Nagsimula ako sa wakas
Nag-umpisa ako sa kung paano ka nawasak nang paulit-ulit na alon
Nagsimula ako sa mga bagay na akala mo wala nang pag-asa
Nagumpisa ako sa mga panahong mahina ka
Sa kung paanong halos malunod ka sa pagbulusok ng mga damdaming hindi mabigyang halaga
Sa mga emosyon. Sa tuwa, sakit, inis, yamot, pait, galit at pagkamuhi
Sa mga pagkakataong tumalon ka at lumagapak pababa
Sa mga oras na kumapit ka pero bumigay ang pag-asa
Nagsimula ako sa wakas ng damdamin mong akala mo hindi na makakabawi pa
Nag-umpisa ako sa wakas ng pagkatao mong sirang-sira, hindi mapakinabangan
Dahil ilang beses mo nang itinapon sa kawalan
Sa kawalan ng magmamahal, kawalan ng ideyang magmamahal ka uli
Dahil ang wakas mo ang gagawin kong simula
Ang wakas mo ang gagawin kong unang letra ng mga bubuuin kong mga salita
Ang wakas mo ang ang gagamitin kong hagdan paakyat
Hahakbang ako paitaas para makita ko ang iyong mga mata
Bababa akong muli para pakinggan ang puso mong nakalimutan na yatang ngumiti
Sa wakas mo, naroon ako
Sa wakas mo, naghihintay ako
Naghihintay na bumuo ng simula
Ng simula na tatahakin ang gitna
Tatahakin ang sukdulan
Hanggang sa maabot ko ang rurok ng sumisidhing simula
Ng simulang kasama kita...
BINABASA MO ANG
Ang Mga Salitang Isinulat Ko Para Sa'yo
PoetryKinailangan ko ng mga letra at salita para iguhit ka. Isulat at itatak sa paraang hindi mo makakalimutan. © 100717