حسابي انستا: j8e2i
"الروايه مو خياليه " تركي ولين موجودين بالواقع وصدق متزوجين"
—————————————————————-
تركي بدأ يسوق ومتجهين لمحل **** يشترون اغراض ويجهزون للملكه
العنود: لين مو متوتره مثل ايام خطبتك
لين: لا خلاص تعودت
العنود ضحكت عليها
لين بضحك: مايضحك
تركي: ليه متوتره بأكلها انا
لين: متوقعه منك كل شيء بتسويها
ضحكوا على لين ووصل تركي وبدأ يدور موقف عشان يوقف السيارة
العنود: ترى مانسيت راح تخليني اسوق
ضحك تركي ونطق: ماعليك خلينا نخلص من الاغراض ونروح اعلمك
العنود: يلا
نزلت العنود وبعدها لين ودخلوا لمحل ****
وبدوأ يدورون فستانين لهم وللبنات
لين: العنود شوفي ذا يجنن والله خذيه خذيه
العنود: قصير احسه لفوق الركبه امي ماراح تخليني
لين: خذيه ماعليك
تركي: وش آللي خذيه وخري أشوفه ، قصير شذا لا مافي دوري طويل
العنود: عناد باخذه وبلبسه
تركي: يارب امي تصفقكك
لين: تركي شدعوه خلها تاخذه وتلبسه بيوم ملكتنا حلو ومناسب مو قصير مره بيطلع تمام
تركي: بكيفكم سريع خلصوا لاني باخذ ثوبي
العنود: خلاص روح جيبه واحنا بنخلص سريع
تركي: لا ماراح أخليكم لوحدكم اخلصوا كملوا
العنود: اجل اصبر
عند - العيال-
سليمان كان يفكر شلون يخليها تنسى انه بيسوي سبرايز لجوان وبعد مدة من التفكير
سند: ذا شفيه يهوجس
فيصل: شكله يهوجس من الحُب مادريت بيسوي سبرايز لجوان
سند بضحك: اي سمعت الحريم والبنات
سليمان: كلوا زق
ضحكوا عليه كلهم
فيصل: ياخي قوم لا تهوجس
سليمان: ياخي ابيها تنسى اني قلتلها في سبرايز كيف
فيصل: عنديي
سليمان: وشو
فيصل: ارسلها رسالة ف الواتس وكذب عليها قولها مافي نصيب استودعتك الله والملكة اليوم اصلاً يعني السبرايز مابتطول
سليمان: لا فصول اخاف تتضايق وتزعل لا غيرها
فيصل: انت سوي كذا وماعليك بتفرح بعد ماتعرف السبرايز
سليمان: ها ياعيال اسويها
سند: والله الشيء بيضايقها بس راح تفرح بعدين
سليمان اخذ نفس ورسل لها ف الواتس: جوان؟
شافت اشعار له وابتسمت وردت: سم
سليمان: شتسوين
جوان: اسوي ميكب
سليمان: بقولك شيء
جوان: وش
سليمان: مافي نصيب استودعتك الله ربي يسعدك ويوفقكك اتمنى ماتزعلين وانا اسف
وقفل سليمان جواله بسرعة ونطق: قسم بالله يافيصل لا العن راسك ليتني ماسمعت كلامك
شافت جوان كلامه وحاولت ماتصيح وتتضايق وكتمت دموعها وكملت تسوي ميكب
فيصل: ردت؟
سليمان فتح جواله وشاف انها شافت رسايله وطنشت
سليمان: لااا شافت وماردت اكيد تبكي الحين ولا تضايقت حسبي الله عليك يافيصل انت وافكارك الزق
فيصل: بتستانس والله بالنهاية ماعليك انت قلت تبيها تنسى
سليمان: قلبي يحرقني ليتني مارسلتلها شيء
فيصل: ماعليك بتشوف ابتسامتها بوقتها
سليمان طنش فيصل وقام وراح متجه لغرفتها وشاف الباب مفتوح شوي وناظرها تسوي الميكب وناظرها تنهدت تنهيده قويه حاول يدخل ويقولها انه بياخذها ويحبها وماقدر يدخل وتضايق وقامت جوان متجهه تطلع وسليمان راح عشان لا تشوفه
-عند أبطالنا واخت بطلنا-
تركي: ظهررري حسبي الله عليكم خلصوني
العنود: تستاهل مين قلك تنتظر
تركي: تستهبلين أخليكم لوحدكم بسرعة خلصوا
لين ناظرت تركي يتألم من ظهره من كثر ماوقف ونطقت: خلاص خلاص خلصت تركي يلا تعال
العنود: مسرع ولا رحمتيه
لين بهمس: كليزق حرام شوفيه ظهره يعوره مارضى تعالي نطلع
تركي: متأكدين خلصتوا خلاص
لين: ايي
تركي: يلا هاتي الاغراض بدفع واجيكم انتظروني
جاء تركي بيدفع الاغراض
تركي نطق للموظف: ها كم
الموظف: ٢٥٠٠ ريال
تركي طلع فلوسه من جيبه وعطاه ودفع وشال الاغراض وطلع ونطق: يلا
العنود: ترى مانسيت السواقه
تركي: تمام يلا امشي
لين: العنود
العنود: لبيه
لين: شرأيك أنا اعلمك بكره السواقه لازم نرجع ونجهز
العنود: تم يلا مشينا
لين: مابتزعلين؟
العنود: لاا شدعوه ازعل عشان سواقه غبيه انتي
لين: امانه صدق
العنود: والله مازعلت عادي
لين: تعالي ابوسك
تركي بعد لين عن العنود ونطق: هي هي والله ماتبوسينها بوسيني انا بس
العنود: وجع تراها صحبتي قبل لا تصير زوجتك قوم اذلف سحبت لين العنود ونطقت: بوسيني
ضحكت لين وباست خدها
تركي: طيب يالين خليك قدها
لين: اي قدها ومالك دخل
ضحك تركي ونطق: امشوا بس
وصلوا للسيارة وركبوا وبدأ يسوق تركي متجهين للبيت
ونطق: متأكدين مو ناقص شيء
لين: اي ماعليك كل شيء موجود
تركي: لبس العافيه
العنود ولين بصوت واحد: يعافيك
العنود: تركي
تركي: عيوني
العنود: ابي البقاله
تركي: ابشري
تركي وقف للبقاله ونطق: يلا انزلي لا تتأخرين ها خذي فلوس
العنود: تبون شيء
لين: انا مابي جيبيلي مويا بااارده بس
تركي: وانا مابي يلا روحي سريع
العنود: تمام
تركي لف لـ لين ونطق: تدرين
لين: وشو
تركي: وحشتيني
لين ضحكت ونطقت: نصاااب والله الحين انا مع مين
تركي: معي
لين بضحك: طيب خلاص انطم
تركي: احبك طيب
لين ببتسامه: اكثر
تركي: مو كثري
لين: لا نصاب أنا أكثر
تركي: نصابه أنا أكثر
لين: انااا
تركي: اانناا
لين: جب
تركي ابتسم ونطق: تعالي قدام سريع
لين ضحكت ونطت لقدام وجت العنود وشافتها وركبت ورا ونطقت بمزح: عادي بتحملكم بتتزوجون وافتك منكم
ضحكوا عليها وبدأ يسوق تركي
عند -الحريم-
الهنوف نادت: فيصل
فيصل: سمي يُمه
الهنوف: تعال شيل الاغراض ذي للسيارة
فيصل: سمي بس يُمه ف اي شاليه
الهنوف: تركي عنده اللوكيشن خله يرسله لك
فيصل دق على تركي وبعد مده رد ونطق: هلا والله عشيري
فيصل: ارحب بزوج اختي شالاخبار
ابتسم تركي ونطق: ابد الحمدلله
فيصل: وينك
تركي بخبث: مع اختك
فيصل بضحك: ياقليل الادب ياحقير
تركي ضحك ونطق: شو بدك
لين ضحكت ونطقت: عيد عيد وش قلت قبل شوي
تركي ضحك ونطق: شو بدك
لين ضحكت عليه
فيصل: بدي اللوكيشن حق الشاليه ارسله لي عشان بنروح بدري حنا
تركي: لين قالوا بيروحون بدري بتروحون معهم
العنود: لاا نبي نجهز بالبيت على السريع وبعدها نوصل لهناك واحنا متجهزين
لين: اي احلى
تركي: يلا برسلك اللوكيشن الحين
تركي قفل بوجهه ودخل واتس ورسله اللوكيشن حق الشاليه
فيصل بضحك: قفل بوجهي أوريك ياتركي
الهنوف: ها يمه فيصل رسله لك
فيصل: اي يعيوني رسله
الهنوف: يلا بلبس عبايتي وبتاخذنا أنا والمهاا ورواف ياخذ الباقين
رواف طلع من غرفته وشافه فيصل من فوق ونطق: انزل انزل بتاخذ الحريم والبزران للشاليه
رواف: الحين؟ توه بدري
فيصل: الحريم بيتجهزون بالشاليه والبنات مادري
رواف: خلي سند ياخذهم انا مابجي الشاليه الحين وفوقها بعيده
فيصل: يُمه شوفيه مارضى روحي صفقيه
الهنوف: رواف بتاخذهم ولا شلون
رواف: بقعد بالبيت ضروري ياعمه
الهنوف: شعندك
ضحك فيصل ونطق بهمس لامه: يُمه شكله عشان الماس
رواف: وش همست لها ياكلب
فيصل: مالك دخل موضوع بيني وبين امي شدخلك
شهقت الهنوف ونطقت بنفس الهمس: ليه يحبها؟
فيصل: يموت ف التراب اللي تمشي فيه واضح يُمه
الهنوف: يونس عيالنا بيتزوجون ورا بعض من بعد تركي ولين
ضحك فيصل وقالها: يلا امشي أوديكم وبعدها ارجع للباقين
الهنوف: لا يُمه تعب عليك خلي واحد من العيال
فيصل: عادي يُمه ماعندي شيء اسويه
الهنوف: اجل يلا
طلعت الماس من غرفتها متجهه للمطبخ وشافها رواف ومشى وراها وهي ماتدري
وصلت للمطبخ وفتحت الثلاجة واخذت مويا وشربتها وبدأت تقطع سلطه لها عشان تأكلها
رواف: بوووو
الماس بخرشه لفت عليه وشافته وراحت ضربته بكتفه ونطقت: صدق انك ماتستحي تحسبني نسيت على فعلتك والله لا انتفك
رواف ضحك ونطق: شبتسوين
الماس قربت ومسكته من شعره ونطقت: يمين بالله ان سويت شيء مره ثانية صدقني لا افضحك
رواف بضحك: فكيي شعري واصلاً ماتقدرين تقولين لاحد بيصفقونا الاثنين
الماس: ماراح افك خلك كذا وانطم
رواف: مين يقطع لك السلطه
الماس: انت امسك قطع اخلص
رواف: لا تشدين شعري بقوه واقطعلك
الماس: انطم اذا مانطميت بشد زيادة
رواف: بدأ يغني ويقطع لها السلطه
الماس بهمس: وجع طلع صوته حلو بالغناء
سمعها رواف ونطق: عجبكك
الماس وهي كاتمه الضحكه: لا زي الزفت كمل قطع السلطه لا اقطع شعرك
رواف ضحك ونطق: اسمعي هالسطر
رواف: أني بالدنيا وحيدك
العمر لو ينعاد أريدك
اختصرت الكون كله
بلمسة يدييك
ضحك رواف ونطق: اي لمسة يد وهي تشد شعري
الماس حاولت تكتم ضحكتها وماقدرت وضحكت
رواف: اهخخ الضحكة جابت مو بس راسي إلا جابت كلي
الماس خفت ابتسامتها: اقول كمل قطع سريع لا تصير بطيء وراي شغل ولازم اجهز اخلص
رواف: فكي شعري خليني اناظرك زين
الماس بعناد: مافي
رواف: إذا تحبيني فكي
الماس: مين قال اني احبك مصدق نفسك ترى
رواف: واذا قلت اني احبك
الماس توترت وفكت شعره
رواف: شفتيي تحبيني
ألماس حاولت تغير الموضوع: هات هات انا اقطع وخر
رواف قرب منها: ليه تغيرين الموضوع
الماس بتوتر: ماغيرت قطع
قرب رواف وصار مقابل وجهها ويناظرون بعض
الماس لفت وجهها
رواف: خير تلفين
الماس بمزح: مابي اشوف شيء يسد النفس
رواف باس رقبتها وشهقت الماس ولفت عليه وكانت بتتكلم وقبل شفايفها قبل ماتتكلم بمعنى يقولها انه حبها وتعلق فيها
وحب كُل شيء فيها
عند -مشعل وعبدالله-
مشعل: مبسوط جداً ان بنتي بتاخذ تركي
عبدالله: اي والله مناسبين لبعض عسى ربي يوفقهم ويسعدهم
الجد متعب: ها خلصتوا يلا قوموا
مشعل: باقي بلبس الثوب
الجد متعب: يلا عشان نشوف مين بيجيب البنات لهنا
مشعل: اكيد فيصل ولا تركي
عبدالله: يلا استأذنكم
سند اخو تركي "زوج سُميه" طلع يشوف الشاليه وكيف رتبوا
وطلعت سُميه وراه وناظرها ونطق: يالله كل هالحلا لي أنا بس؟
سُميه ببتسامه: خل عنك التصريف شكلي حامل يانصاب وانت قلت خلاص يكفي القرود اللي معنا وضحكت سُميه
سند ببتسامه وفرحة: امانه صدق
سُميه: اي ماجتني الدوره تأخرت مره
سند: طيب شرأيك نروح المستشفى لسه بدري على ملكة تركي ولين وخطبة سليمان وجوان
سُميه: يلا بلبس عبايتي واجيك والعيال وين أحطهم
سند: حطيهم عند امي تنتبه عليهم ماراح نتأخر والمستشفى قريب
سُميه: يلا
راحت سُميه تلبس عبايتها ونادت المها
سُميه: ياعمه
المها: عيوني
سُميه: تسلم عيونك أنا بروح المستشفى وعيالي بحطهم عندك ماراح اتأخر
آلمها بخوف: ليه بسم الله شفيك
سُميه: لا تخافين بروح اشوف ليش الدوره تأخرت
المها ببتسامه: يارب كيكه جديده تجينا
سُميه ابتسمت لها وعطتها قبله بالهواء وراحت
واتجهت لسند ومد لها يده وابتسمت له ومسكت يده وراحوا يركبون السيارة
-
لين كانت تجهز وخلصت من الميكب وراحت تشوف الفستان
العنود طقت الباب ونطقت: ها لين خلصتي
لين: تعالي تعالي
العنود دخلت وانبهرت بجمال بنت عمها وصحبتها ونطقت: بسم الله عليك جميييلة والله مالوم تركي يوم يصير خفيف
ضحكت لين وابتسمت لها بنفس الوقت ونطقت: عشقي انتي اجمل تعالي ساعديني بالفستان
العنود ابتسمت لها وركضت تساعدها بالفستان ونطقت: لفي لفي
لين ابتسمت ولفت
العنود: عروووسه قمر ماشاءالله
لين ابتسمت ونطقت: يلا روحي البسي الفستان
العنود: يلا بلبسه واجي
جاء تركي متجه لـ لين وكان لابس ثوبه وشماغه وطق الباب
لين كانت تحسب العنود: مسرع لبستي
تركي: أنا أنا تركي
لين بمزح: لا تدخل
تركي: وليه
لين: مابيك تدخل مو غصب وماعاد ابيك لا تدخل وبس
تركي عقد حواجبه وسكت ونزل وطلعت لين وهي تضحك ونطقت: ياحمار تعال
تركي وهو يمثل الزعل: مو ماعاد تبيني شتبين
لين: امزح ياغبي تعال
تركي ركض لها وسحبها ودخل للغرفه وقفل الباب
تركي: ياويل حالي قلبتي حالي اي والله شهالزين ياتبارك الله عيون وخشم وشعر وجسم وكل شيء فيك جميل يحظيي
لين ببتسامه: اشوف لف لف
تركي بضحك: وش اللي لف لف انتِ اللي لفي
لين: أنا ابيك انت تلف
تركي: لا لفي انتِ اشوف جمالك واتأكد عشان اشوف ذا الزين كله لي مو لغيري
لين لفت وهي مبتسمه ونطقت: شرأيك
تركي ابتسم وقعد يتأملها ونطق: أنا بحلم ولا وش متأكده انتِ لي ليي محد يشاركني فيك بتكونين حقتيي
لين بضحك: لا لامك اجل لمين بالله
تركي قرب منها وقبل شفايفها ومسكها من عند خصرها وبادلته لين ولامست وجهه وبعدت شوي ونطقت: الرووجج طبعع على شفايفك
تركي: خليه يطبع فدا
لين بضحك: تخيلت شكلك قدام الناس واههه لا
تركي ضحك وجاب منديل ومسح فمه وقربت لين منه تلامس وجهه وفكت الشماغ لاول مره تنسى خجلها
تركي ببتسامه: خربتي شكل الشماغ بالقوه ضبطته
لين: عادي أنا اعدله لك مره ثانية
تركي مسكها من عند خصرها ونطق: شتبين
لين ببتسامه: ابيك
تركي انبسط على جرائتها ونطق: غريبه ماستحيتي ولا عطيتيني بس ابتسامات
لين عضت شفتها ونطقت: خلاص راح الخجل تعودت عليك
تركي ناظر شفايفها وضحك ونطق: يلا سويها
لين بخجل: لااا
تركي بضحك: اجل راح الخجل
لين تشجعت وقربت منه وناظرها تركي
وقربت تقبل شفايفه وبادلها تركي
العنود طقت الباب: ياخرا تقفلينه ليش
لين بضحك وبعدت من عند تركي وراحت تعدل الروج ونطقت: تركي هنا
العنود: تركي قسم بالله لو ماذلفت بصفقكك اطلع ولا تناظرني لابسه الفستان لاني اطلع سريع بوريها الفستان
تركي: وش لي واطلع
العنود: لك لين
ضحك تركي وفتح الباب وناظرها بالفستان وشهق ونطق: ياخرا الفستان قصير
العنود: صد ومالك دخل
تركي طلع ونطق: انتبهي لاحد يشوفك من العيال بذبحك
العنود طنشت تركي ونطقت لـ لين: والله صدق قصير بغيره
لين: ماعليك والله يجنن وبعدين حتى البنات بيلبسون قصير
العنود: احلفي مين اللي بتلبس
لين: الماس وساره والباقي بس عريان من الاكتاف
العنود: يعني حلو
لين: والله يجنن وانتِ حليتيه اكثر
العنود ابتسمت لها
فيصل جاء ونطق بصراخ: الدفعه الثانية امشوا أوديكم
تركي: اي دفعه
فيصل: الحريم الباقين
تركي: محد في
فيصل: احلف مين وداهم
تركي: مدري والله بس رجعت البيت مالقيت احد
فيصل: روح جبلي مويا تعبت
تركي: يلا
تركي اتجه للمطبخ وكان في رواف والماس
الماس بهمس: بعد عني وسوي نفسك تقطع معي السلطه وماتجهزت بسببك أنا اوريك
رواف بصوت عالي: الماس قطعي لي ولك
الماس: لا انت قطع أنا قطعت نص والباقي انت
تركي دخل وشافهم مع بعض وضحك وغمز لرواف
رواف: كلزق شعندك تغمز
الماس: بفقع عينك مسوي قافط مافي شيء جاء النشبه يقطع معي ومارضى يطلع
تركي بضحك: راح تنكشفون
الماس: ليش شايفنا خفاف مثلك انت ولين
ضحك رواف ونطق: اي صح كلامها شايفنا خفاف مثلكم يلا انقلع برا
ضحك تركي وراح يهمس لرواف: بتقول لي كل شيء
رواف بنفس الهمس: اطلع اطلع ماعليك بقولك
الماس: على وش تتهامسون لا تخلوني اصفقكم انقلعوا بروح اتجهز ابرك
وطلعت الماس بتوتر وراحت لغرفتها وفتحت جوالها ورسلت رسالة لرواف: قول لتركي لاحد يدري ولا يقول انه شافنا مع بعض والله لو قال لاحد انت موتك بيكون على يدي
شاف اشعار الماس وقرأ كلامها وضحك ونطق: تركي شوف
تركي شاف كلامها وضحك وقال: قولها ماعليها محد يدري سركم ببير
ورسل لها وقال مثل كلام تركي
واخذ تركي المويا وشرب منها وراح لفيصل ونطق: خذ
فيصل: ومين سمحلك تشرب
تركي: خذ وانت ساكت
اخذ فيصل المويا وشرب
تركي: أنا بنتظر برا قول لـ لين والعنود
فيصل: خلاص اسبقهم انت وانا باخذهم
تركي: صدق؟ في رواف والماس بعد خذهم معهم
فيصل: خلاص تم
صارخ تركي ونطق: ليين
طلعت لين من غرفتها وردت: وش
تركي: أنا بمشي فيصل بيوديكم
لين: البنات هنا؟
تركي: بس الماس ونجد وجوان وعندك العنود الباقي راحوا مع الحريم
لين: يلا تمام
تركي راح ومشى لسيارته
سمع فيصل اسم العنود وكان وده يشوفها وطلع لفوق لعند لين وهمس لها: وين العنود
لين: بغرفتها ليه
فيصل: ادخلي غرفتك وانا بدخل لعندها بشوفها
لين: لاا والله ماتدخل
فيصل: شدعوه مو واثقه ف اخوك مابيصير شيء
لين: لا مو قصة كذا بس عشانها لابسه قصير
فيصل: وتلبس قصير ليه
لين: اتفقنا مع البنات يلبسون قصير بس مو قصير مره ذاك الاوفر لا شوي لفوق الركبه
فيصل: بشوفها تكفين ادخلي غرفتك
لين: بدخل غرفتي بس لا تقول انك قلتلي ولا تطول عندها
فيصل: ماعليك يلا ادخلي
راح فيصل لغرفتها وطق الباب ودخل على طول بدون ماترد
وناظرها وبلع ريقه وقرب منها
العنود: فيصل تكفى وخر
فيصل: وش ذا لابسه قصير ماينفع العنود
العنود بتوتر: خلاص بغير لبسي بس اطلع
فيصل: ماينفع طيب اكحل عيوني
العنود بتوتر: لا
ابتسم فيصل لها وقرب منها وطبع قبلاته على شفايفها والعنود تصنمت مكانها ومن صدمتها ماقدرت تبعده
وبعد عنها وناظر عيونها
العنود: مايحق لك ماني حلالك ليه كذا
فيصل: اسف والله بس مو معناته سويتها يعني مابتزوجك خطبتنا بعد ملكة تركي ولين اختي
العنود ابتسمت له ابتسامه خفيفه ونطقت: خلاص اطلع
فيصل: ابشري
فيصل طلع من غرفتها ونطق: استعجلوا تأخرنا شوي
العنود: تمام
طلع فيصل والعنود زاد توترها وقلبها يدق بسرعة
ناظرته لين وهمست: كويس ماتأخرت ولا كان كسرت الباب على راسك
فيصل ضحك ونطق: يلا خلصوا عشان نروح
لين راحت لعند الماس ونجد وشافتهم يتجهزون مع بعض
لين: ها خلصتوا
الماس: اي خلاص باقيلي الروج
لين: يلا والبسوا عباياتكم ساره راحت صح
الماس: اي راحت مع الحريم
لين: يلا تمام ننتظركم برا
نجد: أنا خلصت خلاص بلبس العباية دقيقه روحي لجوان
راحت لين لجوان وناظرتها تصيح وقربت منها ونطقت: بسم الله عليك جوان شفيك
جوان: مافيني شيء
لين: قوليلي والله محد يدري تكفين لا تخوفيني عليك
فتحت جوالها جوان ودخلت على رسايل سليمان ونطقت: شوفي
لين ناظرت رسايله وراحت تجيب جوالها
جوان: شفيك
لين: دقيقه
لين راحت للغرفه تجيب جوالها ورسلت لسليمان: تستهبل وش ذا الكلام دخلت على البنت وهي تصيح انت واحد وصخ وترى الدنيا دواره
سليمان شاف رسايل لين وفتح الواتس ورسل: اشفي وش صار
لين: مسوي مو عارف ربي ينتقم منك
سليمان تذكر الرسالة اللي رسلها لجوان ورسل: يمين بالله يالين اني ابيها تنسى لاني قايل لها في سبرايزعشان أفاجئها تراني بالشاليه وجهزت كل شيء والله العظيم مالعبت بمشاعرها
لين: وترسل لها كذا ليه
سليمان: ماكنت برسل قسم ذا فيصل الزق اخوك وقالي بالنهاية بتنبسط
لين: خلاص اسفه احسب الكلام منجد بس مو كذا تجيها
سليمان: والله اني ندمت والله العظيم تكفين لا تخلينها تصيح هديها بطريقتك وريحي قلبها والله ماقدرت اكلمها
لين: خلاص تمام يلا مع السلامة
تنهد سليمان ودق على فيصل ونطق: خرا عليك البنت تصيح والله خلني أشوفك بس والله اكسر راسك
فيصل: بتنبسط ياتبن شفيك معصب بتنبسط بالنهاية
سليمان: ليتني ماسمعت كلامك حرام والله قاعده تصيح
فيصل: اسف والله ماقصد شيء النيه كنت اضبط السبرايز معك
سليمان: خلاص اذلف متى بتجون
فيصل: جايين بالطريق قاعدين يلبسون العبايات
سليمان قفل جواله وحطه بجيبه
-
لين راحت لجوان ونطقت: جواننن لا تصيحين مسحي دموعك
جوان: كيف ماصيح وهو حرق قلبي
لين: ماحرقه ولا شيء تعالي اعدل لك ميكبك واخليك تنبسطين صدقيني والله بتنبسطين
جوان: انبسط بوشو
لين: بتعرفين بعدين يلا تعالي
لين مسحت لها دموعها وبدأت تعدل لها الميكب ونطقت: ابتسمي مابيك تزعلين بزعل منك
جوان ابتسمت لها
لين: لبى الابتسامه يلا قومي خلصت الحمدلله الميكب ماخرب مره البسي عبايتك ويلا نمشي
جوان وهي تمثل انها مبسوطه: مين يودينا
لين: فيصل ولا تزعلين
لبسوا عباياتهم البنات واتجهوا يطلعون
رواف وهو يركض: انتظروني
لين: بسم الله الرحمن الرحيم من وين طلعت
رواف: من وين طلعت من غرفتي
لين: وليه ماذلفت معهم
رواف: كنت اتفرج مسلسل واندمجت يلا يلا امشوا
طلعوا الكل ورواف ضحك على الماس لانها كانت بتطيح من عند الدرج ومسكها
الماس: وخر عني لا تمسكني لا انتفك
لين بضحك: شفيك حاقده عليه
الماس بتوتر وبكذب: لانه الزق كسر عطري
رواف ضحك وفهم مقصدها ونطق: ابشري بعوضك ف اللي اطلق منه لا تزعلين يازوجتي المستقبلية
الماس: ويع والله ماوافق عليك جرب تقدملي عند ابوي بشوتك
رواف بضحك: نشوف والله اكلمه الحين
فتح جواله بيدق على ابوها
الماس: وش بتسوي
لين بضحك: لا رواف اول شيء دق على امها
رواف: تقولين يابنت العم؟ خلاص تم
ودق على ام الماس وبعد مده ردت ونطقت: هلا رواف
رواف: اهلين خاله
الماس وهي تقرص رواف ماتبيه يتكلم
رواف بخبث: ياخاله ابي بنتك الماس بتزوجها على سنة الله ورسوله
هيفاء: والله الشرف لنا وانت رجال وكفو والشور الاول لها نكلمها ونشوف
رواف: هذي بنتك معنا أنا والبنات طالعين لفيصل نجيكم
هيفاء: عطني ياها
رواف: خذي امك
ألماس سحبت الجوال منه وقفلت السبيكر
هيفاء: ها يابنتي موافقه
الماس بعاند: لا يُمه خليه يدور غيري مابيه ويع
هيفاء: عييب وش سوي لك ولد خالتك احترميه
الماس وهي تكابر: مابيه يُمه كسر عطري يع من زينه
هيفاء: عشان كسر عطرك بس خلاص بكيفك خليه يروح لغيرك
الماس بعدت عنهم وهمست لامها: يُمه خلاص موافقه اصلاً هو شاورني واستخرت وارتحت وماقلت لاحد بس لا تقولين لهم
هيفاء بضحك: يلا تمام تعالوا للشاليه ويصير خير ساعتها نخلص من من ملكة تركي ولين وخطبة سلوم وجوان
الماس مدت الجوال له ونطقت: ويع خذ
رواف ضحك عليها
لين بضحك: صدقني وافقت عشان كذا بعدت
الماس: لا ماوافقت وانطمي
لين ضحكت عليها واتجهوا برا
وركب رواف قدام والبنات ورا
فيصل: ها نمشي
العنود: ايي
فيصل ابتسم وبدأ يسوق
لين: هات جوالك بشغل اغاني
فيصل طلع جواله من جيبه وعطاها
وشغلت اغاني وقعدوا يرقصون ويضحكون
لين بهمس لجوان: لا تهوجسين وتتضايقين وش قلتلك
جوان: تمام
بعد مدة وصلوا الشاليه والمعازيم جووا كلهم وتركي كان فوق بغرفه وطلعت لين لعنده
وتركي ناظرها وابتسم وفصخت عبايتها لين وعدلت نفسها
تركي: مايحتاج تعدلين نفسك بسم الله عليك مثل القمر واحلى
ابتسمت له لين ونطقت: ليه مالبست الشماغ
تركي: مو قلتي تعدلينه لي يلا تعالي عدليه لي
لين ابتسمت له وراحت تعدله الشماغ وتلبسه
تركي: اكيد نسيتي تحصنين نفسك
لين بكذب ولأنها فعلاً نست: لاا حصنت شفيك
تركي: كذابه نصابه تعالي احصنك
ضحكت لين ونطقت: والله نسيت
تركي: أنا بحصنك دايم ماعليك
تركي بدأ يحصنها وهي تعدل له الشماغ ومسح على شعرها
لين: يالله قسم بالله اني مبسوطه احس بشعور غريب وبنفس الوقت حلو
تركي ابتسم من كلامها ونطق: والله مو كثري باخذ حُب حياتي وكل شيء بالنسبة لي احبكك والله اني احبك
لين: اعشققك جعلني مانحرم منك
تركي: ولا منك يارب
لين ببتسامه: ماودك نصور
تركي: وديييي ليه ماودي تعالي
مسكها من خصرها وضحكت لين عليه وبدأت تصور نفسها ومعها تركي وجلس يستهبل
لين: يزق خلنا نصور صورة حلوه لا تستهبل
تركي بضحك: يلا من عيوني
وكملوا تصوير
عند العنود تدور جوان
العنود: وين كنتي يازق من اول أدورك تعالي معي
جوان: وين
العنود: للغرفه تعالي
راحت معها جوان للغرفه
العنود: بشوف ميكبك اذا يبيله تعديل تعالي
جوان: يلا
شافت ميكب جوان وعدلت لها شوي وعطتها فستان ثاني ونطقت: يلا البسي ذا احس احلى بكثير
جوان: لا مابي اغيره ذا عاجبني
العنود: عشاني إذا تعزيني
"طبعاً عطتها فستان ثاني عشان خطبتها وهي ماتدري انه بيتقدم لها سليمان الكل داري معاد هي بتعرفون بعد شوي"
جوان: ابشري يلا بدخل الحمام ببدل
العنود: كفو
دخلت جوان للحمام "الله يكرمكم" تبدل وغيرت فستانها
وطلعت
العنود: قمر بسم الله عليك ربي يحفظك
ابتسمت لها جوان ونطقت: يلا ننزل
العنود: يلا
عند -المها-
المها راحت للغرفة اللي فيها لين وتركي
ودخلت وشافتهم مع بعض يتصورون ونطقت: اهخ يقلبي بسم الله عليكم تهبلون مع بعض
قرب تركي يبوس راسها ولين نفس الشيء
بكت المها
تركي: يُمه شفييك
المها: بكيت من فرحتي لكم ماصدقت انكم كبرتوا وبتتزوجون
تركي ابتسم ونطق: ياجعلني مانحرم منك يُمه امسحي دموعك لا يخرب الميكب
مسحلها تركي دموعها
لين باست راسها ونطقت بمزح عشان تضحكها: عاد ادعيلي ياخاله يمكن ولدك بس يقعد يزعلني
المها بضحك: لا متأكده تركي بيحطك بعيونه مو مدح فيه من زينه بس اعرف ولدي
تركي بضحك: يُمه كملي مدحك مو لازم تخربينها
ضحكوا كلهم ونطقت المها: عسى ربي يوفقكم وحياتكم كلها خير وسعادة وحصنوا نفسكم دايم
تركي ببتسامه: اللهم اًمين يارب ابشري من عيوني
لين: ابشري يعيوني
آلمها: تحصنتي لين
لين ببتسامه اشرت على ولدها ومافهمت المها ونطقت: وشو
لين: حصني ولدك
ابتسمت لها المها ونطقت: وانت ياخفيف حصنت نفسك
تركي ضحك ونطق: اي يُمه
المها: يلا الشيخ جاء الحين بتنزل عشان توقع ولين معه
تركي: سمي الحريم تغطوا؟
المها: اي
نزل تركي وراح متجه يسلم على الرجال
سند: ارحب هلا والله بعريسنا
فيصل: ياعيال احس ابي اصيح اختي بيسرقها هالزق مني
ضحك تركي وحضنوا بعض وسلموا على بعض
فيصل: حلفت ماتعيشون لوحدكم بتروحون لشهر العسل وتقعدون بفندق وتعيشون عندنا ماقدر بدونكم
تركي ببتسامه: ابد ابشر ماعليك بنقعد ناشبين لكم
عبدالله: هلا والله بولدي هلا بالعريس
تركي قرب وباس راسه: ارحب يُبه
عبدالله: عسى ربي يوفقكم ويسعدكم يارب
تركي: اللهُم اًمين يارب
مشعل: ارحب تروك
تركي: البقى ياعمي
مشعل: هاا انتبه تزعل بنتي عطيتك ذهب بالنسبة لي انتبه لها
تركي: بقلبي قبل عيوني مايمسها شيء وانا ولد عبدالله وقدها
مشعل: كفو وواثق فيك والنعم فيك رجال ولد رجال
تركي ببتسامه: ربي يسعدك ياعمي
مشعل: ويسعدكم يارب
مشعل: تعال يلا عند الشيخ
راحوا جلسوا جنب بعض وتركي جنب الشيخ "علي" يسلم عليه
الشيخ علي: الف مبروك عسى ربي يوفقكم ويسعدكم ويهنيكم
تركي: اللهم اًمين يارب تسلم
الشيخ علي: يلا توقعون انت وزوجتك
تركي ببتسامه: يلا تفضل للغرفه الثانية
قام الشيخ علي وتوجه للغرفه الثانية ومشوا معه مشعل وعبدالله
ودق تركي على لين وبعد مدة ردت: هلا لبيه
تركي: ياقلبه انتي البسي عبايتك وتعالي للغرفه اللي جنب المجلس
لين: تم يعيوني يلا بلبس واجيك
لبست لين عبايتها ونقابها ونزلت
المها: تعالي ادخلي هنا
دخلت لين لعند عمها وابوها وتركي والشيخ وجلست
الشيخ علي: يلا بسم الله تعال تركي وقع
تركي قرب يوقع على العقد
مشعل اخذ الكتاب واتوجه لبنته لين وحب راسها ومد لها الكتاب والقلم ووقعت وهمس لها: كيف بعيش بدونك ياقلب ابوك بتوحشيني
لين مسكت دمعتها وابتسمت لابوها ونطقت: بعيش معكم ماراح ابعد عنكم
مشعل ببتسامه: صدق
لين: صدقيين بعد
مشعل ابتسم لها وراح للشيخ وعطاه الكتاب
الشيخ علي: الف مبروك منك المال ومنها العيال وعسى ان يكون طريقكم كله سعادة بلا حزن ولا مشاكل وان يرزقكم الذرية الصالحه
تركي ومشعل وعبدالله بصوت واحد: اللهم اًمين يارب
طلع الشيخ علي: استأذنكم
اتجهوا يطلعون عبدالله ومشعل
مشعل: يلا روحوا للحريم واحتلفوا
لين قربت تبوس راس ابوها وعمها وابتسموا لها وطلعوا
تركي شالها ودار فيها ونطق: خلاصصص زوجتي زوجتي صرتي يالله كيف بوصف فرحتي كيفف
لين ابتسمت ونطقت: عسى ربي يوفقنا ويهنينا امشي تعال شوي للحريم عشان خطبة سليمان وجوان سريع متحمسه لهم
تركي بضحك: يعني ملكتنا مو متحمسه لها طيب طيب
لين بضحك: الا والله فرحانه تعال بس
ضحك تركي ومشى معها وتحمحم
المها: تعال تعال الكل متغطي
طلعوا تركي ولين وناظروهم ماسكين يد بعض وشغلوا اغاني واحتلفوا والبنات يصورونهم وهم مبسوطين
ساره: يلا لين خذي اكلي تركي وهو نفس الشيء
اخذت لين الشوكه وتركي واكلوا بعض كيكه وصوروهم وصارخوا بحماس وفرحة لهم
ورقصوا لين وتركي مع بعض
العنود قربت لامها بهمس: يلا يُمه خطبة سليمان وجوان
المها: يلا
راحت تهمس لتركي: يلا تركي بيدخل سليمان ويلبس جوان الخاتم
تركي: يُمه صوري لنا بشوف ياخي تحمست معكم
آلمها بضحك: ماعليك يلا روح
تركي ابتسم لـ لين ونطق: بروح خطبة جوان وسليمان بتبدأ الحين
لين: الله معك انتبه لنفسك
تركي: ابشري وانتي بعد
طلع تركي لعند الرجال يركض بحماس
تركي: وين سليمان يلا يلا اطلع
سليمان بتوتر: الكل متغطي الحريم صح
تركي: اي
اخذ نفس سليمان
العنود راحت لجوان
العنود بكذب: جوجو تعالي عند الكيكه نصور كلنا
جوان: يلا
راحت جوان وبعدت شوي العنود وطفوا اللمبات والمصوره بدأت تصور
وسليمان دخل عليها وكان وراها وتقدم قدامها وتسند على ركبه وفتح علبة الخاتم ونطق: جواني أنا اسف على الكلام بس ماكان صدق وهذاني اتقدم لك قدام الناس كلها واتمنى تسامحيني وتراني والله احبك
ناظرت جوان بصدمة وفرحة وماقالت شيء
سليمان: موافقه؟
جوان بفرحة: موافقهه
سليمان قام ولبسها الخاتم وعطوها الخاتم تلبس سليمان والكل صارخ بفرحة لهم ودمعت جوان وناظرها سليمان وابتسم وهمس: للحين زعلانه
جوان: لاا اسعد انسانه بالكون ماتوقعت تسوي كذا يعني الكل كان داري
سليمان ببتسامه: اي الكل اتفقت معهم بدون ماتدرين
جوان ابتسمت له وردلها الابتسامه وصوروهم والكل يدعي لهم بالتوفيق وخلصواا حفلتهم وراحوا المعازيم وبقوا الاهل والعرسان بالشاليه يجلسون فيها ٤ ايام عشان ينبسطون ويرقصون ..
أشوفكم ببارت ٢٣ اتمنى يعجبكم ومتأكده البارت يعجبكم تفاعلوا وراضوني لاني تعبت وضيفوني انستا j8e2i 🥹🥹🥹❤️❤️
احبكم ❤️❤️❤️❤️❤️❤️
أنت تقرأ
محبة لـيـن ذربة من القلب تكساك محبة لين صدق الهوى
General Fiction- محبة لين ذربة من القلب تكساك محبة لين صـدق الهوى -
