Sa daming beses kong natapilok
Sa daming beses kong napatid
Sa hindi mabilang na pilay, pasa at bugbog
Kakahanap ng masisilungan
Kakahanap ng init sa gitna ng kalamigan
Kakapigil sa mga luhang hindi ko magawang pigilan
Sa walang kapagurang pagtakbo, paglangoy at pagsisid sa ulap ng takot
Sa dagat ng pangamba
Sa kagubatan ng kawalan ng pagtitiwala
Sa kakahanap ng kinang sa mga matang matagal nang nakatulala
Sa kakapilit na ngumiti dahil pagod nang ngumiwi
Natagpuan kita
Natagpuan kita sa kabila ng sira-sirang distansya
Sa pagitan ng mga sapang wala nang tubig para makahinga
Natagpuan kita
Sa kasuluk-sulukan ng karagatan ko ng pangungulila
Natagpuan kita
Nang maligaw ako sa langit na puno ng akala ko
Akala ko masaya
Akala ko wala na
Pero hindi pala, dahil wala ka
Dahil natagpuan kita
Sa ibaba ng kawalan
Sa daloy ng aking mga luha
Natagpuan noong mga panahong akala ko katapusan ko na
Natagpuan kita sa gitna
Sa gitna ng lungkot at saya
Sa gitna ng dilim at liwanag
Natagpuan kita habang pilit kong hinahawakan ang mga lubid ng pag-asa
Noong mga oras na malapit na akong bumitaw
Natagpuan kita noong akala ko matatapos na
Dumating ka
BINABASA MO ANG
Ang Mga Salitang Isinulat Ko Para Sa'yo
PoetryKinailangan ko ng mga letra at salita para iguhit ka. Isulat at itatak sa paraang hindi mo makakalimutan. © 100717