🥀زوجتي الثانية ....أرملة🥀
Aicha Mos🥀
البارت 2🥀.🥀.
دخلات للدار ولقات السلام على اهل المكان حيدات نݣابها وحطات السخرة فوق الطابلة الي حدا الباب تترجع النفس ...كبات ليها كاس الماء جرات الكرسي وجلسات تتشرب بعدما سمات الله وشرباتو على ثلاث دفعات اقتداء بسنة الرسول صلى الله عليه وسلم يلاه حطات الكاس تتحمد الله على هاد النعمة خرجات عندها ختها من الكوزينة تتمسح ايديها بفوطة صغيرة .....
سارة تتقلب فالسخرة هزات الشكلاط الي كانت باغة وجلسات تتاكل فيه بالليسر وتهضر : تعطلتي
ايمان تتشوف فيها : قولي بسم الله بعدا وكولي بالليمن من الاداب والرسول صلى الله عليه وسلم قالها فاحد الاحاديث الشريفة
سارة كلات بالليمن تتشوف فيها نطقات همس حشمانة : عليه الصلاة والسلام
ايمان بتاسمات : تعطلت شوية حيت تلاقيت واحد المراة عاونتها مسكينة كانت تالفة ...(تتقلب عينيها فالدار) فين ماما ؟
سارة شافت فيها وتنهدات : راها باقة عند السعدية كيف عادتها تدوز نهارها فالزنقة عند الجارات كون جات ملقاتكش كون حيحات تاني ....راني طفيت للغدا وغسلت لماعن الحوايج مدرتهمش فالماكينة تتعرفيني متنعرفش نخدمها ( وقفات) انا نمشي نلبس حوايجي نمشي للمدرسة
ايمان وقفات تاهيا هزات السخرة : شكرا ختي الحبيبة نبدل حوايجي ونحط ليك تغداي
سارة غادة لبيتها هي وختها : لا مبغيتش فطرت معطلة وكليت الشكلاط حتى نرجع مع 4 ونتغدا
ايمان : ان شاء الله
دخلات ايمان للكوزينة حطات السخرة الي تقداتها وغير خرجات سمعات باب الدار تحل ودخلات مها غير شافتها بغات تدخل لبيتها ولكن وقفاتها بكلامهاا
فوزية تتحيد فولارها تتشوف ف ايمان مخنزرة : متقوليش ليا يلاه دخلتي من الصباح !!! فين تعطلتي هاد التعطيلة ؟
ايمان وقفات ضارت شافت فيها تتهضر بهدوء : اه دخلت غير قبيلة كنت غادي نجي قبل ولكن عاونت واحد المراة كانت تالفة مسك..
فوزية قاطعاتها بحدة : نتي واش داروك مساعدة اجتماعية ولا شنو وقتما خرجتي تعاوني شي حد ...اربي معاوني غير راسك وحيدي دوك الدرابل وخرجي تخدمي على راسك
ايمان حنات راسها مزيرة على نݣابها بين ايديها : حنا مسل مين خاصنا نعاونو بعضياتنا
فوزية حيدات جلابتها وبقات ببيجامة طويلة وزيف حياتي وقالت باستهزاء : غتبداي تاني ديك الكاسيطة وتفرعي ليا مخي سيري بدلي دوك الدرابل وحطي لينا نتغداو فين سارة ؟
ايمان تنهدات بحزن : تتبدل حوايجها غتمشي للمدرسة
كملات جوابها ودخلات لبيتها منكسرة من كلام امها الي ديما تتجرحها وتقاطع كلامها باستهزاء وعدم اهتمام لقات ختها لبسات حوايجها وخرجات سارة مخلياها بوحدها...مشات للبلاكار جبدات بيجامتها سروال والفوقي ديالها وحطاتهم فوق سريرها لبساتهم جات خارجة وهي تلمح انعكاسها فالمراية .....ايمان عندها 27 عام بشرتها بيضة صافية وعيونها رماديين وملامحها هادئة وجميلة شكل جسمها رشيق ما غليضة ما رقيقة متوسطة الطول وشعرها اسود طويل وناعم .....تجنبات انها تشوف فراسها مدة طويلة وتغرق فافكارها وخرجات لقات ختها تتلبس طابليتها فوق سروال دجين مزير فالاسود وتيشورت فالابيض بكتابة كحلة وشعرها خلاتو مطلوق ....معجبهاش شنو شافت هضراات وهي عارفة بلي غادي وتلقا الرفض
أنت تقرأ
زوجتي التانية أرملة(متوقفة حاليا)
Romantik💍.زوجـــتـي الــتانـية أرمـلــة 💍. بعد تجربة القصة الدينية الرومنسية #زوجوني_منقبة اعود مرة اخرى بقصة جديدة وثنائية جديدة احداث جديدة #زوجتي_الثانية_أرملة ..قصة فيها من العبر الكثير ... الحياة ماهية الا دار فناء واختبار لبني البشر...
