🥀زوجتي الثانية ارملة 🥀
🥀بقلم :Aicha Mos 🥀
🥀البارت : 11🥀
الحاجة خديجة : نتي بنتها غير الله يهديها عليك بغات ليك ما حسن وخا داكشي مبيد حتى واحد فينا هو عند الله وهو الي تيتصرف ايلا مكتاب ليكم تزيدو تولدو راه غنشوفوهم اما ايلا ممكتابش راه فيها خير
سناء عضات شفايفهاا بقهر : الحمد لله على كل حال
الحاجة خديجة تطبطب عليها بكل حنان : شنو قالت ليك الطبيبة ابنتي ؟
سناء ناضت شافت فيها : كتبات ليا دواء جديد نتبعو وان شاء الله خير
الحاجة خديجة بابتسامة صغيرة : ان شاء الله ربي يفرحك ابنتي
سناء قبلات ايدها : ءامين نمشي نوجد العشاء اليوم غادي يجي عمر بكري
الحاجة خديجة : ايه الله يرضي عليك ابنتي
عند ايمان الي دخلات لدارهم حيدات النݣاب من على وجهها وتتسترجع انفاسها حيت تتمشي بخطوات سريعة ...تتسمع التلفازة خدامة فالصالون حيدات صباطها ودخلات لعند فوزية الي كانت تتنقي الجلبانة و تتفرج فمسلسل تركي منساجمة معاه
ايمان باستها فراسها : السلام عليكم ورحمة الله
فوزية بتجاهل : وعليكم السلام فين كنتي خارج بلا شوار وليت كيف الڤاز فهاد الدار !!
ايمان حطات صاكها وجبدات منو ظرف عامر فلوس : مشيت للبنكة
فوزية شافت فالظرف : ياك قلتي مبقا عندك والو !! ولا غير مبغيتي تعطينا انا وخوياا تقول غادي ناكلوك ؟
ايمان جلسات حداها : حاشة غير صيفطات ليا عبير الفلوس
فوزية : نتي باقة تتواصلي مع بنت الحاج ؟
ايمان بابتسامة : اه ظريفة ديك السيدة كلهم الله يعمر ليهم الدار
فوزية بسخرية : باين من نهار مشيتي عندهم ونتي مبدلة وجيتي ايمان اخرى ماشي الي تنعرف
ايمان : الله حطهم فطريقي باش يوريوني الحق وبلي الي كنت عايشة فيه غلط
فوزية بنرفزة : خلاص عليا متبدايش تاني .
ايمان قربات ليها الظرف : راه فيه مليون و 50 الف ريال لبغيتي شي حاجة
فوزية شداتهم مخبية فرحتها : همم راه غنرضهم ليك
ايمان ناضت : كلشي ديالك ا ماما راه مكدبتش عليك راه فعلا مكانوش عندي
فوزية تتحسب فيهم : اوا نيت محدك تتخسريهم فالخواا راه مغيبقاوش عندك
ايمان بحزن : سميتها الصدقة و الاحسان ماشي الخواا. وسيدي ربي تيعوض اضعاف مضاعفة لا مرجعوش فلوس يكونو حسنات نلقاهم غدا يوم القيامة ان شاء الله
فوزية عوجات فمهاا : باركة عليا سيري وجدي العشاء نعيط لخالك يجيي يتعشاا معانا مسكين
ايمان : فين سارة ؟
فوزية : باقي مرجعات من السوايع
ايمان خرجات مشات لبيتهاا تبدل حوايجهاا وهي تتفكر وتدعي ان الله يهدي امها عليها وينور بصيرتها ويبدل حالها لاحسن ....امها الي كانت من الاول تتشجع ايمان من زواجها بالحاج طمعا ففلوسو وبعد الزواج لقات ايمان عالم جديد و افكار جديدة ...كانت اسرة عايشة على اسس الدين الطمأنينة متتفارقهمش ...والخير من كل جيه متدفق عليهم....صلاة الفجر يصليوها مجموعين والحجاب على كل نساء العائلة ...الاحترام والمودة والرحمة بينهم كاملين
ايمان الي مفهماتش هادشي وجاتها صعيية دغيا تبدل روتينهاا وشخصيتهاا واسلوب لبسهاا ولكن شوية بشوية لقات الطريق الصحيح و عرفات الله حق المعرفة ولقات هي كذلك تلك الطمأنينة والسعادة جوار الرحمان
الحاج الذهبي الي كان الزوج والاخ والاب بالنسبة ليها ...وخا فالاول مفهماتش علاش بغا يتزوجها هي الي صغر منو بزاف ولكن هو مدارش شي حاجة حرام ...هو مزوج قبل منهاا بام اولادو ولكن المرض هلك جسمهاا وخلاها متقدرش تقوم بيه وبواجباتهاا تجاهه هو الي مخلاهاش ومفرطتش فيها وبقا مساندها ماديا ومعنوياا...وخوفه من الحرام خلاه يتزوج المرة الثانية ب ايمان ....لكن بعد عامين توفى خلى موراه مال وبنين و زوج زوجات تيدعيو معاه بالرحمة حيت فعلا كان نعم الزوج والاب رباهم على حب ومحبة الله ...وعايش طول حياتو على اسس الشريعة الاسلامية ...الانسان خطاء وخير الخطائين الثوابون ...ربي رزقه مال كثير ودار فيه البركة فالاحسان والصدقات الي تيصدق لوجه الله تعالى
#يتبع
أنت تقرأ
زوجتي التانية أرملة(متوقفة حاليا)
Roman d'amour💍.زوجـــتـي الــتانـية أرمـلــة 💍. بعد تجربة القصة الدينية الرومنسية #زوجوني_منقبة اعود مرة اخرى بقصة جديدة وثنائية جديدة احداث جديدة #زوجتي_الثانية_أرملة ..قصة فيها من العبر الكثير ... الحياة ماهية الا دار فناء واختبار لبني البشر...
