زاواج الاجبار "بالهجة الجزائرية "🇩🇿

زينو

وحد النهار في الليل خلاص كنت قاعدة نقرأ في شوية قرآن باش يجيني النعاس ايا سمعت حاجة تكسرت في الكوزينة نضت نجري لقيتو رافد جا يهز كأس معرفش حتان طيحطبسي كسرو روحت لعندو تجرحت ؟؟؟؟" معرف كيفاش خرجت من فمي و انا حاكماتو و نشوف فيه و نرعش لقيتو تجرح من صبعو و انا نغسلو حتان قالي زينو راهو مريض جيت نجيبلو كأس ما " مكملش حت هدرتو روحت نجري لزينو مع شفتو نضت نبكي

كي شفت زينو في هذيك الحالة وليت نبكي وحدي حضنتو كان يغلي وجهو احمر طماطم من السخانة و في جسمو بقع حمر انا مفهمت مانديرلو غير نبكي جا رافد شعلت فيه هاااه شوف وش صرالو ؟؟؟ ياك نتا لمهتم بیه و قادر دیرلو کلش و نتا كأس ماء مش قادر تجيبو ... والله يا كاشما يصرالو ما نسامحك " في هذيك اللحظة كرهتو زينو راحيموت بسبتو

هزیت زينو ديتو للدوش نغسلو بالماء البارد و هو تقول ميت و انا غير نرعش و نبكي لبست خماري فوق البيجامة شعلت الطوموبيل مقدرتش حت نسوق مخرجتش حت من الكراج نضت نبكي و نعيط يا ربي علاااااش يصرالي هكاااا يا ربي إديني انا و متديهش هو .... جاني رافد صاي بلا بكي و اخرجي راهو جا محمد " خرجت نجري مش سامعه حت وش راهو يهدر

ركبنا و دانا للسبيطار علابالكم وش صرا ؟؟؟ دخلوه طول للكوما .. مع سمعت ديك الكلمة طحت في بلاصتي

فطنت صبت روحي راقدة في شمبرة دايريلي السيروم و معلاباليش وشيه نضت نجري نحيت كلش حكمتني مرت محمد قاتلي "شهد" بشوية قالك الطبيب ملازمش تنحيه حتان يخلاص"

شفت فيها "زينو ... زينو وينو ؟؟ إديني ليه ربي يخليك " كنت نحلل فيها أول مرة تصرالي أنا شهد نحلل مرا منعرفهاش ؟؟؟ بصح مكنت مهتمة بوالو غير بزينو وقفت معلاباليش حت وين نروح و هي حاكمتني

لقيت يماه (أم رافد تشوكيت كي شفتها روحت نجري لعندها و نا نبكي خالتي" علاش جيتي ؟؟ زينو حكماتو سخانة برك يخي راهو لاباس ؟؟"

حضنتني و قاتلي كان يعيطلك و يحوس عليك .." بعدت عليها وينو إديني ليه ... كان قلبي يتقطع غير حابة نشوفو حكمتني و قاتلي " يا بنتي هذي هي الدنيا و هذي هي سنة الحياة " بعدت عليها و ملامحي تبدلت خلاص مبقيتش نسمع مبقيتش نشوف حسيت الدنيا تقفلت في وجهي ....

آخر حاجة كنت نتوقعها في حياتي !!

بغيت نعرف الذنب لي درتو حتان الدنيا تجازي فيا هكا !!! وش راح نحكيلكم وش نخلي بكيت عيطت ندبت ضربت رافد سبيتو ماخليت ما درت ماجيت نفوت الازمة نتاع محمد كان بالسيف و كي فتها جاتني أزمة وحدة أخرى ...

ما تنساوش تخلولي نجمة و تعلیقات باه نشوف رأيكم ...