دولاب الزمن

24

#دولاب_الزمن24
Shahd Alsalman
حجزت يم طبيب كالو زين واخذت موعد العصر بعد يومين وبلغت امي ارجع من الدوام واخذهم ونروح
تحضرو وامي بدلتلة جيت شلتة بالكرسي وحطيتة بالسيارة هو يكدر يمشي بس على تك رجل وبسبب تعبة ما يقاوم يوكف هواية لهذا نمشي مرات ع العكازة او نسندة بس يتعب بسرعة ميكدر يضغط على روحة

جان اكو سرة كدامنا كم مراجع بقينا بالانتظار ووصلنا السرة فتنا للدكتور
اول ما فتنا هو عبالك يعرفنا وسلم على امي و عمي
بس امي كانو جانت مرتبكة وعمي ميحجي بس عيونة متلهفة ويباوع
كمل الفحص وكال سوو هاي التحاليل وكتبها النا بس هو كال اتاملو خير وان شاء حالتة بسيطة ميحتاج سفر برة حالة عمو النفسية تغيرت من سمع بكلام الطبيب

امي كالت هذا الطبيب ميفتهم شدعوة هلكد تحاليل كتلها لازم لعد شلون بس بقت مصرة انه ما يفتهم وكالت نشوف غيرة احسن وما نستعجل وسويت مثل مرادت وطلبو نفس التحاليل يعني بعد ما عدها حجة
كتلها اني متفائل بالدكتور هذا ونرجعلة
حاولت انه ترفض وكالت لا ونشوف واحد ثاني بس قفلت الا هو واصلا هو وجهة كلش مريح وكلامة يريح اكثر واني ارتاحيتلة حتى عمي بس امي ما اعرف شبيها مصرة مو هو

جانو عندي مراجعين هواية اليوم وصلت للي قبل الاخير وفاتو علية شايفهم بس ما اتذكر وين
من باوعت للمرية تذكرت هاي نورهان مرت ابوها لربا وهذا ابوها بس الشاب الوياهم مشايفة

ابوها حالتة حالة ومجلوط مفتحت وياهم اي موضوع مارست دوري كطبيب وخلص خفت لا يسالوني على ربا ما اريد ترجعلهم او يعرفون شي عنها

طول الوقت مرت ابوها مرتبكة واحسها متوترة كلش  وابوها ساكت ما يحجي بسبب المرض
الشاب ياخذ وينطي وياية بالحجي كتبتلهم تحاليل وحالتة يعني اكدر اكول بالعلاج الفيزياوي و الادوية والنظام الغذائي ممكن تتحسن يبقى موضوع النطق ياخذ فترة الله اعلم شكد يمكن قصيرة يمكن
فترة طويلة

بس المشكلة شلون راح اكول لربا على هالموضوع واني اعرف شكد هي محتاجة تعرف شي عنة اذا كتلها هو هيج شحتسوي قررت اسكت وما اكول شي بس قهرني الوضع

رجعت للبيت بعد ما خلصت شغل و جنت كلش مهموم سالتني ربا وامي وكتلهم ما بية شي
من تأكدت ربا راحت لغرفتها كعدت وحجيتلها لامي ع الصار وعلى وضع ابوها وصحتة

امي انقهرت كالت تلكاها حوبة المسكينة اللهم لا شماتة بس اني وهي الهم سيطر علينا لان منريدها تنقهر ولا تعرف
والاكثر اني خايف عليها لا ترجعلهم وياذوها او يسولها شي او هي تتاذى

بعدين من صفنت على الشاب الوياهم يمكن هو هذا جمال اللي جانو يحجون عنة ادم و ربا من سمعتهم مرة وادم كاللها هالفترة يجي اعتقد هو ابن مرت ابوها لان اني هم سمعتها من ديطلعون تكلة يمة جمال فأكيد هو هذا بس هو عكس امة ابد مرتاحيتلها
هو ارتاحيتلة كلش وحسيتة كلش حنين على رجل امة ويريد يساعدة باي طريقة بحيث يريد يسفرة حتى يعالجة ويرجع طبيعي

بعد كم يوم رجعولي وطبعا مواعيدهم كلها العصر مستحيل اخليهم يتلاكون وياها اقلها خلي يطيب ويرجع يوكف على رجلة واكللها بس هسة لا ما اكدر يمكن انانية مني بس خايف عليها
كتبتلهم على علاج و دليتهم على مركز علاج طبيعي وشرحتلهم التمارين اللي لازم يسوها الة بالبيت حتى يكملون ويا المركز وكتلهم كل اسبوعين تجون واشوفكم او 10 ايام على حسب المراجعة انطيهم موعد

بلشنا بعلاج عمي شوية يتعب هو بس لازم يضغط على نفسة واحنا وياه منتركة امي مأيسة من علاجة وكتلها لا تحجين هيج كدامة لازمة تشجيع و مساندة مو مال احباط هسة او يأس بس اعذرها لان تعبت وياه كلش

كمت اودي واجيبة للمركز ولان عندي دوام عينتلة ممرضة من المركز تجي للبيت وانطيها راتب واداريها حتى تداري عمي وكل 10 ايام او 14 يوم نراجع الطبيب لوما الله وهو ما جان رجع طبيعي
كلش خوش دكتور و ينصح و يجرب كل شي قبل لا ياخذ قرار لان غير دكاترة كالو نسوي عملية ومدري شنو كل واحد اقترح اسهل اقتراح وحتى يجرون فلوس من عدنا وبس

تقريبا صارلة شهرين او اكثر يتعالج بدة يستجيب للعلاج ايدة كام يكدر يحركها طبعا مو بحركة قبل
بس ديحس بيها و ببطىء يحركها رجلة بعدها مو هلكد مرات يمل ويتعب بس وياه وياه منتركة واطلعة برة شوية يشم هوا ويغير من البيت
وبالضبط فاتن 5 شهور تقريبا تعالج بصورة نهائية  كام يكدر ياكل و يمشي ويكعد ويانة مرات هو من نفسة يسوي العلاج الطبيعي بقى النطق ثكيل لسانة بعدة ...

دا اتابع حالة ابو ربا واشوفة يتحسن مراجعة بعد مراجعة وجمال ممقصر وياه ابد 5 شهور وهو يداري و ميخلي لوحدة ابد وايدة ورجلة رجعو مثل قبل مع اختلاف بالسرعة اكيد يعني شوية ابطئ من الطبيعي
والنطق مديستجيب لسانة ثكيل والشلل قوي علي كلش واني كتلة لجمال حيطول اكثر يمكن حتى لا ينصدم او ينحبط ويمكن ميرجعلة النطق الله اعلم بعد بقت يم رب العالمين

امي دائما تسالني عن ابوها واحجيلها عن وضعة وكتلها اني اريد ربا وحاب اتزوجها وهي ممانعت بالعكس فرحت لان بهاي الفترة كلش تقربو من بعض وصارت علاقتهم حلوة ونسرين كلش تحبها وعرفوها شكد طيبة وحنينة بس اني خايف لا ترفض زواجي منها
حاولت هواية اتقربلها مثل مكالت نسرين بس هي متنطي اي اشارة انه هي فاهمة الوضع او حاسة بية
صارت تعرف كل شي عني تقريبا واني همين