من عيون الناس يا نجد اسرقيني

٣

مرت الايام و تجهزت نجد لعرسها اللي بقى له يوم
هي الحين ما تدري وش شعورها تجاهه لو سألها ابوها واخذ بشورها اكيد انها بترفض لكن بالعكس ابوها اجبرها وباعها له بدون شورها ما تبي تكرهه لانه ابوها

يوم الاربعاء
(العشاء مجلس الرجال)
بعد ما تعشوا الرجال قام ابو عايض و ابو عقاب ينامون
خالد: ليه احسك تبي تتزوج صدق
ناظره عقاب وقال: وش تبيني اسوي انت تدري اني ما اقدر أوقف في وجه جدي و فالاخير ابتزوج ابتزوج انا شفت فرحة أمي ورغبتها في زواجي ما بي اكسرها
خالد: تبي الصدق ، تقبل الموضوع وحاول انك تتعايش مع ذا الوضع لانه خلاص بتصك الثلاثين وانت إلى الحين لا زواج ولا اولاد ترا ادري ناس عمرهم ٢٥ وعندهم اولاد
ضحك سطام وقال: ورى ما تتزوج انت ترى عمرك ٢٦
خزه خالد وقال: لا انا انتظر بنت ناس واجاود
ضحك سطام ووجه كلامه لعقاب: بتاخذ اجازة
جاوب عقاب بهدوء: اكيد
غرفة البنات
نجلاء: طيب انا الحين البس ذا ولا ذا
ليان : احس الأحمر احسن ابسألك ما شفتي تلفوني
نجلاء: خلاص بلبس الأحمر ، اظن شفته بالجلسة برا
ليان: بتنامين
نجلاء: ايه والله تعبت ما غيرنا نروح السوق نرجع من السوق رجليني وجعوني
خرجت ليان من الغرفة واتجهت للجلسة الخارجية
ليان: يا ويلي وين حطيته
بحثت ليان عن التلفون ما لقته واتصنمت مكانها من سمعته يقول: تبحثين عن ذا
لفت ليان و ارتاحت من شافته صاد : ايه ممكن تحطه في الارض عشان أخذه
استغرب سطام من صوتها حس انه سمع ذا الصوت قبل : مين انت
ليان: وش تبي فيني
ناظرها سطام وعجز انه يتكلم هو الحين يشوفها قدامه ببجامتها الحرير رافعة شعرها كان منظرها بسيط لاكنها كانت تاخذ العقل هنا تذكر سطام البنت الي شافها في المجلس وقال: انت اللي كنت ذاك اليوم بالمجلس
ركزت فيه ليان وتذكرته وقالت بحدة : لا تغير الموضوع حط التلفون في الارض وخلني اروح
ناظرها وقال: قولي من انتي بعدين تاخذينه
خافت ليان من انه يعلم عقاب ولا ابوها من اسلوب تكلمها معه وقالت بهدوء: انا ليان اخت عقاب تكفى حطه ما بي يخرج احد ويشوفنا
حط سطام التلفون والتفت يخرج من بيت الجد وضاح متجه لبيته
بيت ناصر
(في غرفة ناصر)
احلام: وش فيك يا ناصر لك يومين وانت ساكت ما غير تهوجس
ناصر بهدوء: والله مدري يا أحلام احس اني غلطت في اشياء كثيرة
احلام بدا يدخلها الشك وقالت: وش الشي اللي غلطت فيه يا ناصر لا تخوفني
دمعت عيون ناصر وقال: احس اني ظلمتكم معي يا أحلام ما اقدر اكمل على ذي الحال
قربت منه احلام وقالت: وش فيك يا ناصر قولي
بدت عيون ناصر تدمع ويقول بغصة: ندمت يا أحلام ندمت ندمت اني عيشتكم في ذي الحال لسنين ندمت على معاملاتي معكم دايما اشوف كيف تحاولون تغيروني لكن الغالب الله وحالة ملاذ اللي اتدهورت بسببي و إجباري لنجد انها توافق على عقاب ااااخ يا احلام وش اقول حتى الكلام مو راضي يطلع
بكت احلام بكت لأنها واخيرا سمعت الكلام اللي كان ودها تسمعه من زمان تدري انه يحبهم لكن ما تدري ليه يعاملهم بذي الطريقة شافت في عيونه الندم قالت وهي تمسك يدينه: من زمان يا ناصر وانا ودي اسمع ذا الكلام مابكذب عليك يا ناصر لكنك غلطت في حق بناتك وبكرا زواج بنتك وهي مغصوبة عليه
رد ناصر بغصة : والله اني آسف مدري وش كان فيني وانتِ بالذات آسف آسف لاني ظلمتك معي ما راعيت حقك آسف على الكلام اللي كنت اقوله لك والله اني احبك يا أحلام
قال كلامه الاخير وقربها منه يضمها وهو يقول: مدري اذا البنات بيسامحوني ولا لا
ردت أحلام بهدوء تحت خجلها: بيسامحونك يا ناصر اذا صارحتهم بمشاعرك و حسستهم انك جنبهم
قام ناصر وقالت احلام: وين رايح
رد ناصر: ما اقدر اصبر وبناتي شايلين بخاطرهم مني
بروح لهم
ضحكت أحلام بخفة من شافت حماسه وكيف انقلب حاله،، ناصر اللي تشوفه الحين ابد مو نفسه القديم
(غرفة البنات)
الجود: يا بنات انا بطلع انام تصبحون على خير
خرجت الجود من الغرفة والتفتت للعم ناصر اللي قال: البنات صاحيين
ردت الجود: ايه يا عمي
هز راسه ناصر ودق الباب
ملاذ منسدحة فوق السرير : مين يدق
نجد: ما ادري ماما ما تدق الجود ما تدق اظن محمد
قامت نجد وفتحت الباب واستغربت وجود ابوها خافت من انه صار شي قالت: فيك شي يا يبه
رد ناصر: بتخليني قدام الباب
نجد: استغفر الله حياك يا ابوي
دخلت نجد ودخل وراها ناصر شافته ملاذ وعدلت جلستها وقالت: في شي يا يبه
جلس ناصر جنب ملاذ حط يده فوق السرير وقال: اجلسي يا بنتي
جلست نجد تحت استغرابها هي وملاذ وقال ناصر وهو ماسك يدينهم و يحاول يمسك دموعه : آسف يا بناتي والله اني آسف على كل شي سويته لكم، الله يشهد على كلامي اني ندمت على كل كلام وكل فعل سويته لكم والله لي يومين مو قادر انام زين دايم ما اتذكر كلامي لكم و قسوتي عليكم والله اني احبكم يا ابوي ما ادري وش كان فيني طالبكم تسامحوني
انصدموا البنات من ابوهم ناظروا في بعضهم كأن الوحدة تقول للثانية انت تسمعين اللي اسمعه وجهوا نظرهم لابوهم اللي منزل راسه أسرعت ملاذ تضمه وهي تبكي بشدة
شد عليها ناصر وقال : آسف يا بنيتي آسف تكفين سامحيني والله ان قلبي معورني على حالك الله يشهد على ندمي يا بنتي
ردت ملاذ بغصة : والله اني مسامحتك يا ابوي دامك ندمان واعترفت بغلطك مسامحتك بس تكفى اوعدني انك تتغير
قبل ناصر جبينها وقال: والله يا بنيتي اني ندمان واللي تبينه ابشري به
التفت ناصر لنجد اللي تبكي وقال: قربي يا بنتي قربي
قربت منه نجد وضمته بقوة وقالت: يا يبه ذا انت
ضحك ناصر وهو يمسح على شعرها وقال: انا آسف يا بنتي على كل شي سويته لك واجباري لك على ولد عمك اذا تبين من الحين نكنسل كل شي فقولي يا بنتي ولا تخافين
ابتعدت نجد من ابوها وقالت بعد تفكير: دامك يا يبه راضي وفرحان بذا الزواج فما بمنع نصيبي
رد ناصر: والله يا بنتي عقاب رجّال والنّعم فيه بيحفظك ويصونك وما يأذيك مثلي
ردت نجد وهي تمسك يدين ابوها: لا تقول كذا يا يبه
خلاص الي صار صار ودامك جيتنا تبي تفتح صفحة جديدة ما بنردك
ضمهم ناصر وباس ريوسهم وقال:مدري وش كان معمّي عيوني حتى ظلمتكم وأذيتكم
ملاذ: خلاص يا يبه لا تفكر فالماضي حنا الحين نبي اب حنون علينا يحفظنا ويصوننا تعوضنا على اللي فات ولا
ضحك ناصر وقال: من اليوم بتشوفون الاب الي تبونه ،، واي شي تحتاجونه انا موجود بس احتاج ثقتكم فيني
باسوا البنات راسه وقالت نجد : الحين اقدر افرح في عرسي بكرة
ضحك ناصر وقال: والله اني متحمس يا بنيتي،، بخليكم تنامون الواضح انكم تعبانين
ملاذ: والله ما كذبت يبه تعبتنا نجد وهي كل يوم في محل
ناظرتها نجد وقالت: تسمع يا يبه وش تقول
ضحك ناصر و قال: يلا يا بنات ناموا ترى لازم تقومون بدري
نجد: تصبح على خير
خرج ناصر وهو مرتاح اول مرة يحس بمثل ذا الشعور يحس انه شال هم كبييير على ظهره
ولأول مرة عائلة العم ناصر بتنام وهي مرتاحة والبنات اللي للحين مصدومين من ابوهم
*********************
آسفه على التأخير
اعتذر عن أي خطأ إملائي بدر مني ولا تنسون ذكر الله