Magpapalit na naman ang taon
Pero ang tibok ng laman sa dibdib ko ayaw pang umahon
Para tumibok na nang deretso
Para makalimot na sa mga pangako
Para makalimutan na ang mga nasayang na "mahal kita"
Na napalitan na ng mga "sana"
Para makalimutan na kita.
Makalimutan ko na ang tatlong daang araw na ginugol ko sa paglanghap sa amoy mo na inipon ko
Sa pagdama ng init ng mga bisig mo sa panaginip ko
Sa pagkapa sa kabilang bahagi ng kama
Na may bakanteng espasyo
Dahil wala ka dito
Wala ka na pala sa tabi ko.
Kaya magpapalit na rin ako ng istilo ngayong bagong taon.
Hindi na kita alalahanin.
Hindi na ako babalik sa simula natin
Na nagwakas kaagad
Sa istorya nating natuldukan sa isang iglap
Magpapalit na ako ng istilo
Maglalakad na ako ngayon palayo
Sa mga ngiti mo, sa mga mata mo
Dahil babalik na ako sa mga yakap mo.
Babalik din pala ako...
Sa 'yo.
BINABASA MO ANG
Ang Mga Salitang Isinulat Ko Para Sa'yo
PoetryKinailangan ko ng mga letra at salita para iguhit ka. Isulat at itatak sa paraang hindi mo makakalimutan. © 100717