دولاب الزمن

22

#دولاب_الزمن22
Shahd Alsalman
خابرتني نسرين للظهر جنت دا افتر بالشارع كلت بلكت اشوفها دتمشي

- باسل اجتي ربا وتعبانة كلش شكلها مصخنة وبس تبجي تعال شوف شبيها خاف مريضة
- لا تعوفوها ابقو يمها هسة جايكم
- لا احنا يمها وخالة مكابلتها
- باعي نسرين اكو محرار يمج قيسيلها حرارتها واذا معرفتي خلي امي تقيسلها وكليلي شكد
- ماشي هسة انتظرني
ورة دقايق رجعت دكت
-ها شكد
- باسل 39 والله تخوف ووجها كلش احمر وبس تون
- سويلها كمادات بس لا على كصتها بس ايدها ورجلها وشربوها مي
- هسة خالة دتسويلها وين وصلت انت
- ربع ساعة واجيكم ما اتاخر
- ماشي بالسلامة

اكيد صخنت من كثر ما انقهرت هسة اني شحجاني وادري بيها مدتتحمل الحجي ونفسيتها  زفت لو بس لساني مكطوع ولا حاجي

وصلت للبيت مثل المخبل شفت نبضها سريع كلش من ورة الصخونة وجسمها عبارة عن جمر مشتعل بنار وتهذري بحجي ممفهوم بس اللي فهمتة تكول اسم ادم

انطيتها اسعافات وعالجتها ومنتظر تنزل الحرارة
اجة ادم من المدرسة وشافها بهالحال ظل مكابلها وكاعد كلنا يمها بس هي نايمة ومحاسة على شي كالت امي كومو اغديكم ومن تكعد اني اوكلها بس محد الة نفس وظلينا كاعدين لحد ما فتحت عيونها
ادم باس ايديها

- شبيك حبيبي
- شون صرتي شبيج رباوي
- شبية ليش كلكم هنا
- شدتحسين هسة ربا
- تعبانة شوي
- حمدلله ع سلامتج ماما
ظلت صافنة علينا مدتفهم ليش احنا ملتمين
- ربا صخنتي و حرارتج ارتفعت كلش وهسة احسن ان شاء الله
- ما ادري ما اتذكر شي
- يلة كومي غسلي وجهج حتى تاكلين ويانة وانطيج دوة
- ما اشتهي
- شنو متشتهين يلة كومي حبي ناكل سوة ونغير جو حتى لا تجلب بيج المرضة
- والله ما اشتهي نسرين
- هسة ع اللمة تشتهين يلة كومو يوم
- صار خالة

كمنا سوة وهي غسلت وكعدت يمنا بس بعدها تعبانة تاكل كوة وادم يحشي بحلكها لكمتين والثالثة وكالت ما اكدر بعد
ما ضغطنا عليها انطيتها الدوة وراحت تنام

حجيتلهم لامي ونسرين ع الصار وكتلهم اني صوجي نسرين لامتني كالت مجان لازم تحجي هيج وضعها ميتحمل هالحجي وبعدها صغيرة
امي كالت خلوها ترتاح وبعد لحد يضايقهة اليوم بجت بحضني عبالك محتاجة للاهل وللام قهرتني عليها و الله

كامت نسرين درست ادم لان ربا متكدر وشافتة ديحوص بس يريد يبقى يمها و حتى تلهي كعدت تقري واني وامي كل شوية نطل عليها
بس نامت لثاني يوم الصبح بدون ما تكعد والنوم كلش مفيد الها

لكيتها كاعدة الصبح وكالعادة محضرة ريوك ومبدلة مخليتها تداوم ردتها ترتاح بس مقبلت كالت اذا اظل بالفراش اتمرض بلكي بالدوام اغير جو اخذتها وطلعنا وما ذكرت اي شي عن البارحة ولا حجيت بي بس قبل لا ننزل اعتذرت منها على كلامي ومعلقت شي هي وصعدنا للعيادة نكمل شغلنا

رجعت للبيت وياها حتى نتغدى وجانت امي محضرة الغدا كلت اخذهم بالليل و اطلعهم شوية نغير جو
طلعنا و اتعشينا برة وهي شكلها نست وارتاحت واندمجت ويانة مرة لوخ

فاتت الايام واني كل يوم احبها اكثر وجودها حلا حياتي وغيرها وملت كل فراغ بداخلي وما اتخيل بعد ممكن اعيش بدونها جنت كاعد بالمرجوحة بالليل وافكر شلون ممكن افتح وياها هالموضوع واجتي نسرين

- الشاغل بالك يتهنى
- هههههه هلا بام لسان
- هلا بيك شنو الاخبار
- ماكو والله لا جديد
- امممم و ربا
- باعي انت من تغمزين ما ارتاحلج ههههه
- ههههههه لك مو عاجنتك وخابزتك انت تحبها مو
- امممم بصراحة اي
- زين تدري هي
- لا ودا افكر شلون اكوللها وشلون اخليها توافق
- شتفكر هو اكو وحدة تكدر ترفضك خاصة بعد ما عرفتك انت شنو
- عادي من حقها ترفض او تقبل يعني مو ضروري اذا حسيت بشي هي هم لازم تحسة
- امممم هم صدك بس متلكى مثلك ولا احسن منك
- برايج حتحبني او تفكر بية
- شوف حتى اكون صريحة وياك ما اعتقد هي دتفكر بيك او حابتك حاليا بس يمكن اذا انت كتلها راح تفكر بيك بصورة جدية
- خايف لا ترفضني ونوب اخسرها
- ليش تخسرها
- لان حتعرف اني اباوعلها بنظرة ثانية ويمكن حتى تتجنبني
- زين عندي حل لاخ
- شنو هو
- انت مهدلها حتى من تكللها ما تنصدم او تتفاجىء بشي
- شون مدا افهم
- يعني مثلا جيبلها هداية ورد كل يوم سمعها اغنية احجيلها شكد انت حاب تستقر وتتزوج حتى يكون عدها علم انت بشنو تفكر وبعدين لا تنسى هي مشتتة مراح تكعد تركز عليك وعلى مشاعرك
وهيج حتلفت انتباههة وتكون تحلل تصرفاتك وياها
- والله صحيح التكولي لعد خلص حسوي هيج ان شاء الله
- يا رب يا رب تحبك وتحبها وتتزوجون يا ابن بطني
- ههههههههههه الله يسمع منج يمة
- ههههههههه ان شاء الله حكوم انام تصبح على خير
- وانت من اهلة

ثاني يوم كلت اتريك ونطلع سوة طلعت قبلها كطعت وردة من الحديقة ومن صعدت
- رباوي
- نعم دكتور
- هاج
- الله شنو هالوردة جديدة
- اي اول بارحة طلعت كلت بس شوي تفتح اكطعها وانطيها الج
- شكرا كلك ذوق
- تذكرتج بيها
- هههه
- شكد حلوة انت من تخجلين
- امممم شكرا
- ريحتها طيبة مو
- كلش ولونها حلو تسلم ايدك

من نزلنا خليت الوردة الانطانياها بكلاص وخليتلها مي وحبة اسبرين حتى تبقى وقت اطول
بس لاحظت انه نبرتة ونظراتة متغيرة اليوم ما اعرف شبي حتى كالي رباوي اول مرة يدلع اسمي

كم يوم واحنا هيج لو يجيبلي وردة لو نستلة ويكلي اتذكرتج
مرة جنا الصبح بالسيارة وكال لازم امر على محل اجيب شغلة قبل لا اروح
شوية الطريق ازدحام ففتح اغاني وطلعت اغنية فيروز سألوني الناس عنك يا حبيبي
كالي هاي الج اسمعيها و من وصل مقطع

" غمضت عيوني خوفي لا الناس يشوفوك مخبى بعيوني "

كام يغني وياها ويباوعلي بقيت صافنة تصرفاتة غريبة و اهتمامة زايد وحتى هالاغنية الة بيها قصد وخاصة هالمقطع
ابتسمتلة و بقيت ساكتة بس الصفنة ماخذتني
معقولة يحبني لو اني هيج احس بس لمجرد اهتمامة بية
اكيد الايام حتكشف كل شي ..