خفـت شماتي تصرخ اي وگع..!
طاح!
وگفـت رمح على جرحـي گبال العيـّون
عبد الله الشاوي ______________________
•
•
•
•
•
- ذاك هو بيـت ابو اسماعيل الله يرحمـه، وهنـا مكان هالمحلات جان بيت ابوي وهذا الشارع اليفصلنا جان تراب بس مو مثل هسه
دارت غيـّم عيـونها تباوع وين ما أشرت ام حسن من دخلت السيارة منطقة زراعية جداً جبيرة ومسيجة وواضح تابعة لشخص واحد والبيت المشار ليـه بتعبير بسيط جان قصـر بالضخامة والبهرجة.. وكذلك بقية البيوت القريبة منه، وهنا تذكرتْ غيـّم كلام نور شلون ابو حسن بالماضي عاف بيت اهله وسكن بره وتوقعوا ما راح يرتاح بسبب تغير الظروف للأسوء بنظرهم، بس سبحان الله رغـم كل هالثراء التصرخ بيه هالمنطقة الاكيد هي ملكية خاصـة بس ما لامست غيـّم ذرة من الدفو والأمان التحسـه بدخلتها بيت الشيخ حسن سواء بغربتها لو بأنتماءها، وتعززتْ ثقتها ان البيوت بأهلها مو جدرانها واثاثها
غيـّم؛ البساتين وبقية البيوت هم لعائلتهم ؟
ام حسـن؛ اي شغلهم بتجارة المنسوجات من اجيال، والاراضي مشتركة بين اخوان اسماعيل البقية و ولدنا بس البيوت لا، رغم عمي الله يرحمه سجل البيت الجبير بأسم اسماعيل قبل لا يموت كونه جبير اخوانه والشيخ وهو اولى يعيش بيّ بس عمج رفض نرجـع لهنـا تجنباً للمشاكل وهم ما يريد يجبر امه تعيش وياي بمكان واحد والصراحة انا هم اريحلي بعيدة واربيّ اطفالي مثل ما اريد
غيـّم؛ اتفهم طبعاً
ام حسن؛ فـتنازل عمج عن البيت لأخوه الثاني اللي هو ابو سالم وزينة و ظل عايش بيّ لهذا اليوم وهو المسؤول الاول عن تجارتهم بعد وفاة ابو حسن لإن ولدي كل واحد هاوي مهنة شكل وما الهم بهيج تجارة، صح عماد عنده خبرة من ابوه بس من درس الهندسة بأجبار مني تعلق بالمجال وكمل بيها لليّوم، حسـن اساساً جان راعي دراسات و تطور واسماعيل يگول لحد يطخه خلوا يحقق طموحه دامنا بخير ورغم اعتراضي وداه من وراي للخارج سنين
أنت تقرأ
المَوْئِل |حِـرْزُ الأحباب|
Romanceرفعت راسها حتى تصير عيونها الهادئة بعيونـه التلمع ويا ضحكته، ابتسمت : - يآرَبّ كُل ايامك سعيدة و ينعاد عليك العيد لا فاقد ولا مفقود. - و ايامج يابه، بس كمليها بعد تحقيق الأماني ! رمشت و ردت بهدوء: - مو كُل امنية بيها صالح الانسان، لذلك ادعيلك يتـيّس...
