زوجتي التانية أرملة(متوقفة حاليا)

24

🥀زوجتي الثانية ارملة 🥀
🥀كتابة Aicha Mos 🥀
🥀البارت 24🥀

سناء شافت فيها : لا اختي نتي دخلتي لقلبي سامحيني على سؤالي ليك بديك الطريقة ولكن الغيرة فطرة فينا وانا مستاعدة لهادشي ولشنو جاي فالمستقبل ربي يجازيني على صبري خير

ايمان مدات ليها كلينكس : عارفة  الي كاين اختي ولكن راه انا والله مبغيت ليك الضرر لو بغيتي نرفض نرفض الله يسر ليكم

سناء بتاسمات بحزن : كيف قلت ليك لو متكونيش نتي غتكون وحدة اخرى ...انا الي اصريت عليه يتزوج وهذا شرع الله والمقصد ديالو من الزواج للمرة الثانية مبغيتش نخليه فقلبوو عمر الله يعمرهاا دار زوج ونعم الزوج

ايمان تتسمع ليها وتتشوف فيها ~

سناء شافت فعينيها : انا موافقة تكوني ضرتي ...والي بغيتهاا ليا نبغيها ليك من الخير والله يكمل عليكم بالخير لو كنتي نتي موافقة عليه اكيد اختي

ايمان قلبها تيضرب بجهد : انا مزال مخديت قراري اختي ولكن الله يكبر بيك ويرزقك ما تتمناي ولو منكونوش ضريرات نكونو صديقات

سناء بتاسمات بحنان : ان شاء الله

ايمان وقفات : نخليك اختي دابا الله يسر ليك امورك ويحفظ ليك وليدك ويرزقك الذرية الصالحة يارب

سناء ناضت عندها سلمات عليها : امين سمحيلي لقلقتك انا ماشي هكاك غير الشيطان

ايمان : عارفة الي كاين ختي....السلام عليكم ورحمة الله وبركاته 

سناء بتاسمات بحزن : وعليكم السلام ورحمة الله وبركاته

تمشات ايمان فاتجاه باب الريسطو تخرج قلبها نبظاتو غير مرتبين كيضرب بجهد ...معرفاتش واش تقدم وتقبل او لا معرفاتش شنو دير ...خرجات وقفات جبدات تليفونهاا تصوني لخالهاا ....فحين عمر الي فسيارتو غير لمحها خرج من سيارتو ووقف تيشوف فيهاا عند بالو خرجات هي وسناء فنفس الوقت ولكن كانت غير هي .....ايمان رجعات تليفونهاا فساكهاا تتقلب على خالها الي قاليها بلي قريب يوصل بالطاكسي حتى شافت عمر مقابل معاهاا حنات راسهاا ومطولاتش فيه الشوفة  حيدات من البلاصة الي كانت واقفة فيهاا حتى وقف حداها الطاكسي الي كان فيه سالم ركبات للور ونطالق ....

عمر بقا تيشوف فيها حتى هبطات عينها وهو بدورو حيد نظراتو عليهاا هي مزال ماشي حلاله ومزال متتربطو بيها حتى علاقة اي نظرة فوق النظرة الاولى تقدر طيحوو في ما لا يحمد عقباه

شاف سناء خارجة تاجه لعندهاا بتاسم ليهاا وعينيه عليهاا باين فيها كانت تبكي قوس حواجبوو بعدم فهم

عمر : واش كنتي تتبكي ؟؟!

سناء : لا غير حكيت عيني معرفتش شنو دخل لي فيهم

عمر غادين فاتجاه السيارة : كيف كان اللقاء

سناء عضات على شفايفهاا : عادي

عمر حل ليها باب السيارة حتى ركبات وركب هو الاخر ضار تيشوف فيها : شنو قلتو ؟

سناء متتشوفش فيه : غير هضرة عادية د التعارف

عمر شافها تتهضر ناقص قرر يخليها علل خاطرها : مزيان نمشيو لدار ولا بلاصة اخرى ؟

سناء : لا غير دار توحشت عبد اللطيف

عمر خدم الطموبيل : اللهم يسر

كملو طريقهم فصمت غرييييب حتى واحد مهضر...سناء تتشوف غير قدامهاا دماغهاا تيفكر فالف فكرة وفكرة ...اما عمر مرة مرة تيلوح عينو عليها معرفش شنو وقع بيناتهم وواش البنت غتوافق او لا ولكن يمكن مبقاش معمر راسو بهادشي قدماا شاطنو سكوت سناء ..عارف بلي هادشي مساهلش عليهاا ولكن عطاهاا خيار انهاا ترفض وينساو الموضوع وهي وافقات وحتى دابا مبقاش الوقت للتراجع حيت هضرو مع البنت واهلهاا ؟؟ اكيد لو رفضات هذيك هضرة اخرى.......