مُهاب اتأخر شوية، فتحت دفتري وبديت أكتب:
يمــااااان.
صباح الخير أو ضُهر الخير ما فرقَت😂.
الجابني أكتب ليك الشوق والله.
كيف حالَك؟
الليلة خلصت يا يمان، بقيت خِريجة عارِف؟
كُنا بنخطط لليوم ده كتيييير شديد مُتذكِر؟😂
وكُل دقيقتين بنتشاكل في تفاصيل اليوم وغيرُه وغيرُه...
زمان لما أتذكر إنك ما موجود معاي وفي تفاصيلي كُنت بتضايق شديد، كم مرة قضيت الليل كُله بكا لحدّ الفجر!
أنا ما بعترض على حُكم ربنا، بس في نفس الوقت ما كُنت بقدر أوقِف بكا..
ببكيني شوقي ليك كان.
لكن هسي، الموضوع مُختلف يا يمان...
أنا ما زعلانة!
ولا مُتضايقة!
دُعائي ليك بصبّرني، وكتابتي ليك!
أيوا إنتَ ما موجود معاي وفي تفاصيلي، لكن أنا حاسة بيك جمبي هنا يا يمان!
عِشت حياتَك كُلها ساندني ومُطمّني، لدرجة حتى بعد موتك أنا حاسة بوجودك في كُل مكان حولي!
اليوم، أنا راضية تمامًا الحمدلله بقضاء ربنا خيرُه وشرُّه، ومتأكدة إنُه كُل شيء حصل لينا وحصل في حياتنا لخير، وإن كان ظاهِر إنُه شر، فأنا مُتأكدة إنُه مُبطّن بالخير، وإنُه جواه فيه خير كنتييير شديد لينا.
دايمًا كُنت بتقول لي رُوح أخوها.
إنتَ عارف؟
انا اكتشفت إنُه اللقب ده بيليق بيك إنتَ.
إنتَ روح أُختَك يا يمان، وحبيبها الأول، وقلبها زاتو😂.
كُنت دايمًا بتضايق من كلمة عسل.
لكن حقيقي، أنا في كُل مرة بقول ليك فيها عسل، أنا بكون قاصدة الكلمة من جُواي يا يمان، شايفة إنها أكتر كلمة بتوصفك!
انتَ عسل حقيقي...😂
المُهم.
الليلة على كدا خلصت مرحلة الجامعة...
باقي بس يُوم المُناقشة، تتذكّر النجمة اللي كُنا بنتشاكل فيها؟
النجمة المُضويّة شديييد ديك، نورها بجهَر النجوم الحوالينها، كُنا بنتشاكل دايمًا، إنتَ مُصّر إنُه دي أنا...
وأنا مُصّرة إنُه ده إنت أكيد.
أنا فُزت في التحدّي!!😂
والنجم طلع إنتَ.
نورك جاهرني حتى بعد وفاتك.
أوريك كيف؟
كُل ما أتردد في حاجة بتذكّر وصية من وصاياك البتوجّهني بيها دايمًا، فقلبي بدُلّني بيها على الصح.
كُل ما أشتاق ليك بتذكّر قعدة من قعداتنا الكتيرة وونساتنا، سواء في الغُرفة، أو في السماء تحت النجوم، أو في المطبخ آخر الليل واحنا بنفتش حاجة ناكُلها😂.
كُل ما أتعب بتذكر تحفيزك لي، وقعدتك فوق دُرج المُذاكرة حقّي وانتَ بتقول لي "أنتَ تستطيع أنتَ بسكويت😂!".
لسة ما عِرفت سرّ البسكويت شنو، لكن مرّة كان قُلت لي لأني هشّة وبأقل شيء بتبّل🤣.
وبعدها ترجع تعدّل كلامك بإني أستطيع حتى لو كُنت بسكوتة.
فالمُهم بقيت اتذكّرك بالنجمة دي، وكُل ما اشتاق ليك بقعد أتكلم معاها زي المجانين😂.
يمان...
كلمة شُكرًا ما حتكفيك.
والأثر الطيّب البخليه الإنسان بعد مُوتُه كُله بتجسّد عليك انتَ حرفيًا!!
كُل الخليتُه وراك كان طيّب.
أثّثت قبرك يا يمان من قبل وفاتك، هنيئًا ليك بالجد، وهنيىًا لي بيك.
مسحت دموعي وأنا بكمل كتابة، ما تفتكر الدموع دي دموع زعل، دي دموع رِضا ووو
شوق كمان.
انتهى كلامي، لكن ما انتهينا على كدا..
بيناتنا دعوات
وأشواق
ونصُوص
ونجمة في السماء أحكي ليها عنّك!.
