بعد ما كلمت ناس يُوسف بالموضوع فعلًا بدوا فيه طوالي وأعلنوا في المُبادرة إنُه عايزين مُتطوعين لحملات توعوية، لحد اللحظة ديك يمان ما كان عارِف بكُل ده، وما كان عارِف إنُه المبادرة اسمها " سَند يمان " ومؤسِسها يُوسف، حقيقي يُوسف بي المُبادرة دي كِبر في نظري شديد ♡.
أنا كُنت عارفة إنُه يوسف عايز يعمل مشروع هنا وعندُه أفكار وعندُه رأس المال، لكن مرض يمان اتصادف في إنه يعمل مشروع المُبادرة ده بي إسم يمان.
المساء بعد ما كُل زول دخَل غُرفته، دخلت القروب لقيت يُوسف مُرسِل صور، لما فتحتها عيوني دمّعت وبقيت عاجزة عن التعبير!
كان مُصوِر مبنى صغير يمكن غُرفة أو أكبر من الغُرفة بشوية كدا، مكتوب فيها بي برا بي خط كبير، سنَد يمان.
تحت كاتِب بخط صغير، المقرّ الرئيسي.
فتحت باقي الصور كانت الغُرفة من جوا، رغم إنها صغيرة إلا إنها كانت مُزينة بي طريقة عظيمة شدييييد، تناسُق الألوان والأثاث الفيها، حقيقي اتفاجأت جدًا والله وما كُنت قادرة أعبِر.
رسلت ريكورد لي جُوير وانا بقول فيه: اخخخ يا جُويررررر البتاع ده رهيييب شديد ياخي اللهُم بارِك، يُوسِف ده فنّان اقسم بالله!!
ماشاء الله تبارَك الله أبدًا ما قادرة أعبِر، انا في حياتي ما حسيت بالفرح والجبر قدر اللحظة دي!
الحمدُ للهِ يااخي ألف الحمدُ لله!!!
دخلت القروب لقيت التعليقات على المكان، كتبت ليهم ما شاء الله تبارك الله ياخي أنا مُنبهرة شديد لمن ما قادرة أعبِر، فعليًا عجِز الكلام عن الكلام وجُزيتُم خيرًا ياخيي!💙💙.
خطّطنا إنُه بكرة بالمساء حيكون الإفتتاح، كلمنا ناس عمي وناس أمي وكلهم عندهم عِلم بالموضوع عدا يمان...
كُنت متحمسة شديدددد لبُكرة وبحسب الوقت بالدقايق، اتصلت على عائِشة وكلمتها وقلت ليها تعزِم عائِلة سمر والناس القريبين ليها...
يمان اشتقت ليه شديد تقريبًا من الصباح ما شُفته وما اتونست معاه، وأنا بفكِر فيه كدا الباب دقّ، جا داخِل قال لي من لِقى أهلُه نسى أخوه.
نفسي أعرِف بتحب الجُملة دي كدا ليه؟🤣
وأساسًا هي من لقى أحبابُه نسى أصحابُه فإنت خلي التحريفات دي😂
المُهم في نسيَة في الموضوع، قالها وهو بقعد جمبي في السرير.
معقول لكن؟؟
في زول بنسى نفسُه؟؟
الله!
الليلة ده كلام خطير عديل، من أين لك؟؟
دي مواهب مدفونة ياخي، ما بطلعها إلا للناس البحبهم.
عِشنا وشفنا.
ولسة كمان حتشوف أكتر.
كويس نشوف😂.
عملتِ شنو في موضوع الكتاب؟؟
أي كِتاب!
مُش عايزة تكتبي كتاب؟
ااا، ااي بس لسة حاسة إني مُحتاجة وقت أكتر وأفكار أكتر، فقررت إني أستغلّ الفترة دي في إني أقرا كُتب عن كيف تكتب كتاب ناجح وهكذا يعني، فهمتَ علي؟؟
