دولاب الزمن

7

#دولاب_الزمن7
Shahd Alsalman
اجة دوري احجيلكم عن نفسي شوية اكيد حفظتو اسمي
اني جمال عمري 23 سنة عندي اختين عبير ونرجس الاقرب الي عبير والدي متوفي جان مريض بالسرطان و مرضة صعب كل العلاجات والادوية والدكاترة حاولو يعالجو بكل الطرق بس ما كدرو يوكفون بوجه الموت وراح لدار حقة

من بعدة حسيت بضياع ما عندي اخ استند علي ولا اهل لان ابوية اتزوج امي غصب عن اهلة وتبرو منة وحسب كلام امي هم يكرهوها لان رادو يزوجون ابوية لبنت عمة وما اخذها وفشلهم كدام اهلها والناس وجدي جان كلش صعب لهذا غضب علي وقرر يتبرة منة هيج جانت مفهمتنا حتى بالفاتحة ما حضر احد منهم وهسة لو اشوفهم بالشارع ما راح اعرفهم

وامي همين متحب اي احد بيهم ولا تقبل نتواصل وياهم وجنت اسمعهم هي وابويا يتعاركون لان هو يريد يصالحهم وهي متقبل وتهددة تترك البيت وتتركنا

امي بطبعها عصبية وكلمتها وحدة متتراجع صحيح مدبرة و صاحبة ملكى و لسانها حلو وتلفت انتباه بندارتها بس مع هذا هي شوي صعبة و كلنا نخاف منها عدها سيطرة على اي شخص ممكن يكون بحياتها اني اخواتي بابا الله يرحمة اهلها وبعدها زوجها واطفالة اللي هم ربا وادم

حتى صديقاتها يهابوها ويخافون منها والكل تمشي تحت امرها ما فد يوم احد كدر يعترض
تحبني كلش وتخاف علية من الهوا الطاير بس تحب تملكني واني افتخر بهالشي اكيد بس اتضايق من تصرفاتها وقسوتها ويا جهال زوجها بينما هم كلش هادئين وعقال صح ربا عدها شوية تمرد وعصبية بس حتى تحمي اخوها منها مو اكثر

عبير بالنسبة الي مميزة لان تشبهني وتشبه بابا طيبة ومتفهمة وهادية ومتحب تزعل احد منها و من تحب احد ما تطعنة بظهرة ابد

نرجس جانت نسخة من امي بالتسلط و الغيرة والمشكلة عدها خباثة ولؤم يمكن لان هي الصغيرة ومدللة وما فد يوم انرفضلها طلب حسب كلام امي تكول هي مشبعت من ابوكم وحقها علية اصيرلها اب وام وجانت تحاول تحببنا بيها بس اني وعبير نختلف عنها ومع هذا نحبها

اول فترة بعد وفاة ابوية كلش صرت اخاف على خواتي واداريهم و اسمع كلام امي لان اعتبرها هي القائد بعد بابا و عقلها جبير وتحل كل شي يعني واثق منها لابعد الحدود
وانقهر من اشوف ايتام لان دا احس بالفقدان والنقص الصار عندي وادري كل واحد بيهم يتمنى ابو او امة يرجعون للحياة ويكملون وياهم ويعيشون كل مناسبة ولحظة وهم فوك راسهم

حنيتي زادت بعد وفاة بابا واحس نفسي مسؤول عن كل شي واخاف لا افقد امي مفاركتني هالخوفة ابد
بعد فترة امي لمتنا وكالت راح نعيش ويا رجال حباب وعندة جهال وبيتهم جبير اني كلش تضايقت ما اريد احد باخذ مكان بابا ولا اريد اعوف بيتنا
بس هي كالت راح نطلع من البيت وناجرة واضم ايجارة الكم للزمن ولازم نعيش يم عمو ما عدنة غير مكان و راح اتزوج خواتي كيفو لان اغرتهم بهدايا والعاب والخ قشمرتهم يعني اما اني حسيت بانكسار اكثر من قبل كالت راح اروح اني بالاول بعدين اجي اخذكم منا اني وعمكم ..

من اجة عمو واخذنا وياه اني محبيتة بالاول بس من خوفي من امي سكتت ورضيت بالواقع
ومن ثقتي بيها ما فكرت لبعدين شيصير خلص هاهية اني متقبل هالشي ودريت بالسيارة انه مرتة ماتت لان جانو ديحجون عن جهالة وكال لامي انه مكاللهم لان بنتة متعلقة بامها المرحومة وخاف لا تزعل منة و طلب من امي تتحملها كالتلة امي حالها من حال نرجس وعبير لا يظل بالك

افتهمت من هالحديث انه هم ايتام وهذا سبب ثاني خلاني احس بيهم وارضى واتقبل الزواج الصار
طبينا للبيت جان نفه وحلو وواسع حديقتة جبيرة وبداخلة غرف هواية وكلش مرتب ونظيف بعدين عرفت هالترتيب والنظافة كلها ربا تسوي وتعدلة
اتفاجئت من شفتها لان هي تداوم بنفس مدرستنا بس ما صاير قبل فد مناسبة انه احجي وياها او مثلا ندرس سوة اني جنت سادس وهي رابع يعني اكو فرق عمر بيناتنا

اعرف هي ممتقبلة الوضع ومقهورة حاولت اتقرب منها لان هي حبابة كلش وتحب اخوها ادم لدرجة مو طبيعية كانما امة مو اختة تتعارك علمودة هواية بالمدرسة جانو اصدقائي واغلب الطلاب يسموها ربا الولد بسبب عركاتها ومشاكلها علمود ادم

صرنا اصدقاء كلش اني وهي وادم وعبير ما عدا نرجس اللي تخبث عليهم ناكل سوة نلعب سوة ما عدها اي صديقات كل همها ادم وتلاحكة مثل خيالها
جان شعرها طويل كلش واشكر وهي حلوة تنحب بيها براءة تكتم كل شي يوجعها

امي تقسى عليها بمرور الايام تغيرت معاملتها الها ولادم جنت اضوج من تصرفاتها وياهم وضربها الهم ومتعدل بينهم مثل مكالت لعمو ومرة حجيت وياها كتلها ماما مو خطية تضربيها كالتلي لا احسن حتى تتربى وتلكى احد تخاف منة متسوي غلط
واني هيج اعامل خواتك بس ما اشوفها تعاملهم هيج ابد اصلا خواتي صحيح من دمي ولحمي بس شوية عدهن صلافة ويردون بوجه الواحد جواب
عبير شوية بس نرجس فد مرة من الدلال صارت حيل مكروهة

بيوم اللي صارت عركة والتمو عليها الولد واصدقاءة حتى يكتلوها ويكصون شعرها ما شفتها بحياتي هيج خايفة لان راد يكصلها شعرها الحلو
بعدين عرفت امها جانت تحب شعرها ومتريد تكصة ولا احد يطخة جامت تكول امي تنقهر اذا صار على شعري شي

من يومها قررت اكون مثل ظلها بدون وعي مني انجذب الها برغم صغر اعمارنا بس اني احبها واحس براحة وياها وهي تشدني الها باهتمامها صرت اني مثل ادم يعني اقصد بالمعزة والحب والاهتمام

كبرنا شوي و كمت افهم شنو حب وشنو يعني اعجاب دخلت بمرحلة مراهقة ومن المدرسة والطلاب واصدقائي افتهمت معناها لكلمة الحب
اعترفت الها بحبي وهي سكتت وما نطقت شي من سالت بطريقتي كالو هاي معناها لو خجلت ومتحبك لو هي هم تحبك بس تخاف

عدت الايام واني عبالي الحب هيج يعني مرة وحدة ينكال وبعد خلص بس كل ما نكبر كل ما اعرف شي جديد واعرف الحب مشاعر وكلام حلو والاهم اخلاص وافعال وهاي الافعال عبارة عن اشتياق واهتمام وافتقاد وتفرح حبيبك شكد ميكون حزين وتكون الة سند و يكدر يعتمد عليك

كل اللي كلتة جنت اعيشة وياها واحسة ما فد يوم حسيت بانجذاب لغيرها وكلما تكبر احبها اكثر وهي تتعلق بية زيادة ما بيناتنا الا مشاعر صافية وبريئة