زوجتي التانية أرملة(متوقفة حاليا)

البارت6

🥀زوجتي الثانية ارملة🥀
🥀بقلم :Aicha Mos 🥀
🥀البارت : 6 ،🥀

اما سناء الي دخلات للحمام الي فغرفتها تغسل وجهها ...حلات الروبيني وهزات راسها فالمراية تتشوف انعكاسها وعيونها الحمرين الي نزلو منهم دموع حزن وقهر جرحها بكلامو وباقتراحو...هي عارفاه بلي مغاديش يعاود يجبد معاها الموضوع محدها قالت لا ولكن غير فكرة انه فكر يتزوج مرأة اخرى تتقتلها من الداخل ...الغير فينا فطرة ويمكنش تمشي او تحيد ببساطة ....هي تتبغيه بزااف اول حب والاخير ...زواجهم كان تقليدي قلبها وقلبو كانو كاهرين عمرهم جربو الحب فالحرام وحافظو على قلبوهم نقية لشريك حياتهم ....بغااتو هو الي ولد عمرهاا الي صانها وبغاها و عاونها على نفسهاا وشد بايدهاا

كل وحدة عارفة راجلهاا وهي اكيد حافظة عمر ماشي غير تتعرفوو انسان عندو الدين فالمقام الاول فحياتو عاد تيجيو امور خرين .. ماشي متشدد ولكن كيفهم الدين بالطريقة الصحيحة ويحاول يطبقو كيف انزل لابد كيغلط والانسان ماشي محروم من الغلط .....عارفاه مفكر ايتزوج اوا وكاينة شي حاجة !!!.....عارفاه قداش باغي يكونو عندو ولاد مكتار ويطلب الله ديما انه يرزقو ولاد وبنات صالحين مهدييين يوريهم الدين ويكون فخور فيهم ويكونو صدقة جارية ليه الا يوم الدين ....عارفاه غادي يعدل بينها وبين الزوجة الثانية ومستحيل يفرط وغادي يكون حريص على هذشي ولكن هي خايفة لتكون هي الي متقدرش ومتستحملش ....صعيبة بزاف هاد الفكرة

غسلات وجههاا وخرجات تتمسح وجهها برفق ...استعاذة من وساوس الشيطان ومشات فاتجاه سجادة الصلاة لبسات عبايتها وتقاشرهاا وحجابهاا  قادات السجادة فموضع القبلة واقامت الصلاة .....حتى حاجة متتهدأها من غير الصلاة

دخل عمر لقاها ساجدة بتاسم بحنان وتذكر حديث حيت
قال صلى الله عليه وسلم: ألا أخبرك بخير ما يكتنز المرء؟ المرأة الصالحة؛ إذا نظر إليها سرته، وإذا أمرها أطاعته، وإذا غاب عنها حفظته. رواه أبو داود والحاكم وقال: حديث صحيح الإسناد

وهنا شاف سناء وفرحو منظرهاا وهي تتصلي  وكذلك ملي تتكون نقية ولابسة مزيان ومتزينة ليه ..وحتى ملي تتكون تتقرا القرءان او كتب السنة او حتى رواية او كتب تقافية

في كل حالاتهاا غير ؤشوفها يفرح بشكلها ومنظرهاا ووجودها معاه ...دخل للحمام دوش ولبس حوايجو ديال النعاس وتخشا فسريرهم ...هز التليفون عمر الساعة على ميقاث صلاة الفجر وبقا تيشوف فيها هي الي مزال تتصلي قيام الليل ....حتى داه النعاس

اما سناء كملات صلاتها ودارت الدعاء وحيدات عبايتهاا ومشات لسريرهم لقاتو نعس بتاسمات بحنان وغطاتو باستو جنب فموو

سناء بحنان  وبوصت منخفظ : تصبح على خير حبيبي

وبدورها تخشات حداه طفات انوار الغرفة وعنقاتو وستسلمات للنوم تمنع نفسها تفكر فالموضوع الي حرق قلبهاا ....

فاليوم الموالي فاقت سناء لقات عمر خرج كيف عادتو مشى يفطر فالمحل مع الي خدامين عندو .....شافتو  ملي صلاة الفجر وهو كعادتو كيمشي للجامع الي حداهم كل يوم وبدون انقطاع هي تتصلي وتقرا شوية قرءان وترجع تنعس ....

كانت 8:30 دارت روتينهاا لبسات قفيطين عادي وبسيط وشعرها جمعاتو على شكل كعكة مهملة ودارت من عطرها وكحل فعينيها فقط وخرجات من بيتها بعدما جمعاتها ...دخلات بيت ولدهم عبد اللطيف فيقاتو بكل حنان الي بدورو فاق نشيط وبسعادة غسل وجهو وبدلات ليه حويجاتو وجمعات معاه البيت ديالو وحلات الشرجم تتنفس البيت وتدخل اشعة الشمس الصحية

هبطو لقاو الحاجة خديجة على طاولة الفطور ...سلمو عليها وجلسو تيفطرو. سناء تتحط ل عبد اللطيف شنو تشهى من خبز مسمن وفرماج

الحاجة خديجة : ولدي الحبيب عطيه يشرب الحليب

سناء بابتسامة : وخا اخالتي 

الحاجة خديجة :معاش رجع عمر لبارح نعست مسمعتوش ايمتا دخل

سناء تتحرك كاس الحليب الي دارت فيه شكلاط بودر : جا جوايه الوحدة

الحاجة خديجة : ايه ...وعبد اللطيف فاتو السخانة شوية

سناء تتشرب اتاي : الحمد لله فاتو الحال لعشية يمشي للمدرسة نعيط ليهم باش يدوز عندو الطرونسبور

الحاجة خديجة : ان شاء الله ونتي عندك الطبيبة ليوم ياك ؟

سناء : اه غنمشي دابا شوية

كملو فطروهم فهدوء والحاجة لاحظات ان سناء مرة مرة تتسهى عرفاتها تتفكر فموضوع الزواج مقدرات تقوليها والو وتخليها على خاطرها

#يتبع