قسمة ونصييييييب 🍁 🍁 🍁

الحلقة الثانية 🌻🌻🌻

فتح الدكتور الباب بسرعة وينادي بصوت عالي  الممرضة  فيسع جيبي طاسة امية فيسع المراة داخت  .....
.....................................................................
في هذه الاثناء كان سليم في البيت حس بالملل وهوا يستني في ماجدة وقال احسن شيء نطلع نكمل شغلي وانشيك علي الامور وخلاص
.........................................................................
بعد ساعات🕡🕓🕡🕓
رجعت ماجدة للبيت وعيونها مليانة دموع وخافت ان سليم يكون في البيت ويشوفها انها كانت تبكي وقفت قدام الباب وبدت تمسح في دموعها دورت المفتاح من الشنطة طلعاته وفتحت .....
شافت في البيت لقاته قاعد ماجاش تنهدت بقوة وقالت الحمدالله خشت غيرت حوايجها واتكت ......
خش سليم بعد ساعات قليلة لقي اضواء البيت مسكرة والحوش هادي عرف ان ماجدة راقدة خش بشوية ماباش يديرلها ازعاج لكن في نفس الوقت كان خاطرة تنوض باش يعرف شن صار في نتيجة التحليل.........
...........................................................................
في صبيحة اليوم التالي 🌞 🌞
ناضت ماجدة من الصبح قبل ماينوض سليم حضرت الفطور وبدت اتشوف في الحاجات الناقصة لان اليوم عندها طلبية سجلتهم ونزلت للسوق.....
استاقظ سليم مالقاش ماجدة بحداه تأفف بضجر وناض غسل وجه وسنونه وتوضأ وصلي وخش المطبخ لقي الفطور جاهز قعمز يأكل ....
خشت ماجدة من الباب حطت المفاتيح ودخلت للمطبخ
ماجدة: السلام عليكم
سليم:وعليكم السلام.   شني عندك طلبية اليوم وينك من الصبح
ماجدة :عندي طلبية كبيرة ونزلت نجيب في حاجاتها من السوق
سليم :امممم ربي يعاونك حبيبتي ...ايه حقا شن صار في العيادة امس شن قالك الدكتور
ماجدة (في هذه اللحظة زي من صب علاها سطل مية باردة ) :ااه شني اممم ماهو
سليم :(لاحظ ارتباكها):خيرك حبيبتي في شيء خيرك مرتبكة وخيرا وجك انخطف لونه
ماجدة:اني لالا خيرا وجي مافي شيء اني غر كن
رن تلفون سليم وقطع علي كلامها خداه سليم وقاللها بعدين تو نكملو كلامنا وطلع من البيت ....
تنهدت ماجدة براحة وقالت الحمدالله وحست بأنها تايهة مش عارفة شن بدقوله وبدت تبكي وادقول ياحليلي ياحليلي ياربي ساعدني اني والله ماعاد قادرة نتحمل اني مستحيل نقدر نواجها مستحيل ياحليلي شن بتكون ردة فعلة ااااه اني ااااه اتعودت علي الهم والحزن وحتي لما منجي نفرح مايطلعش عليا اني مانبيش نخسر سليم مستحيل نقدر نعيش بدونه حتي حالتنا تحسنت اشويا لكن مازال المشوار طويل اني لازم ندير حل وبدون مايعرف سليم لازم نتخلص من هالمصيبة اللي اني فاها..لازم توا خلي نتم الطلبية بعدين اندبر ...............................................................................................................................................
سليم :والله ماني عارف ياصاحبي علاش ماقلتلهاش
مصطفي:تو فاش جت تدريقتك للموضوع انت كل شيء تحكيهولها جيت في هادي ووخرت
سليم :مانبيش نعشمها ومرات مايصيرش منه الموضوع مانبهاش تاخد علي خاطرها كل شيء في وقته حلو
مصطفي :علي راحتك
سليم :شن مشاريعك بعدين
مصطفي :والله ياصاحبي امنمشي نرفع اختي للعيادة تعرف مسكينة ترملت بكري بكري وماعندها حد غيري
( مصطفي صديق سليم من ايام الطفولة وقعد مش متزوج يعني اعزب وهوا شاهد علي قصة حب ماجدة وسليم من البداية )
....................................................................................
ماجدة تمت الطلبية واستلمت فلوسها وقعمزت علي الكرسي والشطان ابدي يوسوسلها يمين ويسار وقعدت تفكر مالقتش الا حل واحد .
قعدت ادقول:مافيش الا هكي اني لازم اندير العملية سامحني ياسليم مستحيل نقدر انقولك اني حنتحمل كامل المسؤلية وحنكون مسؤولة علي قراري اتصلت بصاحبتها الوووو ايه غادة بالله عليك اني نبي نطلب منك طلب انتي لازم تساعديني لكن ردي بالك ادقولي لسليم ........
.........................................................................
لبست احوايجها وقررت بعزيمة انها لازم ادير العملية وماتخسرش سليم لان هوا اكبر من كل شيء هي تتمناه ركبت  في سيارة صاحبتها وامشت
................................................
في هذه الاثناء رن تلفون سليم وهوا راجع للبيت درس السيارة ورد ...
سليم :الووو مصطفي
مصطفي:الفففففففف الف مبروووووووووك ياصاحبي غر نبو الزردة بس
سليم (مصدوم):تي خيرك شن فيه علي شن تبارك
مصطفي:تي ياراجل ابديت صاحب املاك وتتكلم اسكت اسكت اني نقولك من توا اني مندرهلك كبدك منقعد بايت عندك سنة كاملة
سليم :ابدي يضحك هههههههههه قصدك صار منه الموضوع
مصطفي :تي امالا شني ياراجل معقولة صاحبك يحط ايده في حاجة ومايصيرش منها
سليم :الحمدلله واخيرا نقدروا نتهنوا اني وماجدة والحوش الكبير اللي نحلمو بيه ديما اهو انشالله بيبدا ملكنا
مصطفي :عاد اني حصلتهولك وانت عليك الاقساط لكن كان نعرف علاش ضايقت روحك واخديت حوش كبير هلبا  المفروض اخديت حاجة صغيرة توا وبعدين ساهل
سليم :تي لالا هكي خير ياراجل انت وين حقا في بحداك دوشة
مصطفي :اني في العيادة مش قتلك جبت اختي تعاين
سليم :باهي امالا انشالله يكون بالعون اني خنمشي نبشر ماجدة اكيد حطير من الفرحة
مصطفي :قال بالسلامة وسكر
وناض دس تلفونه في جيبه وانشل من الصدمة .....
...................................................
خش سليم للحوش وابدي ينادي مجودتي مجودتي غر تعالي عندي ليك خبر يهببببل مجودة تعالي دور في الحوش كله مالقاهاش تأفف وقعمز علي الكرسي قعد اشوية وبعدين  حط تلفونه علي الكرسي وخش يغسل في حمام       🍇🍇🍇🍇                   ..................................................................
نرجعو لمصطفي اللي ناض يمسح في عيونه يبي يتأكد انه اللي يشوف فيه صح ولالا
ماجدة واقفة هيا والممرضة ويحكوا وصاحبتها قالتلها اني لازم نمشي تأخرت علي الحوش امشي سلمت علاها ماجدة وقالتلها صحيتي وبارك الله فيك ودخلت الممرضة ماجدة لغرفة العمليات
امشي مصطفي حاول يلحق علاها ماقدرش خشت قبل مايوصل فاها   استغرب  انها ماشافتاش وهي شن ادير اهني واكيدة سليم مايعرفش امشي طلع يجري لصاحبتها بالك يحصل معلومة ويعرف خيرها ماجدة  امشي يلحق علي نوال وقعد يقول يأختي يأختي لو سمحتي تلفتت نوال قاللها انتي تعرفي ماجدة قالتله ايه ماجدة صاحبتي
مصطفي: خيرها ماجدة خشت لغرفة العمليات شن فاها
نوال:(ارتبكت وخافت ادقوله)ااااه امممم مانعرفش اني كنت نبي وسكتت
مصطفي:عصب علاها تكلمي خيرها ماجدة( وناض يهدد فاها باش تخاف)اسمعي لو صار لماجدة شيء انتي وحدك مسؤولة فاهمة
نوال:فزت زي المجنونة خلاص اني تو نحكيلك كل شيء
....................................................................
مصطفي انتي شن ادقولي مستحيل معقولة ماجدة ادير هكي انتي شن ادقولي مستحيل وكيف مادقولش لسليم وكيف اضحي بروحها هكي
لازم سليم يعرف لازم وابدي يتصل والنقال يشرين ومافيش حد يرد وابدي يعصب مصطفي ويتصل ومافيش اجابة وقف قدام حجرة العمليات وحاول انه يفتح لكن الحجرة مسكرة وممنوع الدخول ابدي يتصل وي المجنون ومافيش من يرد حذف التلفون علي الكرسي واضرب ايده علي الحيط .......
سليم يغسل في حمام ويغني فرحان نسم علينا الهواء من مفراق الوادي وياهواء .....
ماجدة متكية علي السرير والدكتورة ادجهز في ادوات العملية وقالتلها ماتخافيش اشوية وانديرلك ابرة المخدر..........................................................................................انتهت الحلقة التانية انشالله  تكون لاقت اعجابكم وكان عجبتكم ماتبخلوش باللايكات لان دعمكم هوا سبب استمراري
في اسئلة هلبا في الحلقة
اول حاجة ماجدة زعما شن فاها وخيرها مابتش ادقول لسليم وشن هيا العملية اللي بديرها وهل يقدر مصطفي بعد ماعرف سر ماجدة ان ينقدها ويقوول لسليم وهل يقدر سليم اني يجي ويرد علي تلفونه قبل ماتبدا العملية  .......
كل هذه الاسئلة اجابتها حتكون في الحلقة الجاية
........................ .............. .... .     ...............   .......
🌹🌹🌹🌹هنايا القدر 🌹 🌹 🌹 🌹

.................................................