.
______♡
كان منسح ويطالع فيها بهدوء وهي تغير للتوأم كان شكلها مريح للعين وتبي لو تجلس تطالع فيها طول العمر ..
خلصت وانتبهت له وقت شافته يطالعها :مطول يا سيد آسر تطالع فيني؟؟
ضحك :اعجبني منظركم.
ليال بابتساامه :خذ واحد منهم ونيمه ترى اتعبوني اليوم بروح ادرس شوي عندي تراكمات والاختبارات قربت.
اخذ غيث ونيمه على صدره وصار يمسح على ظهره بالشويش، وهي وقفت تنيم ليث وتلف فيه لين نام .
وماهي الا دقايق ونام هو غيث مع بعض ضحكت وحطت ليث بمكانه ورجعت تاخذ غيث بعدها غطته وقصرت على المكيف وراحت لصاله الجناح تدرس شوي بعد ما حطت لها كوب نسكافيه .
. _________.
بمكان ثاني وبيت ثاني اول مره ندخله.
اسرار بنرفزه من امها واختها : جنيتو صح!! ياخي الرجال متزوج وعنده ولدين.
غرور بدموع :ما يهمني هذا ابوي قبل ما يموت اتفق مع ابوه وجده وكل اعمامه كانوا شاهدين
اسرار بغبنه :انتي تتكلمين عن موضوع مر عليه سبع سنين يا غبيه والحين هو واقع لمرته والكل يدري عن حبه وكمان توه جاه توأم.
امهم بغضب :انتي وش عليك من اختك انتبهي لدراستك وبس انا بعرف كيف اتكلم مع اختي فرح وهي مستحيل تردني وبعدين عادي انا موافقه ياخذها فوق زوجته.
اسرارر بصدمه :يا شيخه!!! من جدكم؟ وانتي يا غرور خلي ببالك اني مو راضيه على الموضوع وهذي امي حزينه عليك عشان كذا موافقتك بالموضوع واصلا بعتقد انكم رح تفشلون نفسكم بس وانتم تدرون عن شخصيته مستحيل يرضخ لكم.
راحت لغرفتها وهي مفوره من العصبيه ما تبغى تجلس اكثر قهرتها قله مسؤوليه اختها وغبائها تبغى تتزوج برجل متزوج وعنده عيال لا ويحب زوجته بعد!!! وامها موافقه؟؟ وش تفكر فيه ياربي عقلهم يا رب.
ردت على جوالها اللي يدق..
اسرار بهدوء وابتساامه : هلا!!
رامي : هلا بالصوت وراعيه.
اسرار :تراني زعلانه منك ماتقول اتصل على اختي واتطمن عليها؟ ولا لاني اختك بالرضاعه مهملني كذاا.
ضحك من قلبه عليها :لا يا شيخه اقول طيري بس مين اللي متصل الحين انا ولا انتي؟؟ وتقولين ما اتصل ولا اسأل عليك؟؟
ردت بسخريه :بس بس ترى انا اللي جالسه اعاتبك رد وانت ساكت
رامي يمثل الصدمه :له له له الاخت صايره قويه من وين لك كل هالثقه بالله!
ضحكت معه :ما ادري يمكن من كثر هرج امي واختي ههههه عقولهم فاصله خاصه غرور ابغى اخنقها ..انتبهت لنفسها انها يمكن تجيب العيد وغيرت الموضوع : الا خالتي جنبك؟ ابغى اسلم عليها.
رامي :لا مو جنبي انا بالمجلس الحين مع آسر وعياله مطلعهم ورافع راسه للسما كأنه ما احد عنده عيال غيره لا والمشكله عياله كل واحد ازنخ من الثاني ماعندهم غير البكاااء ، سكت وقت جابته ضربه على قفاه
وسمعت صوت اسر من التلفون :انقلع غيران منهم شوف وش حلاتهم يا بغل وبعدين لمين جالس تطلع اسرار بيتنا
ضحك رامي وهو يتألم من الضربه: اقول مو لانك اكبر مني تتمادى لذي الدرجه ...
غير الموضوع وهو يشوف آسر حط ولده عشان يقوم له :ههههه شفيك صاير حريقه ياخي وبعدين هذي اختك اسرار.
آسر بابستامه : والله؟؟ من زمان عنها وعن خالتي وش اخبارهم
رامي بيأس :خذ كلمها اصلا صجت راسي ورمى عليه التلفون
تفاداه بخفه وهو يتحلفف بأخوه.
