زوجتي التانية أرملة(متوقفة حاليا)

27

  🥀زوجتي الثانية ارملة 🥀
🥀كتابة Aicha Mos 🥀
🥀البارت 27🥀

سناء تخلعات وسدات الروبيني دغيا ضارت تتشوف فيها بدهشة. واحراج : سمحيلي سهيت

الحاجة خديجة قربات عندهاا  حطات ايدها على كتف سناء بحنان : مالك ابنتي غير ساهية ؟

سناء : والو اخالتي الله يلعن الشيطان

الحاجة خديجة : الله يلعنو ويخزيه اش بيك عاوديلي

سناء شافت فيها : عقلي غادي يتفرگع بالتفكير اخالتي هاد القرار الي خديت صعيب علياا بزاااف نتي عارفة معزت عمر عندي مكنقدرش نستوعب ان وحدة اخرى غادي تشركني فيه

الحاجة خديجة جلساتها فوق الكرسي : اعوذ بالله من الشيطان الرجيم ابنتي راه عادي تحسي هكا ولكن صافي حاولي تنساي الموضوع وخا صعيب ولكن صافي دابا الموضوع خرج من ايدك عمر مشى خطب مبقا رجوع ايلا اذا رفضات البنت ...صبري ابنتي وعند الله اجرك كبير

سناء زيرات على قلبهاا دموعها على طرف عينها : عارفة يارب ترزقني الصبر يااارب

الحاجة خديجة : ديري يقينك بالله ونوضي صلي شي ركعات طلبي الله يخفف عليك ما بيك ويرزقك الصبر

سناء هزات قرعتهاا وباست راس الحاجة وخرجات ~

الحاجة خديجة تبعات ليها العين حتى خرجات وتندات بحزن : الله يدير ليكم الي فيها الخير ياربي

~~~~
ناعسة سناء واخيرا بعد محاولات كثيرة انها تنعس ...ماهي الا لحظات حتى غرقات فالنعاس وبدات تشوف راسهاا فحلم ...كانت فبيت فالمستشفى واقفة قدام سرير شي مرأة مشافتش وجههاا حاطة حداهاا طفل صغير حديث الولادة ...سمعات المراة تتقوليهاا "هزيها"

هبطات بشوية دكرات اسم الله وهزات الرضيعة بين ايديهاا دموعهاا دغيا طاحو على خدودهاا وقلبها غادي ينفاجر بالفرحة تتشوف فوجه الطفلة البريئ ~~~

فاقت من حلمهاا على صوت عمر تيفيقهاا لصلاة الفجر ...قلبهاا تيضرب وحاسة براسهاا فرحانة وجه الطفلة الصغيرة مرسوم قدام عينيهااا ...

عمر : سناء مالك

سناء بتاسمات : والو غير كنت تنحلم

عمر : شنو حلمتي ؟

سناء ضحكات : حلم زوين

عمر كيشوف فيها فرحانة : الله يجعلو خير ..نوضي تصلي ورجعي نعسي البارح منعستيش بكري

سناء بابتسامة : غير مبغاش ليا النعاس

عمر طبع قبلة حنينة على جبهتها : انا غادي للجامع

سناء : الله يسر ليك

خرج عمر من الغرفة متاجه للمسجد كيف عادته ....اما سناء حاطة ايدها على قلبهاا حاسة بفرح عجيب وبسعادة مليها مثيل ...ناضت بحماس صلاة الفجر والصبح وبقات تتقرا القرءان كملات وهي ترجع لسريرهاا مغمضة عيونهاا وتتبتاسم ملي تتذكر وجه الطفلة معرفاتش شكون امها حيت مقدراتش تشوف وجهها ولكن وجه البنت الملائكي البريئ محفور فذاكرتهااا ...

بعد عدة ايام كان عمر فالمحل ديالو ملاهي مع السلعة والكليان حتى كيسمع صونيت تليفونه ... كانت نمرة سالم خال العروس جاوب ...

عمر بصوته الرجولي الرزين : السلام عليكم ورحمة الله وبركاته

سالم : وعليكم السلام ورحمة الله السي عمر لاباس عليك

عمر : الحمد لله فين نعمة وانت العاىلة اجمعين امورهم بخير

سالم : الحمد لله بخير ...عيطت غير نقولك البنا وافقات ووقتما جيتو مرحباا بيكم

عمر قلبه رفرف : ان شاء الله حتى نحدد مع الحاجة الموعد ونتاصل بيك

سالم : اللهم يسر

قطع معاه وابتسامة صغيرة ترسمات على شفايفه حمد الله الي يسر ليه اموره ...ايمان الي غادي تولي زوجته الثانية البنت الي يتمناها اي شخص عاقل ..بنت دين وخلق وجمال ...غير طريقة كلامهاا تأسر القلب وعيونهاا الجميلة الي مرة مرة تيتفكرهم 
#يتبع