المَوْئِل |حِـرْزُ الأحباب|

الخيـط الثلاثون

ومِن صَارت صدُك
ردتِك ولوّ حَاجوّز
وغصُب عَذرك قِبلتَه
" تِخاف تِتعَور"
بَزلاتِك اضمُ ردتِك ضمِيرّي تِصيَر
وچذبَت الصدُگ حَتى
انتَ مِا تِخسَر !
وعَاونتِك عليّ مِن شِفت عَذِرك خِاب
قنِعت النَفِس گتِلها يَتغيّر
لا گصَرك طوّل
لا فِاض بَيك الطِيب
لا شمّسك عِلت وَ الرّاگد تِبخرّ
لا مِدك وصَل والعَيّن شافِت نوّر
لا كَسرّك جُبر!
لا لِغزك تِفسر!

سمير صبيـح
______________________

جانت غيـّم بالمطبخ تصبلهم چاي لما كعد حسن على القنفة وصارت عينـه على ايبادها المفتوح ومعروض بحث على حالة طبية جانت غيـّم مركزة تقراه قبل لا يطلب منها چاي، بس رجعت بصينيـة الچاي وانطته كاستـه وكعدت، گال
حسن؛ غيـّمي شنو رأيـج ترجعين لشغلـج؟

غيـّم؛ هو اني هم فكرت، كعدة البيت ما والمتني يراد ارجع اصمم لكم مشروع ويا كوثر التهي بين ما ارتب الوضع هنا
حسن؛ قصدي شغلج كـطبيبة غيـّم

رفعـتْ عيونـها عليه وحجت
غيـّم؛ اني مستقيلـة من سنين اذا ناسي
حسـن؛ مستقيلة مو مسحوبـة شهادتج، يعني بعدج تكدرين تشتغلين بالمستشفيات الأهلية بعقد او تفتحين عيادة خاصة

رجعت ظهرها على الكرسي تحجي
غيـّم؛ عيوني اني حالياً انحسب طبيبة ممارسة على طب العيون مو اخصائية، حتى افتح عيادة واتوقعها تنجح بخبرتي البسيطة
حسـن؛ شنو الفرق؟

غيـّم؛ لازم نكمل سنوات الممارسة بالبورد وهي الفترة اللي اكون بيها طبيبة ضمن الاختصاص المعين واشوف حالات واعالجها بصلاحيات مو كاملة و تحت رقابة جهة اشرافية وهي اخصائيين العيون بالمركز او المستشفى اللي تدريبي بيها، وراها امتحن امتحان البورد للعيون واذا نجحت بي اصير بدرجة اخصائي وهنا صلاحيتي بالشغل تكون تامة من ناحية القطاع الخاص يعني العيادة او العام وهو كل اشكال المراكز الطبية