دولاب الزمن

23

#دولاب_الزمن23
Shahd Alsalman
رجعت من السفر لبيتنا كلي اشتياق و لهفة لاهلي وربا وخواتي و مكتلهم على موعد جيتي
فتت لكيت امي بالمطبخ حضنتها ودك بجي اني وهي وبوست ايديها وراسها وهي حاضنتني حيل
ما تقبل تهدني شكد جنت مشتاقلها

بس احس البيت مو طبيعي يعني كانما صاير شي او متغير شي
سالت على خواتي وربا وادم وعمو
- خواتك بالمدرسة بعد ساعتين هيج ويجون
- والبقية
- دتعال ارتاح هسة اشرب مي
- يمة صاير شي ؟
- والله ما اعرف شكلك درتاح وبعدين نحجي
- شصاير دحجي عليج الله ماما
- عمك بالفراش اجتة جلطة من شهر تقريبا
- شنوووو
- اي والله
- وليش مكتولي وشنو وضعة
- انت بغربة يمة شكلك وانت بعيد واخليك تشيل هم وادري صعبة دراستك
- احجيلي شون صار هيج وليش شنو السبب مجان يشكي من شي
- من القهر يمة السوتة ربا مو شوية
- ربا ! شسوت ؟؟
- انهزمت من البيت واخذت اخوها وياها
- هاي صدك دتحجين !!!
- عمك بسببها انجلط وفقد النطق بعد ما يحجي وصار عندة شلل نصفي الله لا ينطيها
- وليش انهزمت ! ربا متسوي هيج شي
- هو لعد ليش كلنا هيج حالنا وضيمنا لان ممتخيلين هيج حتسوي بينا
مدري واحد لايف عليها ولاعب بعقلها و كالت اتزوجة مدري شنو ابوها ما قبل لان مهتلف تالي تركت دراستها علمودة ومن تعاركو اخذت اخوها وكالت اني متزوجتة بالسر وطلعت بلا ردة الله لا يوفقها وعمك سمع هيج انجلط حرنا بي بالمستشفيات
- مدا اصدك الاسمعة
- ادري واني على هالسبب ما كتلك شي
- زين متعرفون وينها هي او ادم وشكو اخذت ادم وياها
- منعرف شي عنها بعد اتزوجتة وولت الله لا يردها
اخذتى حتى تحرك كلب ابوك مشفتها شون تحجي بصلافة و رافعة خشمها ع الكل الادبسز
- عمي نايم لو كاعد
- كاعد بغرفتة هسة خلص ريوكة وكلتة
-حكوم اسلم علي
- اي يمة بس لا تكلة شي عن ربا ولا تجيب سيرة ابد ترة ينتكس ما صدكنا على الله شوية حالتة استقرت
- ماشي

رحت لغرفتة وامشي واني مشدوه شصاير بالبيت ومعقولة ربا الحبيتها هيج تسوي بية وبابوها وتنهزم وعلمود شخص
معقولة حبت غيري لعد اني رحت واتغربت علمودها وعلمود اجيب شهادة واتزوجها تالي هي تترك كل شي ودراستها وتتركني وتروح هيج والله مدا اصدك هالبريئة يطلع منها كل هذا !

فتت لعمي سلمت علي حالتة تبجي الصخر ويقهر وكتلة مجنت اعرف بيك مريض وهسة امي كالتلي كلها ايام وتكوم بالسلامة
شسوي وشحجي ما ادري لا بية اواسي ولا بية اسكت هو بس يباوع بعيونة والدمعة بطرف عينة عبالك ديشكيلي من شي

طلعت من الغرفة ميت قهر امي جتي كعدت يمي وكالتلي لا تضوج بس شلون ما اضوج اتمنى هسة الزم ربا اكطعها بيدي الف وصلة

احس بالغدر واحس انلعب علية لعبة جبيرة ليش هيج سوت الله يساعد ابوها لان اني واسمع امي احس راح انجلط وكلبي حيوكف مو عاد هو

رحت سبحت و بدلت انتظر خواتي شسوي بعد هاهية اللي صار صار و مدام هي هيج سوت معناها مخلت الي خيار ثاني ولازم انساها و من هاللحظة اني كرهتها و مستحيل افكر بيها و لو شفتها تموت كبالي هم ما احن عليها
شكد عانيت بسببها وبسبب حبها والايام الجنت ابجي بيها من كدما مشتاق ومحتاج الها بالاخير هي طلعت جذابة و ما حسبت حسابي حتى مو بس ابوها اللي ما فكرت بي

اجوي خواتي من المدرسة وطبعا تفاجئو وانصدمو بوجودي واحضان وبوس وكعدنا سوة نتغدى ونسولف امي تباوعلي ادري شايلة همي لزمت ايدهت وبستها

- تروحلج فدوة ولا يهمج وصدكيني اني طلعتها من اليوم برة حياتي
هي بجت
- كسرت كلبك الله لا ينطيها
- و داعتج متهز شعرة مني الخلقها خلق الف وحدة غيرها و زين ما صارتلي مرة
- يعني انت ما مقهور
- مقهور على سنين الضيعتها بالغربة وبعدت عنكم وكل يوم اشتاق مقهور على نفسي امنت بيها
- اسم الله عليك يمة غير اني علمودك هيج سويت حتى تتزوجها
- لا يمة انت مقصرتي دزيتيني برة ومو يمج واني وحيدج بس علمود حبي الها وحتى اكدر اتزوجها
- اي يا يمة بني ادم ما يملى عينة الا التراب
- هاهية سدو موضوعها وخلينا نعيش مرتاحين راحت الله وياها
- لا والله مو وياها كل يوم اندعي عليها هجمت بيتنا و ولت
- هاهية يمة كولي حسبي الله ونعم الوكيل وخلص لحد يجيب سيرتها بعد اول وتالي هي تزوجت يعني ما مشت بطريق غلط
- الله كريم هو ينتقم منها
- يلة كومو اشوفكم شجبتلكم

نطيتهم هداياهم ووديت لعمو هديتة فرح يمكن بيها ما اعرف لان ميحجي بس يباوع
وهدية ادم وربا شمرتها بالزبل ما اريد بعد شي يخصهم او اذكرهم ابد

قررت ابدي حياتي من جديد بس طيف ربا ميفاركني وطول الوكت افكر بيها وتاكل بروحي برغم كل مكابرتي و محاولتي انه انساها يمكن لو شايفها بعيني و شايف صلافتها على كولة امي جان كدرت اكرهها وانساها

بس كل ذكرياتي وياها تكول هي غير شكل و مكدرت اصدك ابد مع هذا لازم اشوف حياتي وابلش بشغل لان اهلي محتاجين هسة كل فلس وعمي محتاج لعلاجات وادوية ودا افكر اسفرة ولو احنا خير من الله وحالتنا زينة بس الفلوس ما تبقى لازم اكو شي يجي مكانها حتى تزيد

لكيت شركة وقدمت عليها من عرفو شهادتي من امريكا بسرعة قبلوني و تعلمت ع الشغل بسرعة بلشو يعتمدون علية وافكاري كلها متجددة لان دراستنا جانت مكثفة كلش فادتني بشغلي والحمدلله الوضع تمام وراتبي زين صارلي شهر اشتغل

بس وضع عمو وامي يقهر فاقترحت على امي نودي لدكتور و نسويلة فحوصات حتى نسفرة برة ويتعالج لان هيج ماكو فايدة من كعدتة بس بالفراش والدوة مديسوي شي ..