" لا شيء يبقى للأبد؛ حتى الشمس ستكسر القانون يومًا وتُشرق غربًا لتُعلِن النهاية...! "
#جُمان:
عملنا الفطور وفطرنا بي مزااج أنا وأمي وأبوي، ما كان عندُه دوام اليوم...
أما يمان طلع الشغل من الصباح، اتصلَت علي ميّ قالت لي رغد عيّانة وأرح نمشي ليها..
عالأساس ده جِهزت وأبوي قال أصلًا عندُه مشوار حيوصلني معاه، أبوي نزّلني في الزلط ولقيت ميّ وانا داخلة على بيتهم، سلمت علي واتونسنا لحد ما وصلنا...
فتحت لينا خالتو "سماهر" أُم رغد، سلمت علينا سلام حلو شديييد ودخلنا...
رغد كانت راقدة في غرفتها وتعبانة بالجد يا حليلها، سلمت عليها وقعدت، قلت ليها سلامات يا بت مالك؟
+ ما عارفة والله صحيت من النوم عيّانة.
= سلامتك والله ما تشوفي شر.
+ الله يسلمك، انتِ كيفك؟
وميّ كيف حالك؟
_ أنا كويسة الحمدلله، فحصتِ؟
+ فحصت لكن ما طلع شيء، بكون ارهاق الأيام الفاتت والجامعة بس.
_ عوافيكِ ما تشوفي شر.
+ الله يعافيكم.
قعدنا معاها واتونسنا شوية، هي كانت بتصحى وتنوم من التعب، خالتو جات اتونست معانا مساافة برضو واتغدّينا، طول الوقت خالتو ما زحّت من رغد أبدًا، كُل شوية تجي تشوفها وتمشي، حنيّة الأمهات حاجة تانية خالص ♡.
قضينا معاها اليوم ورجعنا قبل المغرب بشوية، سلمت على ناس أمي وصليت المغرِب، طلعنا نسوي الشاي بالزلابية...
بعد ما شِربنا أُمي قالت لي جُمان...
ها!؟؟
خالتِك أحلام عيانة عارفة؟
ما عارفة والله، سلامات مالها؟
عندها التهابلت وتايفود وملاريا.
ايييك يا حليلها.
قالت لي أرسلِك ليها كم يوم.
أبوي قال ليها ليه بناتها وين؟
أمي قالت ليه مُرام مع الجامعة بتطلع بدري وترجع وعندها امتحانات عشان كدا.
يمان قال ليها يعني جُمان تسافر تقضي معاهم كم يوم؟
أمي قالت ليه آي هسي أنا بسألها عشان كدا.
قُلت ليها ما عندي مُشكلة بمشي عشانِك، ربنا يعافيها ان شاء الله.
أبوي قال لي تمام، تسافري بكرة طوالي؟
أمي قالت ليه آي أحسن بكرة.
قلت ليها حاضِر ان شاء الله، أصلًا بلدُهم ما بعيدة شديد مننا.
أبوي قال لي إذًا خلاص خير، بُكرة ان شاء الله بصحى بدري أوديكِ وأرجع.
