Ang Manang At Ang Playboy [COMPLETED]

PART 12

PAGKATAPOS ng isang araw na pagre-research sa Internet at pagbabasa ng mga libro tungkol sa pagtatalik ay sinubukan ni Issabella na isulat ang karugtong ng manuscript ng kanyang tita. Ngunit ni isang tip ay hindi siya nakasulat. Hindi rin niya makita ang silbi ng panonood ng X-rated tapes sa pagbuo ng bedroom tip. Marahil nga ay hindi niya kayang mag-self-study. Kailangan niya ng taong eksperto sa bagay na iyon na tutulong sa kanya sa pagsusulat ng karugtong ng manuscript ng tita niya.

Marahil ay dapat na nga muna niyang kalimutan ang mga reservations at inhibitions niya. Hindi naman talaga masama ang tingin niya sa sex dahil hindi naman masama ang bagay na iyon. Siguro ang masama lang ay ang pagturing ng ilang tao sa bagay na iyon. They did not look at it as a science of human reproduction or as an expression of love but as a ritual for lustful adventure. She knew most people regarded it that way, especially most men. Kaya nag-originate tuloy ang kaisipang malaswa at mahalay ang sex.

Iyon din ang dahilan kaya hindi siya komportable sa bagay na iyon. Ang sabi niya sa kanyang sarili ay iisipin lamang niya ang tungkol sa bagay na iyon sa oras na mag-asawa na siya. Ngunit sadyang mapaglaro ang tadhana at nasadlak siya sa sitwasyong iyon.

Nakapagdesisyon na siyang tanggapin ang tulong na iniaalok ni Drew gaano man kasagwa ang gustong mangyari nito. Gagawin niya iyon para sa mamanahin niya. Hindi nga siguro siya pagtatangkaang gawan ng kahalayan nito dahil hindi siya kaakit-akit. Panghahawakan niya ang assurance ni Bambi sa pagkatao ni Drew dahil ayon dito ay matagal na nitong kilala ang lalaki.

Nang tawagan niya si Bambi ay natuwa ito sa naging desisyon niya. She had to give Drew a copy of her aunt's manuscript. Kailangan din kasi nitong mabasa iyon upang malaman nito ang mga ituturo sa kanya. So now, she was facing Drew again. Nagkita-kita sila sa lobby ng Mimosa Sky at nakaupo sa isa sa mga couches na naroon. Naiinis pa rin siya rito ngunit alam niyang kailangan niyang matutuhang makibagay rito kahit pa halata ang malaking pagkakaiba ng mga personalidad nila.

"So, saan mo tayo gustong mag-classroom? Sa unit mo o sa unit ko?" tanong ni Drew sa kanya.

"Ay, oo nga pala. Neighbors pala kayo. What a charming proximity," komento ni Bambi.

"Hindi ba puwedeng sa ibang lugar na lang?" tanong niya. Hindi niya gustong pumasok sa unit nito at hindi rin niya gustong papasukin ito sa tinutuluyan niya.

"We need a private and comfortable place for our private lessons," sabi nito.

"Oo nga naman, Ate," sabad ni Bambi. "Gusto mo bang marinig ng mga tao ang pag-uusapan ninyo? Nakakahiya, 'di ba?"

Nakakahiya nga iyon. "Sa unit na lang ni Tiya." Mas safe ang lugar na iyon kaysa sa unit nito.

"All right." Ngumiti ito. "So let's go?"

Mayamaya pa ay nasa loob na sila ng unit ng kanyang tita.

"Umpisahan na natin," aniya. May hawak siyang notebook at ball pen habang nakaupo siya sa couch. Katabi niya si Bambi.

"Kailangan bang nandito si Bambi?" tanong ni Drew na nakaupo sa kabilang couch.

Tatayo na sana si Bambi ngunit hinila niya ito. "Gusto kong nandito si Bambi."

"As in seat-in student ako, gano'n? 'Kaloka ka talaga, Ate." Alam niyang kunwari lamang na ayaw pa nito. Ramdam naman niya na gusto nitong makisali sa lesson niya dahil may pagnanasa ito sa "teacher."

Bahagyang nalukot ang noo ni Drew. Mukhang hindi nito nagustuhan ang presensiya ni Bambi. "Okay then, let's start."

Nangalumbaba si Bambi habang nakatitig kay Drew. Halatang willing pupil ito.

"I just want to ask you a few questions first before I start our lesson."

"OMG! Talagang may entrance exam pa," bulalas ni Bambi.

"Ano 'yon?" tanong niya kay Drew.

"It's weird having Bambi around." Tumingin ito kay Bambi. "Can you leave us for a sec, Bambs?"

"No." Siya ang sumagot. "Dito lang siya."

"Gusto mong marinig niya ang mga isasagot mo sa mga tanong ko?"

"Oo."

"All right. First question. Nagka-boyfriend ka na ba?"

Sasagot pa lang sana siya nang magsalita si Bambi.

"Obvious namang hindi pa, Papa Drew, eh."

She scowled at Bambi.

"Have you ever been kissed?" tanong pa ni Drew.

"Halata ring hindi pa," sabad uli ni Bambi. "Mukhang kahit dulo ng daliri ni Ate Issa ay wala pang nakakahawak."

Nagngalit ang mga ngipin niya.

"Pero may mga manliligaw ka naman siguro sa probinsiya ninyo," ani Drew.

"Mukhang zero," sagot uli ni Bambi. "Para kasi siyang nananakot ng lalaki. Typical teacher, you know. Medyo masungit, mainitin ang ulo—"

Tuluyan nang nag-init ang kanyang ulo. "Lumayas ka na nga rito, Bambi," utos niya rito.

Kinagat nito ang daliri at tinitigan siya, animo nagpapaawa. Pero nang pandilatan niya ito ay mabilis na tumayo ito at tinungo ang pinto. Nag-flying kiss pa ito kay Drew bago lumabas.

Pumikit at humawak siya sa kanyang dibdib upang kalmahin ang kanyang sarili. Nang dumilat uli siya ay nasalubong niya ang mga mata ni Drew. He was grinning. Noon lamang niya na-realize ang mali sa ginawa niya. Siya na rin mismo ang nagpaalis kay Bambi kaya wala na siyang kasama. She was alone with Drew in the room! Nagsimula siyang makaramdam ng tensiyon.

"Nagkagusto ka na ba sa isang lalaki?" pagpapatuloy nito sa pagtatanong.

"Nagkagusto na rin, siyempre. Ano'ng akala mo sa akin, bato?" sagot niya sa pilit na pinatatag na tinig. Kinakabahan kasi siya.

Ngumiti uli ito. "So, hindi ka bato. That's nice to know. Ibig sabihin ba niyon ay nakadama ka na ng sexual desire para sa isang lalaki?"

Nahigit niya ang kanyang hininga. "B-bakit ganyan ang tanong mo? Nambabastos ka ba?"

"Hindi kita binabastos. Kailangan ko lang malaman ang extent ng natural knowledge mo tungkol sa lecture natin bago tayo magsimula," kaswal na sabi nito. Kung makapagsalita ito ay parang normal na bagay lamang ang pinag-uusapan nila.

"Puwes, hindi pa. Hindi ko pa naramdaman at naisip iyon dahil nagustuhan ko ang taong iyon hindi dahil sa pisikal na anyo niya kundi dahil sa mga katangian niya na higit sa pisikal na aspeto. Hindi ko pinagnasaan ang pagiging matalino niya at hindi sexually appealing ang pagiging mabait niya. Pinangarap kong makasama siya pero hindi sa kama kundi sa isang hardin na puno ng mga bulaklak habang masaya kaming nagkukuwentuhan at nagtatawanan. Palibhasa kasi, may mga lalaki na pisikal na katangian lamang ang tinitingnan sa mga babae kaya natural na pisikal lang din ang nararamdaman ng mga iyon sa mga babae." Ang huling mga salita niya ay patama rito.

Ngumiti ito, animo naaliw. Base sa hitsura nito, parang hindi naman tinamaan ito. "The way I see it, you're totally clueless about sex."