🥀زوجتي الثانية...أرملة🥀
Aicha Mos🥀
الجزء :3 🥀
. .
فبلاصة خرا وعند عمر فالمحل دخل الحاجة خديجة للمكتب ديالو داخل المحل الي كانو فيه الناس تيتقداو
الحاجة خديجة الي كانت فاواخر الخمسينات من عمرها دات الجسم و الطول المتوسطين ....كانت ملامحها زوينة ولو انه كان غالب عليه الزمن ولكن كيف كيقول المثل كيمشي الزين ويبقاو حروفو
بدات تتخوي الݣفة الي جايبة فوق الطبيلة الصغيرة الي كانت من الزاج لونها اسود محطوطة بين الفوتويات الي بدورهم كانو فاللون الاسود ....فوسط المكتب .حطات طبسيل وجبدات طنجية صغيرة باااقة سخووونة كباتهاا فالطبسيل منظرها تيشهي وشلاضة فسوبيرة صغيرة من الزجاج والخبز ديال الدار بالقمح الكامل قطعات طريفات الخيز وجلسات حدا ولدها
الحاجة خديجة (طبطبات على فخدو وقالت بحنان ): بسم الله اولدي الحبيب كول غتكون مايت بالجوع
عمر تيشوف فالفوار الي طالع من الطبسيل باس ليها على راسهاا بكل حب وبر : تبارك الله علاش عذبتي راسك معلمتينش اما نجي نجيبك من الدار
الحاجة (حطات ليه معلقة صغيرة قدامو ) : مكاين لا عذاب لا والو اول مرة نجي للمحل ومنها نيت نتغدا انا وياك
عمر ب( بدأ كياكل) : بسم الله ...الله يحفظك لينا الحاجة ويطول فعمرك يارب
الحاجة خديجة ( تتشوف فايدو الي فالطبسيل مدات ليه اللحم ) : امين الغالي كول هادي
كملو غداهم فجو عاىلي جميل وسعيد جمع الطلبة وبقاو بقايا من الديسير ...برتقال والموز والكيوي فالطبسيل الصغير فوق الطبلة ....وصيفط على كأس اتاي من احد المقاهي الي حداه وجلس مقابل مع الام ديالو تيشوف فايديه بتركيز وبتوتر
الحاجة خديجة : عمر شنو عندك الوليدي قول ليا ؟ ياكما شي مشكل فالخدمة ؟
عمر ( هز راسو فيها وبتاسم من ديما تتعرف اش بيه غير من الشوفة ) : لا ماشي الخدمة موضوع اخر بغيت نستشيرك فيه
الحاجة خديجة ( تتشوف فيه بتركيز ) : مرحبا قولي
عمر ( بلع ريقو ونطق بصوت شبه خافت ) : انا بغيت نتزوج
الحاجة خديجة ( بملامح متفاجئة ) : علاش اولدي ياك مزوج بنت عمك سناء الله يعمرها دار عمرنا شفنا منها العيب وبينكم ولد الله يحفظو ويصلحو ؟
عمر ( حنى راسو وقال بصوت حزين ) : ءامين يارب ...سناء ونعم الزوجة وعمري نفرط فيها ولكن نتي عارفة من مور عبد اللطيف ب 5 سنين رزقنا الله بولد او بنت اخرى
الحاجة ( ناضت جلسات حداه وحطات ايدها على ظهرو بحنان ) : الولاد اولدي سيدي ربي الي تيعطيهم صبرو وسيدي ربي يرزقكم ان شاء الله
عمر بابتسامة حزينة سكت للحظات بحال تيتفكر شي حاجة وقال : ءامين يارب العالمين ...ولكن انا باغي نتزوج الحاجة
أنت تقرأ
زوجتي التانية أرملة(متوقفة حاليا)
Romansa💍.زوجـــتـي الــتانـية أرمـلــة 💍. بعد تجربة القصة الدينية الرومنسية #زوجوني_منقبة اعود مرة اخرى بقصة جديدة وثنائية جديدة احداث جديدة #زوجتي_الثانية_أرملة ..قصة فيها من العبر الكثير ... الحياة ماهية الا دار فناء واختبار لبني البشر...
