لما شفت ملامحها اتلونت ووشها قلب، وقتها عرفت إنُه إجابتها ما حتكون خير!
عاينت لي مسافة وفجأة عيونها دمّعت، قلبي وجعني جدًا ولُمت نفسي لما هي بدت تتكلم...
جُمان، أنا آسفة لو في يوم حسستِك كدا...
أنا بغير منّك أيوا، بس والله ما بتمنى ليكِ الشر!
بغير منك عشان عايزة أبقى زيِّك، عشان عايزة أحفظ القُرءان الكريم، عايزة أكون مُلِمّة بعلوم الدين، عايزة أكون شاطرة في الجامعة، عايزة أكون محبوبة من الناس زيِّك تمامًا اللهُم بارِك!
بس والله ما حصل حسدتِك!
انتِ صحبتي يا جُمان وأختي، تفتكري ممكن تطلع مني حاجة بالشكل ده؟
أنا عدوّي ما بتمنى ليه الشرّ، أتمناهُ ليكِ انتِ واحنا بيناتنا عيش ومِلح؟
الغيرة حاجة كويسة، لأنها بتحفّز الزول إنه يصلّح من نفسُه، لكن بينها وبين الحسَد شعرَة!
انتِ البتقرري عايزة تكوني حسودة ولا لأ، من خلال إنك تعملي كنترول على غيرتِك.
وأنا لأني عارفة الكلام ده، كُل ما أغير منك كُنت بدعي ربنا يهديني وينضّف قلبي، ما عايزة أعيش حياتي بقلب مريض بالحقد والحسد والغِلّ!
أنا قد أكون بغير منك يا جُمان...
لكن طُول عمري بتمنّى ليكِ الخير، وفي صلاتي إنتِ جُزء ثابت من دُعائي ♡!
أول ما قالت لي كدا زفرت براحة وأنا بقول ليها بالضبط يا رغد بالضبط!!.
ده اللي أنا بحاول أوصله لأي زول يقول لي البت دي بتغير منك، أنا عارفاكِ يا رغد والله، بس ما كُنت عايزة الشيطان يدخُل بيناتنا، وبما إنُه بدا يوسوس لي تجاهِك فحبّيت أقطع الشك باليقين، ما تزعلي منّي!!.
مسحت دموعها وقالت لي ولا يهمّك، أنا ما بزعل منك يا جُمان...
اتونسنا وضِحكنا كتييير بي تلقائية وراحة ♡.
بعد فترة طويلة كُنت شايلة فيها هم!!
رغد طلعت، أنا صليت العِشاء وجيت قعدت في غُرفتي، الليلة بالذات حاسّة نفسي مُشتاقة لي يمان شديد، نُكتُه البايخة وونستُه، نصايحُه وفضفضتي معاه، وأنا بفكّر كدا سمعت صوت اشعارات كتيرة في الواتس...
دخلت لقيتهم بتكلموا في قروب المُبادرة، وعاملين لي تاقات...
فتحت الرسائل، لقيت مُهاب مُرسل:
جُماااان.
كُنت داير أرسل ليكِ خاص لكن يُوسُف بشيل رقبتي برّا😂
المُهم ياااا بتنا ♡
عارفين إنُه ماف زول فينا بسدّ فرقَة يمان مين ما كان...
لكن والله يا جُمان، انتِ وجُوير بالنسبة لي واااااااحد ♡.
اللتنين في كفّة وحدة، انتِ أختي وهي أختي...
ما بحب أشوفكم زعلانين أو مُتضايقين انتو اللتنين...
اشتقتِ لي يمان وللجو الأُخوي، تعالي لينا وقت ما انتِ عايزة، أشكي لينا بنسمعك، أطلبي مننا بنديك، المُهم إننا أخوانِك يا جُمان ♡.
يُوسُف ده زاتو عايزة تشتكي منه تعالي اشتكي لي، بكسِر ليهُ راسُه لو زعلِّك.
طبعًا أول مرة أقول كلام جادّي، أنا زاتي ما اتعرفت على نفسي😂.
ده حال الدُنيا، يمان ربنا يرحمُه ويغفر ليه ويجعل مأواه الجنة من غير حساب💙.
