دولاب الزمن

5

#دولاب_الزمن5
Shahd Alsalman
خلصت المدرسة و بدت العطلة صرت ثالث متوسط وكبرت تغيرت ملامحي وجسمي ضعفت اكثر بس بقيت اطول
جمال صار اعدادية وهو هم تغير شكلة هو ينحب كلش واحلى شي بي عيونة ملونات صفر وكلش تجذب طول اكثر ولان يلعب طوبة ورياضة جسمة صار احلى
عبير هم كبرت ونرجس وادم حبيبي هالسنة يدخل متوسطة صرت ما اخاف علي مثل قبل كام يعتمد على نفسة بس مع هذا اظل افكر بي واراقبة

العطلة بالنسبة الي جانت عبارة عن كراب وشغل وتعب ماكو شي اسمة طلعة زيارة اهل نوم لعب
جانت نورهان تاخذ بناتها وتطلع وتطلب مني انظف ما تقبل تاخذني وياهم واني هم ما اريد اطلع وياهم ما مهتمة كلش
بابا اصلا منشوفة شغلة صار هواية ومسؤولياتة اكثر واحسن شي يسو هو ونورهان انه ما يشوفوني خلقتهم

جنت انظف وادم سويتلة اكل وديتفرج تلفزيون ومندمج اجة جمال باس ادم وحضنة صار ادم يحبة كلش ويسمع كلامة بكل شي

اني سلمت علي كالي وين اهلي كتلة طالعين ضحك هو كال شنو ذولة بس يطلعون ما عدهم بيت كتلة خليهم على راحتهم احسن اعرف هو جان يتضايق لان اكره امة واختة نرجس بس هو يعذرني لان يعرف شلون يعاملوني

كملت شغل رحت سبحت وبدلت واخذت ادم طلعتة بالحديقة فرشتلة بالحديقة وكمنا نسولف واخلي يتخيل احنا طالعين برة البيت
شافنا جمال وكعد يمنا كام ادم يلعب بالطوبة بقينا اني وهو
- ربا
- امج شلون جان شكلها
- يعني بية شبه منها بس جانت اقصر
- حلوة مثلج
- ههههه بس اني مو حلوة هي احلى
- ما عندج صورة الها
- هسة اجيبلك
رحت جبت الالبوم مال صور حتى يتفرجة وياية نزلتلة وكعد يكلب بالصور
- والله ثاريج حلوة على امج
- شكرا
- هم تشتاقيلها
- اي هواية
- تكرهين امي مو
- ما اعرف
- عادي جاوبي ما ازعل اني هم مرات اضوج منها بس ما اكرهها
- اكرهها لان ما عدها رحمة
- ادري بس شسوي هذا طبعها
- عادي تعودت
انت هم تشتاق لابوك
- كومة بحيث كل يوم اتمنى احضنة واشوفة
- هو يشبهك
- اي اني ماخذ من امي ومن ابويا الشبه
- عندك صورة الة
- عندي بس بالالبوم مدري وين اختفى اذا لكيتة اشوفج
- خوش
- كومي نلعب طوبة

بوكتها تونسنا كلش نسيت كل شي يضوج ويا جمال وادم
خلصنا لعب كالو جعنا واني هم جعت رحت سويت اكل النا وكعدنا بالهول نتفرج تلفزيون ..
شفت ادم نام دا اشيلة اصعدة جمال كالي اني اشيلة مو زين عليج ثكيل
شالة وداه واني غطيتة وبوستة ونزلنا اني وهو
رجعنا نكمل الفلم

بعد شوي حسيت جمال ديتقرب علية ويميل جسمة باتجاهي بصراحة خفت كلش ما اعرف ليش باوعتلة لكيتة نايم ومحاس هو من نوع نومة ثكيل حتى من يكعد للمدرسة يشلع كلبنا الف مرة نكعدة

وخرت من يمة وحاولت اكعدة بس ما يقبل يكوم رحت جبتلة مخدتة وغطاه وعدلت نومتة كلت اني هم اصعد انام

اجتي ببالي سوالف البنات صديقاتي من يحجون بالحب و الولد المعجبين بيهم اني مجنت اقتنع بحجيهم واضوج منة بس هم حابين هالشي
كلت بداخلي شبية اني مو مثل البنات احلم بفارس الاحلام اليحبني او اكول فلان عاجبني او احب احد يتحرش بية ليش اني مو مثلهم ..

خلصت العطلة و بدة الدوام بعد وهالمرة لازم اركز على دروسي اكثر لان بكالوريا
بس وين نورهان تخليني اني جنت اصارع حتى ادرس وانجح لان ما عندي وقت لو ادرس ادم لو اشتغل وبرغم هالشي جنت اقرة وانجح واطلع درجات عالية عكس بناتها دلال ومدرسين خصوصين وماكو نتيجة نجاح بدرجات قريبة للرسوب

من امتحنا نص السنة وخلصنا صارت العطلة الربيعية سافرت نورهان وبناتها وبابا للشمال بقينا اني و ادم وجمال لان مقبل يسافر وياهم يكول اتونس ويا جماعتي اكثر

صرنا اقرب من قبل اني وياه صداقتنا قوت بس اكو شي بداخلي يتحرك من اشوفة او اسمع صوتة او يكعد يحجي وياية باختصار جان هو فارس احلامي بدون ما انتبه لنفسي او امنع نفسي عنة لان اكيد امة حتدمرني اذا درت بشي

- ربا وينج
- ها عيني جيتك
- وين ادم
- والله صدرة هاج علي وتعب من الكحة انطيتة دواه ونام
- اودي طبيب
- لا بس هو موسم تحسس مو تدري والربو همين
-اي خطية تعالي كعدي ليش واكفة
- مو ادم
- دتعالي هسة هو نايم
- اوكي
- باعي ربا اريد اكلج شي بس لا تزعلين مني ولا تغيرين فكرتج عني
- شنو
- ربا كلش

سكت وصفن علية واتقرب مني

- شبيك جمال
- ما بية بس ما اعرف انت شسويتي بية
- شسويت مدا افتهم عليك
- غمضي عيونج شوية
- ماشي
غمضت عيني وهو ساكت
- افتح
- لا
-لعد شدسوي
- اني احبج

فتحت عيني على وسعها من الكلمة السمعتها رجف كلبي ودكاتة مسموعة مصدكت هو حيكلي هيج ابتعدت عنة لزم ايدي

- لا تزعلين مني بس اني صدك احبج واخاف عليج من كل شي واغار من كل واحد تمشين من يمة ما ادري من شوكت حبيتج بس الاعرفة بداخلي حب جبير الج ..

منطقت ولا حرف بقيت ساكتة سحبت ايدي منة ورحت لغرفتي بداخلي هواية احاسيس
اريد ابجي واضحك وافرح وانقهر وخايفة و خجلانة وفوك كل هالمشاعر اني احس نفسي قوية وياه ويمكن احبة مثل ما هو يحبني ..