الليلة خُطوبة عائِشة💃🔥.
في الأيام الفاتت دي، لا جديد يُذكر غير إننا قدمنا بس للجامعات، يمان صحتُه كويسة الحمدلله والقوة والصبر كل ما ليهم كل ما بزيدوا عنده ما شاء الله تبارك الله💙.
في الأيام الفاتت عائِشة استخارت أكتر من مرة، وكلمتني انها مرتاحة وبعد فترة طويلة ردّت لي بالموافقة، طوالي الأمين ساق الرِجال ومشى لي أبوها واتقدموا ليها، بعدها بفترة جاتنا المُوافقة، وأهو الليلة كانت خُطوبتها.
طبعًا انا وعائِشة اللتنين طلبنا فساتين رهيبة من شي إن🥳
الفُستان كان عاجبني شديددددد ووريته لأمي بس وخليته مفاجأة للباقيين وأنا الجيت اتفاجأت يوم الخطوبة🥲.
الحصل إني صحيت من الصابح مبسوووطة ونفسياتي فُل، نضفت ورتبنا البيت، ناس عمي كُلهم كان حيجونا وحنمشي من بيتنا لأنُه أقرَب، طبعًا انا كُنت متحيرة بين إني أكون مع عائشة ولا مع الأمين🤣
لكن بِعتها لأنُه عِرس الولد بكون أحلى من عِرس البت والفعاليات والربّة، كنت معاها طول الأيام الفاتت بجهِز معاها لكن رجعت البيت أمس بالليل عشان أجي مع أهل العريس😂.
كان يوم جُمعة وكُلهم جو قبل الفطور، فطرنا وبعدها بدينا نجهِز للخُطوبة، انا وجُوير كُنا في غرفتي بنتونس، قالت لي ما وريتيني فستانك؟
يازولة خليهُ مُفاجأة لحد بعدين
لالا هسي بس يازولة
هوي هسي ولا بوريكِ ولا شيء.
أنا يا جُمان؟؟
ياخ اصبري طيب.
قمت طلعت الفُستان وريتُه ليها، كانت مُنبهرة شديد وبتقول لي ياخييي خطييير خطير ماشاء الله، ومع الطرحة كمان لابق شديد اللهم بارِك!
شُفتِ كيف!
والله يا جُمان ما عايزة أخوفِك، لكن أبجيقاتنا ديل لو خلوكِ تطلعي من البيت بالفستان ده أحلقي لي شعري🌞.
قُلت ليها جوير ما تمزحي معاي عليك الله، انا براي خايفة يمان ينقّ لي فيهُ.
كويس بنشوف يازولة، عايني الفستان قصير شوية من قدام، وأكمامُه قصيرة شوية.
اي عارفة، لكن لما طلبتُه ما قايلاهُ حيكون كدا!
خُتي البديل ساي يازولتي هدا كلمتِك.
الله يطمنك ياخيي!!
المُهم ما عارفة الوقِت مرّ متين وقالوا لينا أبدوا أجهزوا..
لبستَ الفُستان الرهيب ده وانا يدي في قلبي حقيقي، يمان لو قال لي ما تلبسيهُ ببكي🥲.
أنا وجُوير كُنا في غُرفتي، شوية كدا لِبسنا واتجيهنا تماااام، ما عملنا ميكب هي صغيرة وأنا بشوف نفسي أجمل بدونه، بس عملت قلوس وطلعنا.
