قسمة ونصييييييب 🍁 🍁 🍁

الحلقة 30 🎉 《 إجهاض حب 💔》

رواية قسمة ونصييييييب 🍁 🍁
الحلقة 30 🎉🎉🎉
بعنوان {{ إجهاض حب💔 }}
في الكوجينة
احلام ونورا
احلام : تحبه هلببا شكلها.
نورا : اييييه واللهي وجعتني ، حتي اللي حباته سيبها .
احلام : ومن قالك سيبها ، يباها وشاراها .
نورا " بصدمة " : كييف ! !
احلام : اني حكيتله كل شيء ، واعطاني رقمه وقالي اعطيهولها ، وكان بتكلمني اليوم نعرف انها شاريتني وتبيني ، وكان مش حتتكلم حناخد اول طيارة ونسافر الليلة .
نورا " بارتباك " : باهي وانتي بتعطاها الرقم ؟؟؟
احلام : ايه امالا شني واالله كنهذا توريني ، اني قلت خلي تهدي شوية ونطلعه مش شنطتي ونعطيهولها .
نورا : اااااه تمام .
---------------------

الكل تلفت للصوت
القي جيهان واقفة وشادة الموس وحاطاته علي وريدها
الكل انصدم
ايمن ومروان امشوا شدو بووهم وحاولو يهدوه
نضال طلق سيف وقعد يشوف لجيهان وعيونه تدمع
جيهان واقفة ترعش ووجها احمر وعيونها منفخة من الدموع .
عمي محمد " بخوف " : بابنتي استهدي بالله وحولي الموس وخلينا نتفاهموا .
جيهان " برعشة ودموع " : ممم ممافييش ععع علي شش شني نت نت نتفاااهمو يااااعممي .
عني صلاح : اللي تبيه يصير بس حولي الموس تربحي .
ربيع بيقرب منها
جيهان " قربت الموس أكثر من وريدها " : لااااااا لاتتحركوووا ، واللهي حررركة واحدة نقققتتل روووحي .
ربيع : خلاص خلاص غر نحي الخرا من ايدك بس .
نضال " يشوفلها وحاسس قلبه تمزق " : جيهاااان تربحي ماديريهاش ياجيهان لاتموووووووتي ، اهونلي تكوني مع غيري ، من انك تنتحري ،ماتمشيش وتسيبيني تربببحي ياجيهااااان تربببحي .
جيهان " تبكي بحرقه " : معاش ينفع هالكلام توا يانضال ، اني معاش قادرة انكمل في حياتي ، تعبببت تعبببت وربي اتعببببت .
سيف " بغضب " : ياجيهان هذا ماهوش كلام ، انتي توا مرتي  وحلالي ، ومش مفروض تحني لهذا الكائن ، وتبي تنتحري علي خاطره تاني ، اني شن ناقصني باش ماتحبينيش ، شن العيب اللي فيا باش تكرهيني ، وتحبي الزبالة هذا .
نضال " ابدي يضرب فييي سيف بقوة "
جيهان " بصوت عالي " : خلاص سيبه سييييبه ، معاش عندي شن انديرلك يانضال ، اني بديت مرته وانحكمت اني انكمل حياتي معاه فلو سمحت اطلع وخليني في همي .
نضال " بصدمة " : كيييييييييييييييف؟
خشت سعاد للمربوعة " بغل " : زي ماسمعت ياولد فاتن ، البنت مش لييك هوينا وافرقنا بريحة طيبة .
محمد " بغضب " : اطلعي برا يامرت خووي ، فيه تريس في المربوعة هما اللي يعطو الكلمة مش انتي .
سعاد " بعصبية " : هادي بنتي واني حرة فاها ياسلفي محمد ، واظني انكم في حوش .
محمد ومصطفي ارقالهم
مروان " بغضب " : يمه شن هالكلام تربحي خشي داااخل .
ايمن : بالله عليكم ماترعشوش بوي ، البنت ابدت مرت سيف ، وخلاص معاش فيه ترااجع ، وماليهاش لزمه كل هالدوة هادي .
بو سيف : ياجماعة الخير اني وولدي طالعين وموعدنا بعد اسبوعين في العرس وهادي خلافات عائلية بين بعضكم ومانبيش ندخل فاها السلام عليكم وطلعو .
سعاد " فكت الموس من جيهان "
نضال " شاف لجيهان بحسرة والم " : مبروووك تتهني .
وطلع
لحقوه عمامه وربيع
جيهان " ركبت لدارها وانهارت بالبكي والدموع "
ايمن ومروان طلعو بوهم للمصحة لانه تعب شوية
قعمزنا تغدينا وجوو وتهديرز وضحك من الاخير حطينا الصفر للرجالة واصفر للنساوين خشو جيران حوش جدي خالتي فتحية وامال يباركو لاحلام حطينالهم قعد رشدة وامبطن ومشروب وفاكهة ، خشينا احني البنات داخل لدار الدقعميز كلينا وابدينا نلكحو علي خالتي فتحية ، الي كل ماتخش لمكان تبدا تحكي علي بنتها وجمال بنتها وطول بنتها. وووو امتع اخطباها ، واللهي جوها يفلق هالمراة ، شوية وخشت ام نورا الحاجة مرتوبة ، اي حي عليكم حي هادي العزووز علي قداش مانحبها ديما ندير علاها في قيسطوات ملاح ، اول ماخشت جتني تجري تبوس وتحضن وتتحمدلي بالسلامة علي طلعتي من المصحة ، قلتلها هذا وين تفكرتيني ياعمتي مرتوبة ، قالتلي توالله مابو يجيبوني هالعاقيين ، مالقيتش من يجيبني ،اللي يقولي كرهبته عاطلة واللي يقولي جهده طايح ، ادقولي جايبيني علي زنقرتهم هال .. والا خليني ساكتة  ، قعدنا نضحكوا وقعمزت جنب بنتها نورا  وابدت اطبق في فراشيتها وترادع في رداها وهديكا القصة اللي طالعة علي الجنب ، جيتها بستها ودرتلها رووج احمر فاقع ، ونورا تضحك وادقولي لاه عليك يالولو والعيلة مفلوقة بالضحك ، وعمتي مرتوبة شيء لاتعليق شكله عجبها الجو ناضت ادقولي ديريه حلللو واللهي نوريك يامورا ، ماتسالوش علاش تنادي فيا بمورا هادي تدليعه خاصة من عمتي مرتوبة ربي يحفظها ، قلتلها ياعمتي مرتوبة مفروض لبستي قفطان مغربي ولا دشداشة تطلع عليك خيال ، قالتي زيدي غادي عليا باش تبيني نبدا مضحكة ، قلتلها تغر علاش ياتوتي تبدي مضحكة راك ادقولي كبرت علاها تراهو الشباب منك ونازل ، فنصت فيا وقالتلي تلالا مخليتها لغدوة للبيان شريت دشداشة علي الاحمر وفاها البزاري وهداكايا الكعب ازي انتع تراك بالضبط ، واحني شادين ضحكتنا غر بالسيف نضت نجري اني وتغريد وندي وانفلقنا بالضحك في الكوجينة .
باب الكوجينة البراني يخبط امشيت فتحت القيته ربيع ، ووجها اصفر ، قتله خير دعوتك يابيعو ، قالي حالة وخلاص اليوم اتخزرطناها اتخزريطة مليحة ، قتله شن فيه وابدي يحكيلنا وقال انقرت فاتحة جيهان واني والبناويت انعيطاها عيطة بقووووةة.  ربيع : تي ياعن شكلك انتي وياها ، طرشتولي وذاني ، تشن تبو تطرشوني قبل ماتوصل اللي بتحصل عليا ، واني انفلقت بالضحك ، انت واخد مقلب في روحك راهو ، تي البنت اللي بتاخدك امها مسحسحة علاها نيين عيانة ، تي حصلة مغبرة مزقحة فوق راسها وراس اللي جابوها ، ربيع انصدم قالي بالحق للدرجة هادي حالتي ميؤووس منها ، قتله امالا شني ههههههههههههه،  قالي اااااخ كان تلقيلي واحدة معمي علي قلبها وتوافق عليا بس ، قالتله ندي اني عندي واحدة تمشي مع وضعك ، قاللها حسستيني اني شاباني ارمل وجاي بيدزوز علي عزوزته ، سناء من كثرة الضحك طلعت تجري للحمام ، اني مقعمزة علي الكرسي وشادة بطني ، ربيع قال لندي بالله اتحفيني من في رايك تليق بحضرة ربيع باشا المحترم ، ندي قالتله توا غدوة نقول لامي تمشي تخطبلك الحاجة مرتوبة ام نورا مرت عمك ، ربيع ناض مخلوع نيين الكرسي طاااح واحني مبطوحين علي بطوننه بالضحك ، تغريد قالتلها ونعم الاختيار ياندي طلع عندك دوق عههههههه ، ندي قالتلها صقع علييك ، ربيع اخدي المكنسة ويجري وراء ندي وتفتح باب الكوجينة البراني وادجي بتطلع واتكب في مروان وادجي طايحة علي صدره ، احني كلنا ابدينه  احمم احممم واللي ادقول اني صقعت وعمك ربيع احشي راسه في الدولاب علي اساس يدور في فازو النوتيلا وينادي ويقول يالمار وين النوتيلا ، قتله راحت عليك فاتاتك نوتيلة جولييت وروميو،  مروان اتحشم ووخر علي ندي وندي قد مانوصفلكم حالتها نعجز هديكا اللحظة نص متحشمة نص عاجبها نص دايبة نص مستاقظة ، مروان قال لربيع ليا ساعة باعتك ادجيب الشاهي للاولاد برا وانت فاتحها مربوعة ومنسجم وتهدرز اهني ، امشي قتله شن تبي نطلعلكم ياميرو ، شافلي بنص عين ، قالي من امتي والشمس ترقعنا ، وميرو تاني غر شن تبي شن تبي ، قتله اني مانبي شيء غير انك تصون الامانة وغمزته ، افهم مروان اني نتكلم علي ندي،  قتله ماداما الميا رجعت للمجري لازم اتحافظ علي المية كويس باش ماتجفش ، لانه المرة هادي رجعتلك المية ، لكن لو تهدرها وماتحافظش علاها اضيع من بين ايديك ، دارلي تحية الشرطة امتع اليدين وارجلين  وقالي امرك يابنت العم بين اعيوني حتكون ، قالتله سناء شنهيا اللي بين عيونك بسهوكة ، قاللها المية قصدي ندي هعهههه واطلع يجري ، قال ربيع نسيتوني في الجماعة اللي برا ، تباللهي توصوليي في الضيافة جماعتي جاية بيضولي وجي يبيض الله وجوهكن هههه سلم وخياتي ياربي .
قتله حاضر غر اطلع انت بس توا انادي عليك لما يوتي ، طلعت طاجين البسبوسة اللي في الكوشة ودرت القهوة والبنات يعولو علي توتي الصفرة ، طلعت طنجرة  ودرت فشار باش انكسدوا عليه في العشية ، طلعت العصير والشكلاطة ووتيتهم ناديت ربيع واخدي الصفرة وقالي طلعيلي التانية باش ناخدها منك البست عبايتي ووشاحي وطلعت ووراه ، هوا خش للمربوعة واني نستني ونشوف سيارة وسام درست ونزل منها هوا اوو هوا اوو مجد ، اني هديكا اللحظة معاش حسيت برجليا ، ارعشتها رعشة غير طبيعية ، سايست روحي بالشوية ووخرت باش مايشوفونيش وحطيت الصفرة في الوطا وشديت راسي اللي يدور بيا ، ممجد ووسام اصحااب ، لااقاهم ربيع وابدي يسلم ، وياخد فيهم بالاحضان وكان معاهم جوااد ،ومهند وخشو للمربوعة ، جي ربيع للجنان التلاني القاني طايحة مغمي عليا وبحداي الصفرة ، خش للمربوعة ونادي وسام ، شافني وقامني برعشة بين ايديه وقعد يساويلي في وشاحي ويدخل في شعري افتح باب الكوجينة برجله وحطني علي الكرسي وبخني بالمية والبنات يتعايطو جت جداي تخيركم افضحتونا قدام النسون،  لما شافتني ابدت ترعش
لما شافتني بدت ترعش جابو البنات الصنة ويشممو فيا واني نستاقظ ونرجع ندوخ تاني ، جداي قالت لوسام خيرها شن صارلها،  قاللها والله مانندري علاها ياجداي ، قالتله برا ولع سيارتك خلي نطيرو باها للعيادة البنت لا من تمها ولا من كمها ، نووض بالك ، روحو الجيران وعماتي جوو يجرو تغر شن صارلها بس ، فيسع فيسع طلعوني للسيارة رفعني وسام وجداي وعمتي سلاف ، وربيع خش للمربوعة ، مجد قاله شن فيه خيرا العويلة اصواتهم عالية ووسام طلع غر شن فيه ، وربيع يقوله مافي شيء حاجة بسيطة ، لكن مجد حسه قلبه انه في شيء ، طبعا هوا مايعرفش اني بنت عم وسام ولا انه وسام يحبني ، الحاجة الوحيدة اللي يعرفها انه وسام يحب بنت تحب غيره ، وانور ماجاش للجمعة هادي .
المهم طلعوني من المصحة بعد ماعطوني يبرة فيتامين ، والدكتور قااللهم اني مش مفروض نتعرض لاي صدمة ، وبدي يقوللهم البنت بتتأزم حالتها لو بتقعد هكي ، ردو بالكم منها وراعاها .
مفيدة ادور في الحوش وشادة ولدها جود وتتصل ومافيش حد يرد ، تخيرهم هادم مايردوش مرعشولي عظامي كان مش من مفرخي راني مشيت معاهم ، حتي بوي طالع مانندرو عليه وين ماشي ، توين راجلك ياحميدة خلي نفهمو شن صار في حوش سلفي خليفة ، فاتن تاكل في روحها ، قسم بالله راقيلي من العقربة سعاد نين خلاص ، توا في وحدة بعقلها ادير اللي داراته ، من بكري واني نتصل بنضال مايردش ياحليلي خايفة عليه ونائف مايردش بيقتلوني هالصغار،  والبنت حتي هيا لها قداش ملوحة لاماكلة لاشراب ولحمها ادزرق من كثرة خبط خاها ، عيلتي ضاعت كله من هالتافهة ، لا واني اللي مدايرتها صاحبتي وجارتي ، اتفو علاها انشاالله تلقاه وتتلقاه اللي داراته في صغاري يااارب ، ردت علاها مروة امشي جدري هالكلبة واللهي حرام علاها قداش ماوجعتني جيهان ااااااخ اااخ وااعرة واالهي كانها امي منعتني من نادر راني متت ، بجديات قصدي صااعبة لما تحبي حد وتنخطبيله وتوتي كل شيء لعرسك وتخططي معاه كل شيء ، تبدي عارفة حياتك كيف بتكون ومع من تكون ، وفجاة يجي حد يختارلك مستقبل تاني مع شريك تاني ويتهدم كل حاجة بنيتاها مع حبيبك واللهي صعبة ربي يكون في  عونها .
جابوني من المصحة ورقدوني علي الكنبة وغطوني وابدو يسالو فيا خيرك ومن شني ووو امشت كشخت عليهم جداي وقالتلهم خلو البنت ترتاح اشوية .
روحو الاولاد وامشو كل واحد لشغله ، واني مقعمزة ودمعتي علي خدي ، مفرشيلي فراش في الصالة وغطاء وشكارة الدواء ومالقي المية بحداي ، ادقولي عزوز بتودع ، والا امراة مطلقة من راجلها ،
حطو العالة وبدو يخدمو في الشاهي وفتحو المنظومة علي اغاني وليد التلاوي " عشقي وجنوني " وابدو ياحنة في الشطح والرقيص ، جتني سوار ونوضتني نرقص ربطتلي الوشاح وابديت نرقص ، حسيت نفسي نرقص علي خيباتي واجهاض حبي ، جتني احلام وقالتلي نبيك في موضوع ، خشينا للدار قالتلي مجد شاريك ويبيك اني انصدمت ، قلتلها شن ادقولي ، قالتلي زي ماسمعتي وعطاني رقمه وقالي اعطيهولها وكان بتتصل اليوم معناها تبيني وكان ماتتصلش حناخد اول طيارة وانهاجر الليلة ، شفت الساعة القيتها 8 ، اتلبطتها بقووووة وبديت نرقص من الفرح الحمدلله الحمدووووالله الحمدووالله ياربي ، وامشيت توضيت وصليت وغيرت لبستي ، لبست كت رصاصي فيه وردة حمراء كبيرة  وسروال لاصق احمر وساويت قصتي ورسمت عيوني ودرت شوية كريمة واخديت تلفوني وانزلت ، ابدوا يشوفولي ويصفرو ،سناء تغر شن قلتيلها ياحلومة باش زهرت بس ، حتي اني وشوشيني باش يتغير مزاجي ، قلتلهم برو حطو الفشار في صواني والسامينسه حتي هيا تلقاها في الدولاب الوسطي حطاها ، امشو البنات يجرو للكوجينة واني سحبت احلام وقلتلها هاتي الرقم ، ركبت وطلعت الشنطة وابدت تفتش وادور مالقاتاشي واني دمي محروق ومش مصدقة شن هالحظ اللي مزفت هذا قلتلها زيدي دوري بالك تلقييه ، دورت دورت نيين يأست وهيا ادور ومالقاتشي ، ابديت ننذب في حظي وانخبط ونبكي بعبرة علاااش اني هكي علااااش بيهاجر ويخليني بيهااااجر خشو البنات وفي ايديهم صفرة مشكلة القوني نبكي ونندب ، قالولي خيرك شن فيييك ، احكتلهم احلام كل شيء ، البنات وجوهم مقلوبة ووجعهم حالي ،ندي قالت قصدك القيتيه هوا امبكري ، هذا باش دختي ، اني هزيتلها براسي ايييه ، خلاص خلاص كل شيء انتهيه .
تغريد " جامدة وتفكر " : لولو اني شاكة انه نورا تكون هيا اللي خدت الورقة امتع الرقم .
البنات مصدومات
اني " باستغراب " : وعلاش بتاخد الورقة وكيف عرفتي ؟
تغريد "بارتباك " : اا لماااا رفعووك للمصحة ، نورا القيتها ركبت لدار احلام واتفركس وبعدين طلعت تجري ، وروحت هيا وامها .
اني " بحرقة " : معقولة نورا ادير فيا هكي ، واللهي لو يهاجر ماني مسامحتها عمري كله ، ماتوقعتهاش تطلع منها هيا ااااااااه ياحليلي ااااااااه .
تنادي فينا عمتي مفيدة هيا تعالو كان بتتعشو حطو البنات البخشة في الدار وجابو تبسي عصيدة بالقديد ، وابدو يكركرو فيا اني ناكل واني نبكي ونقول لا ، قالتلي سوار ، كان تاكلي انجيبلك رقمه ، امسحت دمعتي وقلتلها كييف ، قالتلي انتي زودي كولي وتوا تشبحي كيف منجيب الرقم ، طاوعتها وقعمزت كليت اشوية ونضت ، كلو البنات ونزلو يغسلو في الماعين ، وسوار قالتلي الحقيني ، نزلت اني وياها للدور اللوطي وامشينا وقفنا قدام باب المربوعة وقفت علي السطل باش توصل لشبك المربوعة واشرت لربيع يطلع ، في المربوعة كان مقعمز جمال وسعد وربيع وعمي احمد ونجم الدين وكريم .
طلع ربيع وشافلي القي وجهي احمر من البكي ، قالي خيرك لولو شن فيك من مزعلك ، قالتله متعاركة هيا ووسام ومايردش علاها تبي تكلمه من تلفونك ، قالها معقولة وسام يزعل من لولو ، تلالا اكيدة الشاطان خش بيناتكم ، هاكي التلفون وصاحبه علي حسابك ، اني خديت التلفون ، وخشيت علي الارقام وابعته رسالة لتلفوني وامسحت الرسالة من تلفون ربيع واتصلت بوسام وبعدت ، فعلا محتاجة انكلم وسام ونعتذرله ، ربيع خش داخل بيجيب شاهي وسوار قعدت واقفة تستني فيا ، طلع جمال من المربوعة القي سوار واقفة متكية علي الحيط " لبس سوار كله ملايات وحاجات واسعة ، هيا ماشاءالله قد مانوصفلكم انها حلوة اشوية ومع ذلك مش مدايرة اي علاقة ومايخشش لراسها اي راجل " جمال قعد يشبح فاها ويتامل وهيا مش مركزة ، انتبهت عليه وشافتله .
جمال " بارتباك " : تبي حد اهني يااختي .
سوار " شادة ضحكتها " : انت كان تبي حاجة قولي  .
جمال " بارتباك  " :  انت شكلك تبي جداي توا اناديهالك .
سوار " ضحكت " :تلالا مانبي حد ياودي ههههه ، تخيرك ياجمال شن صايبك في هالليل .
جمال " باستغراب " : اللطف منين تعرفيني  ، انتي مني ؟
سوار " بغضب " : شن احولت ،تي اني سوار بنت عمتك سلاف خير دعوتك .
جمال "بصدمة " :ماشاءالله كبرتي وطولتي ، ولسانك اطول منك بدي .
سوار " تشوفله باستغراب " : حسستني انه الفرق بيني وبينك سنيين ، تهيا كلها سنة .
جمال : واااك علي لساانك ، منهوا اللي بيحصل فيك بس غبارته حرفه .
سوار : تبرا سلم ولدي ، ماناقص غر انت تعطي رايك فيا .
جمال " مستغرب من طولة لسانها ومن انه مالاحضهاش قبل هالمرة "
جيت اني قطعت عليهم وناديت ربيع واعطيته تلفونه واركبت مع سلاف فوق ، قعمزو البنات جنبي وكانت الساعة 11 ونص وابدوا يقولولي هيا اتصلي واني قلبي من كثرة الخبط بيطير من بين ضلوعي درت علي رقمه واتصلت طلع خارج التغطية عاودت مرة اتنين وتلاتة وابديت نفقد في الامل ارجعت اتصلت بيه طلعلي مقفل وابديت نبكي معناها سافر وسيبني سافر سااااااافر قلبي ادقطع وروحي تمزقت حسيت في هديكا اللحظة كأني مرأة فقدت ابنها اللي بين احشائها حسيت بإجهاض حبي ...💔

انتهت الحلقة 30
تابعوني نبي نشوف لايكاتكم علي الرواية وتعليقاتكم باش انكمل 😻😻😻
الحلقة واتية من الاحد كتبتها في يوم واحد لكن لاسف ماكانش عندي نت واول ماحصلت بعتتها طووول