دولاب الزمن

8

#دولاب_الزمن8
Shahd Alsalman
بعد كلام ابوها وياية خلاني انتبه على تصرفاتي وياها واحاسب على سمعتها احنا كبرنا ومو صغار واني اعرف سمعة البنية مثل الكرستال اذا انخدشت او انكسرت ما تنلم ولا تتصلح

حاولت ابتعد او ما التقي بيها هواية احس بحزنها وضوجتها بس اني استحي من ابوها برغم هو ما فد يوم قصر علينا بشي ويعاملنا كلنا بعدل ما يفرق بينا وبين جهالة مو مثل امي

خلصت السادس واخذت نتيجتي جان معدلي عالي وامي كلش فرحت وبعد ايام اقترحت علية انه اكمل دراستي برة طبعا اني رفضت وما قبلت لان جنت ناوي ادخل كلية واشتغل حتى اخطب ربا ما اكدر بدونها بعد وعلى هالاساس بنيت وخططت لحياتي بس جانت اكو مفاجأة ما جنت متوقعها

- ماما حبيبي اسمعني اني اعرف انت ليش متريد تسافر
- لا ماما متعرفين وما اكدر اكول
- بس اني اكدر اكول وراح احجي علمودك وانت قرر
- كولي شنو
- انت تحب ربا وتريد تتزوجها وهي هم تحبك
- اممممم ماما مو اني
- بلة اني بلة سوالفك ابني وحافظتك واعرفك واني ارفع راسي بيك لان اختاريت ربا عفية عليك خوش بنية
- صدك ماما يعني انت قابلة
- طبعا هو اكو احلى لو ارتب منها
- اييي ماما اني صدك احبها واريدها وعلمودها ما اريد اسافر اريد اشتغل ويا دوام الكلية واخطبها ومن اتخرج اتزوجها
- هههههه هي تعرف بكل خططك ؟
- لا ما كتلها اي شي ومتعرف عن شي والله
- لا تحلف ماما مصدكتك بس اني حجيت ويا ابوها لان ادري بيك تحبها
- اي ؟
- كال علواه وشكو بيها بس عندة شرط حتى يقبل او بالاحرى شرطين
- وشنو هالشرطين؟
- اول شرط ربا تكمل دراستها
- اي طبعا ربا شاطرة واني احب وحدة تكمل دراستها
- اي عفية عليك واني هم كتلة هيج وكتلة حيقبل اكيد
- زين ماما والشرط الثاني
- الثاني انه امها موصية قبل لا تموت برجال يتزوج بنتها عندة شهادة عالية
- لا والله
- اي فأني حتى اكبرك بعين عمك كتلة هو راح يدرس برة يم خوالة ويجيب الشهادة التريدها انت بس على شرط بنتك لابني ما تتراجع
-اي وشكال قبل ؟
- طبعا قبل ووعدني بس كالي لا تكولين لربا وتشغليها عن دراستها اريدها هي هم تتفوق
- تدرين ماما شكد اني فرحان ومرتاح وراضي اروح واسافر مدام هالشرط يخليني اتزوجها
- هاي هيج تحبها
- كلش والله
- خوش لعد مثل ما اتفقنا ما اريد ربا تعرف باي شي حتى لا تنشغل بهالموضوع تدري البنات بهالعمر شون يتأثرون بكل شي و ربا حساسة
- صحيح لعد هاهية مثل متريدون
- الله يوفقك حبيبي جمال وترفع راسي كدام اهل ربا و افتخر بيك يا رب
- الله يخليج الي ماما بلياج اني ضايع وما ادبر اي شي
- رجال انت وسبع بعد لا تكول هالحجاية ابد
- شنو قابل جذب احنا بدونج منسوة شي واني كلش احبج اعظم ام بالدنيا انت
- حبيبي فدوة رحتلك يلة تعال افهمك ع السفر والاوراق

وكعدت امي تحجيلي عن كل الاجراءات حمدت الله وشكرتة على امي ما اعرف بدونها شون جنت اتصرف او راح اتجرا واخطب ربا من عمو لو لا
هي رتبت كل شي وسهلتلي هواية مواضيع

من قرب يوم السفر خليت ربا تساعدني بالجنطة ومبينتلها اي شي ومن صدك اني كلبي طاير فرح
بس راد يفلت لساني وكتلها حيتحقق حلمي همزين عبالها دا احجي عن الدراسة ومفتهمت قصدي

بس قهرتني بدموعها اكثر وحدة بالبيت متأثرة هي ربا واني هم مقهور لان راح اعوفها بس لازم اصير اقوى حتى ارجعلها وابقى يمها العمر كلة
حجت وياية وحاولت انه تخليني اتراجع عن السفر بس بعد ما ترهم
اجة يوم السفر ودعتهم وامي وهي واختي عبير بواجي ومناحة كلبوها

نرجس حايرة بالهدايا دزلي فلان هدية وفلان شغلة امي كالتلها رايح يدرس لو يتسوكلج رزلتها كتلها عوفيها شتريد اجيبلها هاي حبيبتي ما ردت اكسر خاطرها

و طلبت من امي احجي ويا ربا لاخر مرة قبل لا اروح كالت اي عادي بس لا تجيب سيرة مثل موصيتك هزيت راسي بمعنى اي افتهمت

رحت لغرفتها بعد ما جانت واكفة يمنا ومن البجي تركتنا وصعدت اعرف بيها تكره الفراك ومن تتعلق بأحد بعد هاهية يكون هو كل شي بالنسبة الها
دكيت الباب وفتت شفتها لافة نفسها بالغطا وسادة وجهها بالمخدة وتشهك بالبجي
كعدت يمها ومسحت على راسها

- ربا باوعيلي
- ما اريد روح جمال
- بس هالمرة اريد اشوفج شو باوعيني
رفعت المخدة ووجها احمر من البجي وحيل مقهورة واني كوة لازم نفسي ما اريد ابجي
- ليش ما رحت شمنتظر
- منتظر احجي وياج واشوفج
- جمال لا تروح مالي غيرك
- اني راجع يعني مراح ابقى كل عمري هناك بعدين كلها كم شهر واجيكم ما باقي هناك 4 سنين
- يعني تجي والله ؟
- ان شاء الله بس لا تنقهرين اريدج تشجعيني وتدعيلي وما يبقى بالي عليج مو اروح واني كلبي نار
- مدام تجي راح اتحمل وانتظر
- عفية بالسبعة انت بطلة وتكدرين لوحدج اريدج انت بمكاني تديرين بالج على خواتي وادومي ودراستج ترة ازعل اذا ما تجيبين درجات عالية
واي شي تريدي دكيلي نتواصل ونحجي مراح ننكطع
- اي
- كافي بجي حركتي كلبي والله

متحملت حضنتها وبجيت وياها اول مرة احضنها واكون قريب منها هيج حضنها حنين كلش بستها من راسها وعفتها وكمت مسحت دموعي ونزلت بعد ما اكدر الموقف صعب كلش واني اول مرة افارك اهلي هيج
وصيت ادم على اختة وعبير على امي ونرجس
وطلعت

بالطريق عمو ظل يوصيني ويحجي وياية ع الدراسة و على حياتي  اني بالي كلة يم ربا صوت بجيها وشكل عيونها مديروح من بالي وحضنتها تمنيت اخذها وياية عسما احطها بجنطة شون راح اتحمل فراكها ما اعرف بس رايح علمودها حتى اجتمع بيها بعدين ونبقى كل العمر سوة و لوما هالشي ما اروح ابد ..