من عيون الناس يا نجد اسرقيني

١٧

قراءة ممتعه
بسم الله الرحمن الرحيم
لاتنسون تقيمون البارت تقديرا لتعبي
****************************
بيت ابو ماهر
عند مريم
وقفت تمسح دموعها تستجمع طاقتها من كثر بكيها
رفعت يدينها لعنقها تلمس علامات يدينه في عنقها خايفة تتزوجه وما ينقذها ابوها
التفتت لدخول ام ماهر اللي أسرعت تحضنها ودموعها اللي تنزل على خدها وقالت: تكفيين يا بنتي سامحيني تكفيين
ردت مريم: خالتي لا تبكين خلاص انا دارية انك مجبورة بس ابي منك طلب يا خالة تكفين لا تردينها في وجهي والله من ماتت امي وأنت بحسبة امي تكفين لا ترديني يا خالة
ابعدت ام ماهر وقالت: ابشري يا بنتي باللي تبينه
مريم: ابي اروح من هنا يا خالة ساعديني
ام ماهر: يا بنتي صعبة لكن والله ما اخليك بين يدينهم
ضمتها مريم وقالت: اشكرك خالتي والله اني ما انسى وقفتك معي
ام ماهر: اسمعي بتخرجين من باب المطبخ وبفتح لك الباب الخارجي واجري لا توقفين لين تخرجين للطريق العام تسمعين انا بتستر عليك
مريم بغصة: ما بيصير لك شي
مسحت دموعها ام ماهر وقالت: لا تخافين علي انا بخير بس أسرعي قبل لا يجي ماهر
خرجت ام ماهر من الغرفة تشوف الوضع ورجعت عند مريم بسرعة تنزلها معها
دخلوا المطبخ واشرت لها على الباب ،خرجت مريم والتفتت ام ماهر لبنتها جميلة اللي قالت: يمه وش تسوين هنا مو قلنا لك لا تخرجين من غرفتك
ام ماهر: وش اللي ما اخرج من الغرفة تراني امك استوعبي يا بنت نزلت اشرب اساسا
جميلة: خلاص انا بس قلت لك لانو اذا شافك ماهر بيقلب الدنيا
ام ماهر بعصبية: أقول روحي لغرفتك ما عاد في احترام في هذا البيت
خرجت جميلة من المطبخ واسرعت تخرج من الباب تشوف مريم
اعطتها المفتاح وقالت بهمس: افتحي هذا الباب واطلعي بسرعة
اخذت نفس وزفرت تاخذ المفتاح تفتح الباب التفتت لام ماهر اللي تودعها بيدها سكرت مريم الباب والتفتت للبيوت وخلو المكان
رفعت عبايتها وبدأت تركض بدون لا تشوف وراها
عند نايف
بعد ما خرجوا من المستشفى أسرع يركب السيارة
مع ابوه و منصور اللي يوريه الطريق
مساعد: كم باقي يا منصور
منصور: ما بقى شي تخطينا نصف المسافة تقريبا
نايف: انت متأكد من الطريق يا عمي
التفتت منصور وشاف الافتة وقال: ايوة هاذي الدخلة
دعس نايف على البنزين يكمل الطريق المتبقي
عند مريم
التفتت من سمعت صراخ جميله تنادي اخوها واسرعت في ركضها تبتعد عن البيت كل ما تجري تلتفت تشوف المسافة اللي ساعدتها تبتعد عن البيت
تعثرت من الحجر المرمى على الأرض وطاحت
نزلت عيونها لرجلها اللي تعورها ولفت براسها و وقفت بسرعة تكمل ركضها رغم التواء كاحلها
عند نايف
مساعد: يا ولدي خفف السرعة لا تضرب البنت
نايف: اي بنت
مساعد: شوف ذيك البنت المسكينه الطايحه على الأرض
حقق النظر نايف وقال: يا عمي شوف بسرعة هاذي مريم ولا لا
تقدم عندهم منصور يناظر البنت اللي تحاول تجري
منصور: وقف وقف يا نايف هاذي مريم ماهر وراها وقف بسرعة
وقف نايف السيارة وطلع منها وصرخ: يا بنت منصور
رفعت عيونها له واسرعت تجري صوبه لين ارتمت بحضنه تقول: تكفى ساعدني وين ابوي ويييييين
التفتت لابوها اللي قال: مريم يا بنتي انا آسف انا اسف سامحيني
ابتعدت عن نايف واسرعت عند ابوها تضمه وبقوة تقول: يبه ويييين كنت
اجهش منصور بالبكاء وقال: تكفين آسف وينه ولد الكلب
تقدم منهم ماهر بعد ما وصل لهم وقال بصراخ: ما حد بياخذها مني تسمعون
ابتعد عنها منصور و قرب منه وصفعه بقوة وقال: هاذي آخرتها يا الخسيس هاذي آخرتها وانا اللي كنت اقول اني بحطها بأمانتك بعد موتي هااا هاذي آخرتها والله ثم والله انك ما تلمسها وانا حي تسمع ولا ما تسمع
دفعه بقوة من صدره وقال: احترم اني عمك طيب اذا ما احترمتها احترمني انا واحترم الشنب اللي فوجهك يا الحيوان والله اني ما اسامحك تسمع
قرب منه ماهر وباس راسه بقوة وقال بابتسامه: عمي انت فاهم الموضوع غلط انت وبنتك على راسي يوم جيت خطبتها وافقتوا والحين اسمح لي باخذ زوجتي
وسع عيونه نايف يلتفت لها يشوف عيونها مغورقة بالدموع حست بنظراته والتفتت له تشوفه يناظرها ينتظرها تنفي كلامه وارتاح من نطقت: يبه لا تصدقه يا يبه يكذب والله اني ما وقعت على شي
قرب منها ماهر ومسك يدها وقال بحدة: لا تكذبين على ابوك
قرب منه نايف وضربه على وجهه وطاح ماهر من اختل توازنه وقال نايف: يا الحيوان لاااا تقرب منها
جلس فوقه وقال بهمس: والله اني لاقتلك ان لمستها والله اني لادخلك السجن يا الرخمة وانا عارف بسواياك يا خوي سالم
فتح عيونه بشدة وقال: من انت من عرّفك بسالم
وقف نايف وقال لعمه: عمي اطلع السيارة مع بنتك بنروح
منصور: اطلعي يا مريم لي كلام مع هذا الحيوان
وقف ماهر وتحسس فكه وقال: عمي اسمعني
منصور: اسكت لاعاد تعرفني ولا اعرفك يا ويلك لو شفتك تحول حوالينا يا ويلك ووصل كلامي لابوك ان شفتك قربت مننا والله ما يفكك مني احد تسمععع
طلع منصور السيارة جنب بنته وقال بهمس: انتي بخير
سكتت مريم وهزت راسها وقالت: بس تعبانه شوي
حطت راسها على كتفه وناظرت في نايف اللي يناظرها من المرايه يتذكر ضمها له ، ابتسمت من تحت نقابها و صد نايف من ناظره ابوه اللي كان حاير في أمرهم
****************************
عند البنات
نجلاء: ساااعه يا بنت
نجد: لا تصارخين كنت أبحث عنهم
نجلاء: المهم انزلي عند جدتي لانو الضيوف بدو يجون
نجد: امي جات
نجلاء: لا لسا
نجد: خلاص انا بجيب جوالي والحقك
دخلت نجد تبحث عن جوالها و تبعت الصوت من سمعته يرن
نجد: أعوذ يالله وش يبي ذا
ردت نجد وقالت وهي تتفحص حوالينها: نعم
احمد: ما تسلمين
نجد: يا اخوي اخلص علي قولي وش اسوي عشان تمسح الصور يرحم امك
احمد: والله الصور حلوين يعني
نجد بحدة: قلت لك بتمسحهم
احمد: لما تجيبي الأوراق
نجد: اي أوراق
احمد: شنطة زوجك اللي يجي بها للمركز بتفتحينها وبتبحثين عن أي وثيقة فيها اسم احمد وتجيبينها
نجد: انت من جدك ما اقدر
احمد: هذا اللي ابيه ان كنتي تبيني أمسح الصور ولا انشرهم سوي اللي ابيه انا ورى البيت
قطع الاتصال يخليها فحيرة من أمرها محتارة يا تساعد اختها وتخون ثقة زوجها
تنهدت وتذكرت الصور واختها واللي يمكن يصير اذا نشر الصور
زفرت بقوة واخذت خطواتها للمكتب
******************************
برا المجلس
خالد: هلا والله يا سطام
سطام: هلا بك وش الاخبار
خالد: الحمد لله والله آخر واحد كنت اقول يتزوج
مسح شنبه سطام يتذكر ملامحها وقال بنرجسية: ليه مو عاجبك
تركي: يا خالد سطام تعالوا بيجي الشيخ الحين
التفتوا لندائه وتقدموا يدخلوا المجلس يسولفون بما ما وصل الشيخ
عند الحريم
الصالة
البنات
ملاذ: هدّي يا بينت
ليان: اووو مقدر توتتتر
ضحكت الجود وقالت: لا تتوترين خوذي الموضوع عادي
ليان بسخرية: لا يا شيخة ترى اذكر زواجك وملكتك
ضحكت الجود وقالت: وين نجد ما شفتها
نجلاء: ما ادري في غرفتها قالت بتجيب جوالها وتنزل
عند نجد
خرجت من الباب الورائي بعدما لبست عبايتها ونقابها تدري انها تغامر لكن كل شي لأجل اختها تنهدت وفتحت الباب الخارجي للحوش وشافت سيارة ددسن بيضاء قدام الشارع
توترت من شافت يد تلوح لها من داخل السيارة
خرج من السيارة متلطم يسرع خطاويه و تقدمت نجد وقالت: امسحهم وتأخذ الأوراق
احمد: يا ليل الليل اعطيني الأوراق اول واوعدك اني امسحهم
حطت الأوراق وراها وقالت: قلت لك امسحهم قدامي
زفر بقوة و اخذ الجوال وفتحه ووراها الصور وقال: هااا تشوفين
نجد بحدة: امسح البقية
مسح احمد الصور وقال: دورك
اخذت نفس نجد و مدت الأوراق له وقالت: لا تعرفني ولا اعرفك تسمع قسم بالله ان ذكرت اسمي اقتلك ولا افكر تسمععع
احمد: لا لا تخافين ترى أن بغيتك بشي باتصل
نجد بحدة: اقوول بعد عني ولا عاد تتصل سامع
ابتعدت عنه واسرعت ترجع البيت
ضحك واخذ الأوراق متوجه للبيت المهجور
البيت المهجور
دخل البيت وهو يدندن غافل عن اللي يراقبونه وينتظرونه يدخل عشان يمسكوه
برا البيت
بدت أصوات سيارات الشرطة تحاوط المكان وبلمحه بصر فتح باب البيت وقال: وقف معك الشرطة
التفتت احمد يلعن نفسه والموقف وكل شي اكيد انه خلاص انتهى و حتى انو الدلائل اللي تدينه معه
احمد بدهشة: فاااارس
فارس: اي معك فارس انا قلت سلم نفسك احسن
دخل الدعم ونزلوه على الأرض وتقدم فارس يكلبش يديه وقال: والله لي سنوات انتظر اللحظة هاذي
احمد بحدة: من انت وين مو معقول تكون فارس نفسهه
فارس: والله يعني مرت سنوات حلوة معاك لكن عملي أولى ولا وانت اللي وثقت فيني يعني كل شي انت سببه والحين بتتعفن في السجن كل شي عندنا
***********************
بيت العم ابو عقاب
المجلس
دخل الشيخ وسلموا وبدوا في كتب الكتاب
عند الحريم
ملاذ: وين كنتي
نجد بتوتر: هاا اكنت تعبانه راسي وجعني فقلت اريح شوي
ملاذ: والحين بخير
نجد: اي اي الحمد لله
دخلت ليان وقالت: ساعدوني
الجود: وش فيه يا بنت
ليان: يبي شوفه بنات ما اقدر ابي اكنسل
ضحكت نجد وقالت: أقول روحي اكيد انهم يبون توقيعك الحين
جلست جنبهم ليان: خلاص ماني موافقة على أي شي
نجلاء: انتي انهبلتي اقول قوني امي تناديك
ليان: والله ببكي والله
قربت منها نجد وضمتها وقالت: خلاص يا بنت اذكري الله كل شي بيمر تمام
تنهدت ليان ووقفت تخرج تتوجه عند امها
مسكت القلم وزفرت بقوة تهدي من توترها وركبتها ووقعت وشافت اسمها جنب اسمه وحطت القلم وضمها تركي وقال: مبروك عليك يا حلوة
ضحك عقاب بخفيف وقال: العقبى لك
ابتعد عنها وقال: لا لا لسا يا اخ
تقدم منها عقاب وضمها لصدره وقال: لا تخافين تذكري اننا معك وجنبك
ابتسمت وقالت: خلاص مابي ابكي
ضحك تركي وقال: تحسست البنت
ابتعد عقاب وقال: تعالي للمجلس الثاني بيشوفك
هزت راسها و خرج عقاب وقال لتركي: روح قول له يجي للمجلس الثاني
هز راسه وتوجه عند سطام اللي راح المجلس
ابو عقاب: يلا يا بنتي
ليان: يبه بتجي معاي صح
ابو عقاب: وشو اللي اجي معاك اقول توكلي يلا
ليان: لا يبه تعال
ابو عقاب: أقول ادخلي
فتح لها الباب وناظرت في سطام اللي رفع عيونه لها وتنهدت وقال ابو عقاب: ٥ دقايق
هز راسه سطام ودخلت ليان
جلست بعيده عنه وقال: ما تسلمين
هزت نظرها له وقالت: سلم علي وارد عليك
ضحك وقال: لا والله ترا انتي اللي دخلتي
ابتسمت بسخرية وقالت: السلام عليكم
رد عليها وقال: وعليكم السلام ،، لا يكون خايف مني ترا ما آكل البشر
وقف وتوجه لها وجلس جنبها وقال: هنا مكانك جنبي
ناظرته وابتعدت شوي وقالت: انت ليه خطبتني
رد بابتسامه: لاني ابي اتزوج
*********************
آسفة على التأخير اعتذر عن أي خطأ إملائي بدر مني ولا تنسون ذكر الله
قراءة ممتعه 🫶🫶🫶