : فاارس
ناظره فارس: هلاا
عناد : فيصل وين؟
فارس: مدري من الفجر طالع مو فيه
هز راسه واتجه لسيارته وركب وطلع من البيت وهو يدوره مسك جواله يتصل عليه بس يعطيه مشغول

-
بيت ابو سعود
طلع من البيت رايح لمجلس الرجال وقف عند الباب وقبل مايفتحه
وقفه صوتها: خلف لا ياخلف
ابو سعود : علامك
ام سعود قربت منه : لا تزعجه نايم
ابو سعود بتعجب: بسم لله ازعج مين! علامك انهبلتي
ام سعود وهي تسحبه معها: اسكت بتصحيه بصوتك
جلس ابو سعود وهو يناظرها واقفه : انتي علامك ما تتكلمين مثل الناس اصحي مين!
جلست وتنهدت : فيصل
ابو سعود بصدمه : وشو فيصل نايم هنا!
ام سعود: اي والله يوم صحيت نص الليل بصلي الوتر سمعت باب البيت احسبه انت
لفت تناظر الغرفة : وشفته واقف عند غرفتهم وبعدين راح للمجلس وخليته
ابو سعود: وليه ماصحيتيني!
ام سعود ناظرته: اصحيك ليه؟ اكيد انه هاج من اهله تبي تجيه انت بعد! اتركه على راحته ياخلف
هز راسه وسكت وهو يناظر المجلس وهمس بتفكير : اخر مره نام عندنا قبل وفاة سعود بليله! وش الي رجعه
ام سعود بضيق : ليه ماودّك يرجع؟
ابو سعود: اكيد ابيه بس خايف من الي رجعه! الدنيا مارحمته يانوره وناصر ولو انه طيّب بس قسوته تغلبه
تنهدت ام سعود وسكتت وهي شايله همه ومن الفجر تنتظره يقوم ولا قام
قاطع افكارهم صوت دق الباب وفز ابو سعود يستعجل بخطواته قبل يصحى فيصل : جيت جيت
فتح الباب وناظره بضيق : عناد!
عناد وهو منحرج منه: اعذرني ياعم كل شوي جايك! لكنك ماتجهل السبب
سكت ابو سعود لثواني وناظره : وسبب جيتك ما شفته ولا هو عندي ياعناد
عناد بضيق : ياعم ادري انك شايـ...
قاطعه ابو سعود : الي بيني وبين جدك انتو مالكم ذنب فيه لا تحمل نفسك ذنب انت ما ارتكبته!
عناد : يعني مابتعلمني اذا فيصل عندك ولا؟
ابو سعود : علمتك ماشفته
دخل ابو سعود وقفل الباب وتنهد عناد وهو يمسح وجهه بضيق : حسبي الله على من كان السبب
لف اول مانفتح الباب مره ثانيه بس هالمره محد طلع له بس وصله
صوتها : عناد ياولدي انت باقي هنا؟
عناد : اي ياعمه هنا كيف حالك؟
ام سعود واقفه ورا الباب : الحمد لله انتوا الي كيف حالكم الاخبار الي وصلتني ماتسر
عناد : نقول الله ييسرها
ام سعود : بتتيسر باذن لله انا ناديتك لجل اعلمك ولاني ادري مابتعلمهم ياولدي فيصل عندنا هنا من نص الليل
عناد بتعجب : نص الليل! فارس قال لي انه طلع الفجر
ام سعود: اي يايمه قريب الفجر جانا ونايم اللحين اتركه على راحته وهو يرجع البيت بنفسه
عناد : ان شاء الله اعذريني ع الازعاج ياعمه بس ما يجي ببالي مكان غير هنا
ام سعود : معليه يايمه الله يحييك بأي وقت
قفلت ام سعود الباب وركب عناد السيارة وهو يدق على نايف : سلام.. بجيك فاضي؟... لا بخير ماعليه.. اذا جيت اعلمك
قفل منه وغير طريقه طالع من الحيّ كله