ختمَة يمان أدتني دفعة إيجابية قوية شديد، بقيت مُتحمسة جدًا إني انا كمان أخلِص الحِفظ واكون من الحافِظات بإذن الله، كُل ما اتكاسل وأتهاون كنت بشوف لمعة عيونُه وأسنانُه الما دخلت أسبوع لي قدام من الفرح😂، وقتها برجع اتحمس تاني من أول وجديد، وختيت الختمة هدف في راسي وإلا أوصل ليها في يوم ان شاء الله💙.
أجزنا اسبوع تقريبًا وبعدها نزلنا السمستر التاني، ما كان في جديد يُذكر، غير إنُه يُوسف ماشاء الله تبارك الله اشتغل في مُستشفى حكومي، وبعد فترة ما طويلة اترقّى لرئيس قسم الجراحة في المستشفى، كان نجاح كبير شديد وكلنا انبسطنا ليهُ والله وعملنا ليه كرامة برضو.
بالإضافة لإنُه شغل المُبادرة كان ماشي كويس شديد، رغم ضغطته من شغل المستشفى أبدًا ما كان مُقصر في شغل المُبادرة، والأمور كانت ماشة بصورة طيبة شديد الحمدلله.
كُنت مُنبهرة بي نجاحاتُه رغم صِغر سنُه، يعني هو هسي يادوب 26 ماشاء الله تبارك الله، لكن إنجازاتُه إنجازات واحد عُمره 40 سنة اللهم بارك، وبقى واحد من أشهر وأشطر الدكاترة الموجودين في السودان، ومرّة اتكرّم ضِمن احتفال بعنوان " شباب السودان الناجح " فكان فخر حقيقي لينا!!
أنا شخصيًا ماف شيء بجذبني في الراجل أكتر من إنجازاتُه، بحب النجاح وبحب الشباب الناجِح، وبحب أصحاب الطموحات والأحلام.
الإنسان الناجح نجاحُه بصنع هيبته واحترام الناس ليه، وبفرِض حضوره في أي مكان يتواجد فيه.
عائِشة مواصلة في المُعسكر حقها وكانت ماشة كويس شديد ما شاء الله، وحتى ما باقي ليها كتير شديد.
في يوم وانا راجعة من الجامعة، في الطريق فتحت قروب المُبادرة، لقيت يُوسف مُرسِل إنُه في اجتماع ضروري شديد اليوم بعد المغرِب.
حسيت بالخيبة وأنا كُنت مخططة أمشي آخد لي نومة طويلة لكن حصل خير😂
أول ما رجعت رقدت شوية، وبعدها قمت أقرا، لحد ما جو ناس أبوي...
سلمت عليهم وأبوي قال لينا ما طالعين؟
شايف يوسف قال عندكم اجتماع.
يمان قال لي آي اجهزي بعد كدا عشان نطلع.
هزيت راسي ودخلت الغرفة، استحميت وبدلت ملابسي، لبست دريس بيبي بلو مُورّد ولفيت طرحتي، عملت قلوس وطلعت...
وصلنا المحل، كنت بحس بالبهجة شديد مجرد ما اوصل هنا!
نزلنا وسلمنا على الموجودين، جينا بدري فما كان في ناس كُتار، وما كان في زول بعرفُه فأخدت لي رُكن ومسكت جوالي وقعدت، عكس يمان اللي من جا داخل بدا يسلم على الناس دي كلها ويتونس ويضحك معاهم، هو ما شاء الله اجتماعي شديد.
شوية كدا مُهاب وجُوير جو داخلين مع بعض، سلموا على يمان وشايفاهُ بأشِر علي من بعيد، وبعدها بشوية كدا شايفاهم جايين علي، سلمت على جُوير ومُهاب طوالي بقى يشغلها لي، يا خطيبتي وبتاع، أهم شيء إصرارُه على إنُه خطبني من أبوي المرة الفاتت😂.
