دولاب الزمن

31

#دولاب_الزمن31
Shahd Alsalman
شفت عبير طالعة بالسوك وتحاول تتسوك للبيت شغلات اني ادري بيها متعرف تطبخ فكتلها راح اجي وياج و اساعدج واكتبلج كم شغلة وكملنا مسواك علمتها شلون تتسوك وشنو الاشياء التحتاجها
سولفنا هواية وحجتلي على جمال وشلون مشتاقلي وكتلها اني ما احس شي تجاهة جانت مشاعر مراهقة وطفولة و انتهت ما كمت احس بشي والله

طبخنا كم طبخة حتى تجمدهم وتونسنا جانت هي كلش ضايجة ومشتاقة لامها واختها وكالت مشتاقة لبابا كلش راحت للغرفة ورجعت بيدها البوم صور
- شنو جايبة وياج
- هذا البوم بي صور بابا
- شلون جبتي
- ميفاركني هذا حتى بجنطة المدرسة اخذة وياية
- تتذكري يعني
- اي طبعا بابا جان كلش طيب وحنين ويانة بس نرجس ملحكت علي او متتذكر شي يخصة
- الله يرحمة
- ويرحم خالة
- امين اي شوفيني
- هذا بابا
- منو تقصدين اي واحد بيهم
- هذا اللي بالنص يشبه جمال مو
- متاكدة هذا ابوج ؟؟؟
- طبعا باعي بقية الصور
- مستحيل عبير هذا ابوج متأكدة
- هاي شبيج ربا شنو تعرفي
- عبير ابوج جان متزوج ؟
- اي ومطلكها
- يا الله دخيلك واسمة ابراهيم كامل
- اي شنو ربا فهميني
- عبير
- ها
- كومي وياية نروح
- وين
- كومي
- دفهميني
-جمال وين
- ما ادري طالع

من طلعتلي الصور اكتشفت ربط اسم ابو الدكتور و ابو جمال والصور متطابقة ولما تخيلت نفسي شايفة ابو الدكتور مجان خيال او اعتقاد انه شكلة مألوف بس لأنه الشبه كلش جبير بينة وبين جمال ابنة وهالشي معناها انه هم اخوة من الاب
اخذت عبير والبوم الصور ورحت لبيت الدكتور واعرف اليوم هو عطلة وبالبيت من وصلت شفت الباب مفتوح وخالة ونسرين جانو طالعين تلاكينا ع الباب

دكيت الباب على بيت الدكتور وطلعلي لكيتة وحدة واهلة طالعين كلت هاي خوش فرصة فتنا و ضيفني هو اخر فترة مكام يهضمني او يتضايق مني لان كل ما اشوفة احجيلة عن ربا واكلة احنا متصافين
- اي دكتور شلونك شخبارك
- والله ماشي الحال وانت
- الحمدلله تمام
- شغلك شلونة
- عال العال بلشنا بمشروع وارباحة تبين على راس السنة
- موفقين تستاهل انت
- اشكرك
- دتشوف اهلك
- لا امرلهم على كد الراتب واطلع
- بس ميصير هيج
- اي ميخالف خلي ياخذون درس ويتعضون
اصلا حتى رباوي مدتقبل بس اني كلت فترة ونحل هالموضوع
- ليش انت وين دتشوف ربا
- ليش شنو ممنوع اشوفها
- مو قصدي بس هي مكالت ولا مرة دتتشاوفون
- اي وشنو لازم تكلك يعني لو تستأذن منك
- لا حاليا بس بعدين ممكن
- شنو تقصد دكتور
- اقصد اني عرضت عليها تكون زوجتي
- ههههههه مراح تقبل
- وليش هيج واثق
- لان كلبها ويا شخص غيرك
- منو ؟؟
- هي عود تكلك
- جمال لا تلعب باعصابي احجي
- مثل مكتلك هي تكلك واني متاكد من كلامي هي متحبك
- هي لمحتلك بشي
- لا بس مدام محجتلي شي يخصك معناها انت متهمها وهي هاي عادتها وحترفضك فأنت اسحب نفسك حتى لا تخجل
- اذا تريد حتكلي اني مطلبت منها شي يخجل ولا تظل تصرح من يمك
- كيفك يلة اترخص
- تعال هنا شتترخص احجي منو بحياتها
- ما احجي هي تكلك
- كتلك احجي لا تخليني اخلص عليك
- ايييي وخر ايدك عني شبيك تخبلت البنية متريدك وكالتلي انت بمعرفتك زحلكة ارتاحيت هسة
- انت جذاب
-لا مو جذاب وراح نرتبط اني وهي عن قريب واحنا واحد يحب اللاخ من صغرنا وجنت انتظر ارجع حتى نتزوج
- كافي جذب
- كتلك مو جذاب هاي الحقيقة ولو صدك هي تفكر بيك جان كالتلك موافقة بلا متفكر مثل ما حبتني الي بدون ما تفكر و هي صغيرة وكبر حبها وياها

متحملت السمعتة منة واني اصلا متضايق منة لان بس يحجي بيها ويدق بية عبالك متقصد لزمتة وضربتة وكع بالكاع وكام علية واحد لازم اللاخ ونتصارع بيناتنا
وسمعت صوت امي تصيح بية باسل اتركة
شدسون
- هالكلب بعد ميطب بيتي قسما بالله اقتلة
- شبيكم شصاير
- نسرين هدوني وخرو عن طريقي
- تعال متحامي بالنسوان
- جمااال شجاك عيب عليك
- معليج ربا لا تتدخلين
- لا ليش متتدخل خليها هسة تكول هي المن تحب
تقدمت عليها وباوعت بعينها وصيحت
- انت تحبين جمال وناوية تتزوجي احجي كوليي
- عوفها لا تحجي وياها
- وخر حيوان
لزمتها من ايديها وهزيتها
- احجي ليش سااكتة جنت تلعبين بمشاعري ومرديتي اي جواب لان انت تحبي ليش ربا ليش
- انت شدتكول
- اي هذا الصدك ارتباكج من كال هو خاطب و من اجة وتعارك وغيرها مواقف هواية عبالج محسيت عليج ولا اعرف بس كلت اطرد هالافكار من بالي
- انت غلطان
- لا مغلطان مغلطان
كسرت الاغراض الموجودة ولزمت جمال دا اضرب بي وكعتة وكعدت على صدرة حتى اكمل البوكسات
- كااااافي هذا اخوك لا تضربة
خللللص
كلنا سكتنا وصفنا على كلامها
- كافي عوفة هذا اخوك لا تاذي
- اخويا ؟
- اي اخوك اخوك وهاي اختك انتو من اب واحد وهذي الصور واساميكم متشابهة المرة اللي اخذت ابوك من امك هي ام جمال
مو خالة مو صحيح كلامي
- نورهان
- اي هي نورهان خالة
- جيبي الالبوم
اخذتة ودا اتفرج علي مستحيل اللي دا اشوفة مدا اصدك هذا حلم لو شنو عندي اخوة اني وابويا متوفي
- ابونا مات بالسرطان من زمان وجانت امنيتة يصالح اهلة لان تبرو منة
- اهلة تبرو منة عمي وامة وكلنا حتى اني بس معرفت بعد اي خبر يخصة مجنت ادري بي عايش او ميت
- ربا مدا اصدك
- لا جمال صدك هذي هي للاسف امك وهذي حقارتها هجمت بيت واخذت رجال من مرتة وبنت سعادتها على تعاسة غيرها
ومع الاسف انت طلعت عليها وجنت تريد تخرب حياتي وتكول عني شي مصاير
- يعني محبيتيني
- حبيتك وما انكر وجانت مشاعر طفولية اول مراهقتي وما كتلك حتى كلمة احبك جنت متعلقة بيك بس اختلف كل شي المواقف والعمر بينولي كل شي وهذا موقفك الاخير اثبتلي انك مثل امك متصورتك هيج رخيص
من رخصتكم
- ربا لحظة
- دكتور الطلب اللي طلبتة مني مرفوض
- لحظة افهميني مجان قصدي
- رجاءا خلص لهنا ويكفي الخذلان الشفتة من كل واحد صدكتة الة بدون متسمعني ما اريد ولا واحد منكم بحياتي انساني وعيش حياتك
- لج ربا حبيبي دقيقة وين رايحة
- خلص نسرين
مع السلامة

عفتها تطلع اكيد تضايقت مني بقينا كلنا بحالة ذهول ممتخيلين شلون الصدفة جمعتنا بهيج طريقة وهيج احداث
- باسل ربا ما انصدمت من خطبة جمال
صار شي انتو متعرفو وادري هسة انت فسخت والستر حلو بس لازم تعرفون
- شنو
- شنو
وحجيت للموجودين عن مكالمة خطيبة جمال
- وهذا الصار
- من هذا جانت تتصرف هيج وياية حتى اتركها
- ومن هذا هي انصدمت ربا لان انت خاطبها وهي تحجي ويا غيرك مو لان هي تحبك
- يا الله غلطت بحقها من غيرتي شكد اثول
- مصار شي باسل خليها تهدى و راضيها
- شترضى وشتهدى مشفيتها شلون رفضتني
- كومي عبير نروح
- بعد ما خربتها تريد تولي
- خلص يمة باسل صلي ع النبي روح ابني خلو هالنهار يفض على خير

قهرني بكلامة وياية و شكة بية وادري هو حجالة شي وخلاه يتهستر جنت ناوية اقبل بي اني حددت مشاعري وعرفت انه قبولي بالدكتور حيكون سبب سعادتي ولاني عرفت اني احبة ومواقفة هي عززت حبة بداخلي فجان هو هذا قراري
بس من شفتة يحجي وياية هيج ويشكك بية كدام الكل و يسمع لجمال تراجعت و حسيت بخذلان لان ما عندة ثقة بية وعزت نفسي علية تركت كل شي وطلعت