دولاب الزمن

25

#دولاب_الزمن25
Shahd Alsalman
الدكتور كلش طيب واهلة خوش ناس ميتخيرون عنة ابد امة وردة وبنت خالتة تخبل عشت وياهم كانه هم اهلي ولا حسيت بثقل عليهم او احد منهم كارهني بالعكس كلش توالمنا سوة وحتى ادم ارتاحت نفسيتة لهذا الجو وخالة متقصر وياه ابد
من نجح اشكال جابولة هدايا استحيت منهم بس احسها من كل كلبهم ديجيبوها الة مو عطف

علاقتي بالدكتور صارت اقوى هواية نحجي ونسولف هو جان يبادر بكل شي الحجي والهداية والورد والاغاني يهتم بية اهتمام مو طبيعي خلاني اتعلق بي
بس طبعا اني ما اكدر اكلة هالشي ولا اريد ابينلة اي احساس مشيت كل شي بسكوت

خطر ببالي انه اسأل نسرين على عيد ميلادة كالتلي بعد اسبوعين بس اتأكد من هويتة اني اعرفة بس خاف غلط التاريخ دائما اخربط بي
ورحنا شفنا هويتة وقريت اسمة الكامل ومواليدة
" باسل ابراهيم كامل"
خطر ببالي اسم جمال نفس اسم ابو و جدة شون صدفة رجعنا الهوية اني ونسرين وطلعنة من الغرفة واتفقنا نسويلة كيك وعيد ميلاد وردت اشتريلة هدية اني وادم
امة كالت نوصيلة على كيك ونسويها مال دكتور وعجبتنا الفكرة ووصينا
طلعنا اني ونسرين للسوك واشترينا هدايا وامة وصتنا ناخذلها شي الها همين لان متكدر تطلع تتعب من المشي مال سوك

واخذنة كل واحد هدية وغلفناها يم ابو المكتبة
واشترينا زينة و شموع حلوة و جرجف للميز واشتريت هدوم جنت حابة اغير شوية اللبس ولان مناسبة ونسرين هم اشترت الها فستان كلش حلو وهي اصلا حلوة كلشي يلوكلها

بعد اسبوعين

حضرنا الهول وجبنا الميز رتبناه وحطينا الشموع ام الريحة وزينا المكان ونفخنا النفاخ طشرناه بكل مكان صار كلش حلو التزيين ومنتظرين الكيكة
رحنا بدلنا وخالة صاحتلنا كالت اجتي الكيكة شفناها احلى بهواية من الوصيناها شغلها كلش حلو ومرتب
خابرتها خالة وتشكرت منها و رجعنا اني ونسرين نكمل تبديل

- رباوي خلصتي
- اي حبي
- شخلصتي بالضبط ؟
- لبس غير و كملت شعري
- تسمين هاي تخليصة بلة
شعرج بس لافتة اشتهيت مرة اشوفة وجمالة لونة حلو ليش لافتة ما ادري
مكياج ممخلية ويا دوب مبدلة
- لعد شسوي ؟؟؟
- شو بلة

فلت شعري ونزل على طول جسمي لفوك الركبة

- هاي ليش !
- صلوات على محمد وال محمد لج ما شاء الله على هالشعر خرب ابليسج المن ضامتة
- هههههه لج كافي اخجل جيبي القراصة
- والله ابد ماكو هسة اسشورة علمود تروح كسرة القراصة ويبقى هيج مفلول اموتج اذا تلفي
- لا عفية والله استحي
- من شنو تستحين اسكتي اليوم ما تحجين شي وتعالي اكعدي دا امكيجج
-عزة لا بشرفج نسرين ما اكدر شون اطلع بالمكياج
- دتعالي واذا محلو غسلي بعدين شي بسيط وجهج بنبوني ما احطلة هوايةوالله يلة تعالي

كعدت وهي اشتغلت بية و متخليني اباوع للمراية خبلتني ههههه بس كلش تونست واني هم كلت واحد مغير مغير واليوم غير شكل فخليتها براحتها واذا معجبني على كولتها اغسلة