اتصلتَ على خالتو اتطمن منها على صحة عائِشة، لكن وصيتها انها ما توريها بإتصالي، قالت لي إنها بقت كويسة وحيخرجوها الليلة ان شاء الله، ارتحتَ كتييير الحمدلله، بس أنا لسة خايفة عليها...
امي قالت لي نقوم نمشي لأعمامي شوية طوّلنا منهم، فعلًا اتصلنا عليهم وكلمناهم، جهزنا فطورنا وطلعنا عليهم مشينا بيت عمي الكبير "خالد" أبو جوير، سلمنا عليهم ولقينا فطومة قاعدة برضو، أول ما دخلنا كالعادة التوأم اتشعلقوا فيني😂.
سلمت عليهم وأديتُهم حلوياتهم، بعدها اتونسنا شوية وفطَرنا، خالتي سُمية قالت لي الجيران جايين يشربوا قهوة ومعاهُم البنات برضو، يعني حيعملوا قعدَة بناتيّة وقعدة كُبار، قُمنا طوالي نجهز الحاجات انا وجُوير، شوية كدا الحرِيم كان بدو يجو والبنات برضو، ودينا الحاجات وسلمت عليهم، جُوير مشت للبنات وانا دخلتَ غُرفتها ما بحب القعدات وخصوصًا لأني انسانة انطوائية..
جُوير جات داخلة قالت لي ما ماشة معاي؟
قُلت ليها لالا امشي انا بنتظرك هنا، هزّت راسها بتفهُم وقالت لي طيب، سكتت مسافة وقالت لي جوالي لو اتصل رُدي طيب؟
قُلت ليها أرُد ساي كدا واقول شنو؟
قالت لي أساسًا هو حيكون يُوسف وليه فترة بسألني منكم انتِ ويمان، فااا شنو ردي ساي وقولي ليه جُوير مع البنات لما يطلعوا بترجع ليك، قُلت ليها طيب.
يُوسف ده أخو جُوير الكبير عُمره 25 سنة، قاري طب جراحة وشغال في لندن حاليًا، علاقتي معاه كانت سطحية وانا اصلًا بطبعي ما بدخُل في الناس سريع حتى أهلي، المُهم قبل سنة تقريبًا نزل السودان اجازة والوقت داك علاقتنا بقت أحسن شوية من أول..
أخُوهم مُهاب أوسطُهم 21 سنة، ظريف كدا ودمُه خفيف وبلقى نفسي بتونس معاه تلقائيًا طوالي، بضحَك ضِحك لما اتونس معاه😂
ومن أهل أبوي تاني عندي عمّي الأمين، عُمره آخر العشرينات هو اساسًا آخر العنقود في أخوانُه، انسان هزَلي مُبالغة وحياتُه كلها مزِح، طبعًا هو عمي اسم بس لكن ما شغالة بالموضوع ده كتيير بتشاكل معاه زي يمان عادي🤣.
ديل كدا أهل أبوي.. حبوبتي أُم أبوي مُتوفية من قبل ما اتولد، أما جدي فاتوفى لما كان عُمري اربعة سنين.
#للتذكير:
خالد (الأخ الاكبر) زوجتُه سُميّة وأولادُه يُوسف، مُهاب، جوير.
الطاهر (أبوي) زوجتُه إيمان وأولاده جُمان ويمان.
فطومة زوجها عُمر وعندها توأم جُود ووَجد.
وآخر واحد الأمين.
وأنا ماسكة جوالي بقلب فيه سمعت جوال جُوير بتصل، ونسبةً لإني عندي مُشكلة مع المُكالمات ف خِجلت صراحة...
المُهم ده كان يُوسف زي ما اتوقعت، أخدت نفس ورديت عليه..
_ست الناس
= ااا، يُوسف كيفك؟، انا جُمان.
_ أوووووووو جُمانة، انتِ حيّة بالله؟ وينك مُختفية؟
= موجودة والله، بس كان مع جوطة الامتحانات بس.
_كيف أخبارك ان شاء الله بخير؟
