دولاب الزمن

10

#دولاب_الزمن10
Shahd Alsalman
من ساعة اللي طلع جمال واني ميتة قهر لا شفت راحة ولا حسيت بأمان عبالك جنت مستندة بجبل وواكفة وفجأة اهتز الجبل ووكع واني وكعت وياه
تمنيت لو كدرت امنعة ميسافر
بس هو فرحان بالسفر و الدراسة اذا اني اعنيلة شي جان هزتة دموعي و اتراجع عن قرارة ومع هذا دعيت الله يوفقة و يسعدة

بقيت على امل انه يرجع واشوفة بالعطلة درست ونجحت مثل ما وعدتة حتى من يرجع يشوف درجاتي عالية مثل كل سنة
اجتي العطلة وما رجع حاولت اسأل عبير عنة وعن جيتة كالتلي امي تكول ما يكدر يرجع عندة هناك التزامات وصعبة جيتة

الحالة صارت اصعب دا اختنك من هالوضع غيابة دمرني لا اكل مثل الناس لا اشرب لا انام زين تعبت وانشلع كلبي وحيل دا اضعف من كد التفكير مجنت اتصور هيج الحب يسوي بالواحد والتعلق هيج مؤذي

لهيت نفسي بشغل البيت وطلبات نورهان اللي متخلص وشغلت نفسي ويا ادم حبيبي ديكبر وكل يوم يمر احبة اكثر واخاف علي اكثر
نورهان كل يوم تسمعني حجي شكل و تنغزني بي لان اعرف بيها تدري اني وجمال واحد يحب اللاخ و متجوز مني اذا متضربني لازم بالقليل كفخة لو تشمر شي علية شنو يجي بيدها تشمرة لو تحرك بابا علية هو اني حتى حجي مالي واهس احجي من كدما احس روحي تعبانة

محتاجة لجمال وحنيتة ماكو احد يملى مكانة مثل امي من راحت مني محد ملا مكانها او صار حنين علية كدها غير بس جمال وهو هم راح

الظاهر مكتوب اظل افارك الاحبهم خايفة لا يجي يوم وادم هم يعوفني ساعتها صدك اصفى لوحدي بلا اهل ولا سند ولو السند رب العالمين بس وجودهم مهم بحياتي
مرت هالسنة كلش بصعوبة احاول كد ما اكدر اصبر واتحمل وجع الفراك والاشتياق حجيت وياه خلال كل فترة سفرة الاربع سنين 3 مرات وبس اول سنة

بعد سنة من سفر جمال نورهان حيل كامت تضايقني وتاذيني وكالتلي بعد متكملين دراسة وتكعدين اني تعاركت وياها عركة جبيرة بس مجنت اعرف هي مدبرتلي شغلة تعبانة لوما ستر الله جان انذبحت بيها
من بدت المدراس لحد نص السنة وهي تنق وتتعارك على كل شي وتريد ابطل و توز ابوية علية بس مجان يقبل ويكللها البنية سلاحها شهادتها وهي تكلة حتجيبلنا مصيبة ترة
حتى حجاب متتحجب شتفرق عن عبير ونرجس شو تحجبن كاللها هي متريد خما اجبرها شتكلة هو يسكتها واني جنت مأمنة ما ادري شنو اكو وراية دينحفر

رجعت من الدوام وجنا دنضحك اني وادم ونرجس وعبير ورانة ودنسولف اول ما دخلت ابويا سحبني من صدريتي وسحلني لنص الهول ونورهان دخلت بناتها بالغرفة الفوك
وشايل حزامة بيدة و هي تخوزر بية وايديها على خصرها عبالك مدري شمسوية

ادم طبعا ظل يسال شكو وليش هيج سحلتها بابا فابوية عاط بي وصعدة للغرفة و سد باب الهول
-بنت الكلب ادزج حتى تدرسين لو تجيبلي سمعة تالي عمري و تحطين راسي بالطين
-بابا شنو صاير شمسوية ليش اني
- ممسوية حضرتج حبابة ومن اكلج بطلي تتحججين بالدراسة وصوتج ما ينصى ولسانج شطولة علية حتى حجاب ما تقبلين تلبسين مثل بناتي
- فهموني شسويت ليش اني مو دا ادرس وانجح
- هذا شنو بت الكلب
- موبايل غير
- هااا ومال منو
- شمدريني مشايفتة
-و هذني شنو
- رسايل وظروف واوراق
- ها وهاي
- كارتات رصيد
- باعي تحجين من الاخير لو اخلص عليج هسة واطم عاري واكول ماتت وارتاح منج
- شحجي