زوجتي التانية أرملة(متوقفة حاليا)

البارت 23

🥀زوجتي الثانية ارملة 🥀
🥀كتابة Aicha Mos 🥀
🥀البارت 23🥀

واقفة قدام الريسطو الي غادي تلاقا فيه مع الزوجة الاولى للخطيب الي تقدم ليهاا "عمر " ...لابسة جلابتها الواسعة باللون الاسود وحجابها بنفس اللون ونݣابهاا المغربي صاك صغير دايرة فيه بزطامهاا وتليفونهاا...جا معاهاا خالها بالطاكسي ورجع لخدمتو ...دخلات للريسطوو كان شبه عامر كانت لعشية ....معرفاتش واش وصلات سناء او لا حيت عمرها شافتهاا ولكن تتعرف عمر 
بقات تتقلب بعينيهاا وتتمشي بخطوات صغار حتى بانليهاا جالس مع سناء فاحدى الطاولات الي مدرقين بالحيط ...استجمعات شجاعتهاا وتمشات ناحيتهم  عينيهاا على المرأة الي جالسة قدام عمر !! مركزاتش فيه هو الشوفة قدماا مركزة مع سناء ...كانت لابسة عبايتهاا المحتشمة وحجابها ولا نقطة مكياج ولكن ملامحهاا زوينين ميحتاجوش تجميل ...عيونهاا البنية وابتسامتهاا الصغيرة ونظراتهاا لزوجهاا عمر !!
ضرب قلبهاا وهي تتشوفهم تيتبادلو الابتسامات حاسة براسها غادي تكون دخيلة عليهم ...فكرتت للحظة انهاا ترجع ادراجهاا وترفض بلا متشوف لا زوجة اولى لا تا حد !!  وتطلب الله يرزقهاا زوج صالح ....ولكن ترددات  معرفاتش شنو وقفهااا يمكن تفكيرهاا بلي معندها متخسر  توكلات على الله وكملات خطواتهاا حتى وقفات على مقربة منهم

ايمان  : السلام عليكم ورحمة الله

عمر وقف عرفها هي غير من صوتهاا هز عينو فيهاا وشاف ملابسهاا المحتشمة والغير ملفتة للنظر ...مشاو عيونه لعينيهاا ولكن هي مكانتش تتشوف فيه عينيها فالارض  نعل الشيطان ونحنح وقال بصوته الهادئ : وعليكم السلام ورحمة الله

سناء نظراتهاا على ايماان تتفحصهاا بكل دقة ملابسهاا وكلشي فيهاا مرة عينيها على الي تقدر تكون الزوجة الثانية ومرة على عمر الي شافتوو هبط عينيه للارض كيتجنب يشوف ف ايمان  : وعليكم السلام ورحمة الله وبركاته

عمر بعد من الكرسي : انا نخليكم تاخدو راحتكم (شاف فسناء وغمز ليها ) انا براا غنتسناك

سناء عينيها فعينيه :ان شاء الله

عمر تمشى خارج وعقله عندهم وصى الريسطو عليهم  وخرج تيتسنا فالطموبيل ...عقله خداام وغير تيفكر فلقائهم وتمنى من الله ان ينسجمو مع بعض حيت فعلا جاته ايمان بنت الي الله يعمرهاا دار وماشي د المشاكل دماغها كبير و تتخاف الله واي احد يتمناها زوجة ليه ...جبد كتاب من الكتب الي تيحطهم عنده فالسيارة ..جبد كتاب "الرحيق المختوم " ولو قرأه مرات عديدة ولكن كتاب لا تمل منه

جلسات ايمان قدام سناء هزات فيها عينيهاا : ختي لاباس عليك امورك بخير

سناء حاسة بقلبها تيغلي وكارهة الجلسة هادي الي قدامهاا راه غتشرك معاها راجلهاا الي تتبغيه اب ولدهاا ...نعلات الشيطان الي تيوسوس ليها وجاوبات : لاباس الحمد لله ونتي

ايمان مركزة على ملامح هاد الانسانة الي قدامها متقدرش تقول حاسة بيها وبلي هادشي الي كيديرو فيه ساهل عليهاا ولكن هاد اللقاء هو الي غادي يحدد بزاف د الحاجات : الحمد لله يسول فيك الخير

سكتوو بجوجات معرفو اش يقولو وحدة تتشوف فالاخرى...هزات سناء عينيهاا تتشوف فايمان الي تيبان من وجهها غير عيونهاا الرمادية  ..نبض قلب سناء وهي تتشوف هاد العيون الجميلة سبحان خالقهاا هي عارفة بلي الله خلق عيون بالوان مختلفة ولكن تجربة انك تشوف شخص بلون عيون مختلفة غريبة وعجيبة ...قالت فنفسهاا هي ماشي بحالي هي زوينة عينيهاا تيفتنوو اكيد غادي يعجبو عمر !؟

بعد لحظات من الصمت نطقوو فنفس الوقت

سناء : واش عجبك عمر ؟
ايمان : واش موافقة على زواج راجلك ؟

غير سمعو اسئلة بعضهم تصدموو وسكتو تاني بدقة سناء هبطات راسهاا تتزير على ايديهاا قلبهاا تيضرب بجهدد

ايمان تتشوف فيهاا ملامح وجهها دغيا تيفرشو سناء باينة معاجبهاش الوضع : ختي انا جيت غير باش نسمع منك انت ال موافقة انا مبغيتش ليك الضرر انا بحالي بحالك ومنهدمش دارك 

سناء تتشوف فايديهاا والدمعة وسط عيونها :  انا سولتك واش عجبك ؟ عمر ؟!

ايمان بتسائل : من ناحية اش ؟

سناء هزات فيها عينيها : زينو فلوسو طموبيلتو !! اي وحدة تتمناه

ايمان عينيها فعينين سناء : ختك هادشي كامل معندو حتى شي منفعة لو كان ناقصو الدين والخلق الرسول صلى الله  عليه وسلم قال. ﷺ:«إِذَا جَاءَكُم مَنْ تَرْضَوْنَ دِينَهُ وَخُلُقَه فَزَوِّجُوهُ 
الدين والخلق هوما الي مهمين فاختيار الزوج والمال ضروري ولكن ماشي هو الاساس

سناء بحرقة : اذن نتي موافقة

ايمان : ختي انا جيت نشوف واش نتي موافقة ولكن باين الجواب هو لا (وقفات ) وكيف قلت مغاديش نهدم دارك وسعادتك الله عليكم عليكم بالخير

سناء : لو مكنتيش نتي غادي تكون وحدة اخرى المشكل مني منقدرش نجيب ليه لاولاد الي تيحماق عليهم والي باغي يكونو نفع للامة الاسلامية

ايمان رجعات جلسات بقات فيها : شنو قالو ليك الاطباء اختي

سناء الدموع هبطو ليها : كيعطيوني دوايات حتى كتاشفنا بلي هو عنده مشكل ويقدر يكون عقيم

ايمان غير تتسمع ليها معرفات باش تجاوب ~

سناء : هو بعدا الدوا عطاه نتيجة انا مزال حتى امل مبان

ايمان شدات ليها ايدهاا : ختي ديري يقينك فالله وطلبيه هو وحتى حاجة مصعيبة عليه غير امتحان وابتلاء الله يفرج همكم ...هو قال نتي موافقة يتزوج ؟

سناء دموعها سايلين شافت فايد ايمان فوق ايدها كانت لمسة حنونة : انا وافقت حيت تنشوفو قداش هو محروق من هاد الجانب باغي ولاد كتار

ايمان : عاودي هضري معاه اختي والله يفرحكم فالقريب انا غادي نرفض

#يتبع