يُوسف اتصل على جُوير قال ليها إنُه برا، بعد شوية طلعنا وركبنا معاه، قال لينا ها كيف كان يومكم؟
جُوير قالت ليه حلو الحمدلله.
صحبتِك جات؟
اا اي
يُوسف عاين ليها ورجع قبّل قدامُه، عاين لي بالمراية وهو بقول لي، شُفتِ صحبتها؟؟؟
ااي، اتكلمنا في الموضوع..
ان شاء الله تكون اقتنعت؟
جُوير ردت ليه، آي اقتنعتَ، خليتها خلاص..
يُوسف هزّ راسُه من سُكات.
طُول الطريق كان بتونسوا، أنا مرة بشارِك ومرة بسكُت، المُهم لحد ما وصلوني البيت، يُوسف قال لي سلمي على ناس البيت لحد ما أصلكُم.
يوصل ان شاء الله.
جُوير قالت لي مع السلامة، بيناتنا واتس.
قُلت ليها زابِط ان شاء الله.
نزلتَ وهم انتظروني لحد ما دخلتَ البيت وبعدها مشو..
طلعت عبايتي وغسلت وشي، صليت الصلوات الفاتتني، مشيت لأُمي حكيت ليها الحصل كُله بالتفصيل..
قالت لي غايتو الزول بقى يخاف الزمن ده والله..
حقيقي والله يا أُمي، لكن ان شاء الله ما بِحصل شيء.
ان شاء الله والله سكتت مسافة وقالت لي جُمان!
هاا
لو حصل أي شيء كدا ولا كدا كلمي أخوكِ، أوعِك تتصرفي من راسك!
آي أكيد يا أُمي، انا متين بعمل حاجة بدون ما أسأل يمان؟؟
خلاص كان كدا اتطمنت، ربنا يحفظك ويبعد عنك أولاد الحرام يارب.
اميين اميين، انا ماشة أنوم شوية فترانة، لما ناس أبوي يجو صحيني.
حااضر، وانا زاتي طالعة على الجيران عندهم مناسبة
طيب تمام.
أُمي طلعت وانا دخلت غُرفتي رقدت، وبدون ما أفكِر كتيير نُمت.
____________________________
صحيت من الصباح ناس أُمي ماف، اتصلت علي سمر، رديت عليها قالت لي انها نفسها تمشي كوفير تزبّط شعرها لأنُه نفسيتها مُحتاجة، وإنُه لو ما عندي مانع أمشي معاها..
قلت ليها حأكلم أبوي وأرجع ليكِ، فعلًا كلمت أبوي قال ما عندُه مشكلة، وانا بديت أجهز..
بعد شوية جاتني سلمت علي وهي بتقول لي:
والله اشتقتَ ليكِ يابت، وينك مُختفية كدا؟؟
والله بالأكترر..
الجديد والحاصل؟
نو جديد والله..
