زاواج الاجبار "بالهجة الجزائرية "🇩🇿

وش ذنبي !

بغيت نعرف الذنب لي درتو حتان الدنيا تجازي فيا هكا !!! وش راح نحكيلكم وش نخلي بكيت عيطت ندبت ضربت رافد سبيتو ماخليت ما درت ماجيت نفوت الازمة نتاع محمد كان بالسيف و كي فتها جاتني أزمة وحدة أخرى وليت ما نبغيش نشوف في رافد خلاص غير يقربلي نشعل فيه هذا الشي كامل بسبتو بعدو عليا شهر ولا كتر كنت نتمنى غير يرقد عندي خلاهالي حرقة في قلبي زينو الله يرحمو كان مريض من قبل وحنا مش فايقين بيه حكماتو "مينالجيت شغل فيروس في المخ يجي من السخانة كان دايما يقولي راسي يوجع كنت نديرلو الاسبيجيك و الكمادات و صاي مي جامي خممت في حاجة كيما هك ... هذاك النهار خرج مع باباه و بقى يلعب تحت الشمس صرعاتو كي رجعو للدار زينو ماشكي من والو تغداو و رقدو نورمال مي لعشية هذيك حسيت بيه مش نورمال و طلعتلو السخانة دوشو و درتلو دواء ساعة ساعتين ناض نورمال يعني مكنتش متوقعتها خلاص

فات على هذاك الحادث لي منحبش حت نتفكرو شي شهر جاو دارهم راجعين للبلاد و انا من هذاك النهار مشفتش رافد تكمشت في نور و قلتلها إدوني معاكم مش باغية نقعد هنا " قعدتني نور فوق السرير وقاتلي " شوفي اشهد كلش صرا من عند ربي ... و لازمك تكبري بالك معاه مش ذنبو الله غالب بلاك جاتو في بالو ولدو راح يكرهو كي كان لاصق فيك عل هذا الشي حاول يجبدو ليه .... نضت انا نبكي مي منقدرش نقعد معاه ... نتفكر زينو ..." قالتلي هذا هو الوقت لي لازم توقفي فيه معاه حت هو اب و متأثر أكثر من أي واحد فينا ربي يحفظك أصبري برك معاه و يفرج ربي ..."

اقتنعت شوية برك بهدرتها سلمت عليها و راحت بقيت انا في الشمبرة نبكي حتان رقدت

فاتو ایامات و نا منشوفش خلاص في رافد نطيبلو و نحطلو کلش فوق الطابلة ونروح و هو حاول شحال من مرة يهدر معايا و انا والو ....

منكذبش انو توحشتو بغيت نرقد عندو نحضنو نوكلو و نشربو .. نلبسلو قشو نغطيه كي يكون راقد نهتم بيه كيما كنت مي مقدرتش في الفترة الاخيرة هو لي بعد عليا كنت كل ما نشوفو نوض نبكي تالمون متوحشاتو و متوحشة هذاك رافد الحنين لي كان ينحيها من روحو و يعطيهالي

وحد النهار كنت ندير في الميناج للدار رافد كان مزال راقد و انا دار كامل معمرة بالماء والصابون كنت في الكوزينة نغسل في الكوشة و هذوك الصوالح حتان نسمع في خبطة خرجت نجري لقيتو رافد طايح في الأرض روحت لعندو شديتو باش نوقفو مقدرش يوقف رافد" راك صافا ؟؟ جرب أحكم فيا برك و أوقف ... حاوطتلو يديه عل كتافي و نضت باش نوقفو حتان نسمعو قال مش قادر نوقف ... خليني ذرك نوقف وحدي " شعلت فيه كيفاش توقف وحدك و نتا في هذي الحالة ؟