قسمة ونصييييييب 🍁 🍁 🍁

حب ممزوج بفقر ..الحلقة الاولي🌻🌻🌻

🍁🍁 قسمة ونصييييييب 🍁🍁
رواية من تأليفي....... اتمني ان تلاقي اعجابكم .
امنبدوا نحكوا علي في هذه الرواية علي عائلة تتضمن الام اسمها ماجدة والاب اسمه سليم ادزوجوا بعد قصة حب طويلة عريضة فكان سليم يحب مرتة ماجدة حب مش عادي وكذلك ماجدة اتحبه وتحترمه هلبا في البداية كانت احوالهم المادية مش كويسة لكن ماجدة وقفت مع زوجها وحبيبها سليم واتحدث كل شيء علي خاطره كانوا عايشين في دار بالايجار فبدت هيا اتطيب في حياش الناس مقابل الفلوس وتساعد في راجلها اللي كان يخدم في شركة بوظيفة متواضعة ومرتب قليل...اتفقوا انهم مايجيبوش اصغار في الوقت الحالي لان ظروفهم ماتسمحش مع انهم كانوا يحبوا الصغار هلبا وهادي كانت امنية حياتهم ...
فاتت شهور وايام وبدت تتحسن اوضاعهم بالشوي بالشوي وبدو يدسوا في الفلوس باش يقدرو يشروا حوش كبير لان يبوا يملوه بالصغار زي ماتحلم ماجدة ديما ....المهم قعدوا قريب ثلاث سنين....... وهما يجمعوا في الفلوس ويحرموا في روحهم من كل شيء ....ويخدمو ليل نهار ...حتي سليم ابدي يشتغل في شغل إضافي وترقي في الشركة وابدي مرتبة محترم وماجدة بدت اتطيب عندها في حلويات وتورتات ومأكلة وتبعت للمحلات ....يعني الاوضاع بدت تتحسن

بعد مرور سنة ونصف......
ماجدة كانت ادير في طلبية في المطبخ وحست روحها دايخة قعمزت علي الكرسي وقعدت شادة راسها حاساته يلف هلبا .....
خش سليم من برا افتح الباب وحط مفاتيحة وابدي ينادي...مجودة ~مجودة وينك ياروحي ...وخش للمطبخ شاف ماجدة مقعمزة قرب منها وقاللها عندي ليك مفاجأة سارة ...
ماجدة قامت راسها من علي الطاولة بوجه شاحب متعب قالتله بصوت مجهد اهلين سلومة ...
سليم :العفو خيرك ياماجدة شني مريضة والله وجك يخوف هذا كله تعب
وفجأة ناضت ماجدة تجري للحمام حاشاكم وبدت ترجع وسليم يطق علاها وينادي ماجدة ماجدة طمنيني عليك ياماجدة بالله عليك ردي عليا .....
انفتح الباب وطلعت ماجدة وهيا شادة الفوطة تمسح في فمها وقالتله مافيا شيء بالك واخدة بردة ...
كانت عيون سليم كلها خووف قاللها غدوة لازم تمشي للدكتور وتطمني ....ردت عليه ماجدة مافيش داعي ....
سليم (بنبرة حنان) :لا في داعي لازم تمشي غدوة هذا اخر كلام عندي
ماجدة :خلاص حاظر
...........................................................................
في صبيحة اليوم التالي 🌞🌞
ناضت ماجدة مخلوعة شافت الساعة لقتها 11 ناضت من السرير فيسع فيسع وقالت معقولة اني رقدت لتوا لا مستحيل ..لكن والله حسيت روحي تعبانة امس وشهقت اههههيئ حي عليا حتي سليم طلع ومادرتله فطوره تيح سعدي وياقهرتي الراجل طلع وبطنه فاضية...وخشت للكوجينة فتحت الضيء لقت فطور محطوط علي الطاولة ومغطي ولقت ورقة فتحتها (صباح الخير ياعمري لقيتك راقدة مابيتش انوضك حضرتلك فطور ماتعبيش روحك وصحتين وهنا ....ملاحظة ماديريش غداء وماتنسيش تمشي للدكتور )ابتسمت ماجدة لا إراديا وحست روحها طايرة من الفرح قعمزت فطرت وضمت الماعيين وفجأة اذكرت امس لما كانت مريضة وسليم خاش قاللها علي مفأجاة لكن راحت منه الخريطة لما لقاها مريضة وماقللهاش شنهيا المفأجاة ......
ضمت الحوش وحست روحها مريضة هلبا لبست حوايجها وقررت انها تمشي تعاين
.................................................................
في عيادة الدكتور كانت ماجدة مقعمزة وحاطة ايدها علي خدها وتستني في دورها وبعد ساعة طلعت الممرضة ونادت اسمها. ....خشت ماجدة للعيادة وابدي الدكتور يفحص فاها وبعدين طلب منها ادير تحليل وتستني نيين تطلع نتيجة التحليل .....
في هذه الاثناء عاد سليم للبيت خش يدور علي ماجدة لما مالقهاش قال اكيدة عند الدكتور قعمز علي الكرسي..... وابدي يفكر وقال انشاالله ايصير منه الموضوع والله كان ماصارش منه حياتي تدمر وابدي يقول سامحيني ياماجدة خبيت عليك سامحيني لكن بإذن الله حنقولك في الوقت المناسب .....
نرجعوا لماجدة امقعمزة ومتوترة هلبا وخايفة من نتيجة التحليل نادتها الممرضة وقالتلها النتيجة طلعت تقدري اتخشي تستني الدكتور خشت ماجدة وهي خايفة قريب تموت قعدت اشوي وخش الدكتور شاف التحليل واسألها انتي قداش ليك سنة متزوجة .....قالتله 4سنين ونصف ...قاللها بتعجب معقولة .....سكتت ماجدة تستني في الدكتور شن بيقللها ..............................................................................................يتبع........ ..................................
انتهت الحلقة الاولي من رواية قسمة ونصيب هذا كله اللي قلناه وقاعدين ماخشيناش في ابطال القصة والشخصيات الرئيسية هادي الحق اول رواية امنكتبها وقاعدة مش عارفة حتي النهاية نتمني تلاقي اعجابكم ولو لقيت تفاعلكم زاد ولا يكاتكم حنبعت الحلقة التانية ....... في مجموعة اسئلة علي الحلقة الاولي
اول حاجة زعما شن بيصير في ماجدة وهل يطلع عندها مرض خطير لا سامح الله او ان شيء عادي ؟تاني حاجة زعما سليم شن مخبي علي ماجدة وهل هوا شيء يمكن يدمر حياتهم؟ وهل في اشخاص حيدخلو في حياتهم وحتتغير؟ كل هذه الاسئلة حنلقوا لها اجابة في الحلقة الجاية تابعونا..........................................................................................................................................................................................................................
🌹🌹🌹🌹🌹🌹هنايا القدر🌹🌹🌹🌹🌹