دولاب الزمن

3

#دولاب_الزمن3
Shahd Alsalman
كل يوم جانت تسوي شغلة شكل او تشكي لابويا مني على شي اني ممسويتة جانت تريد تزحلكني لبيت جدي حتى تعيش هي وجهالها بهالبيت ويخلالها الجو بدون وجودنا اني وادم بس بابا مجان يقبل ظلت تحاول وياه ماكو فايدة

تالي كامت تستعمل الضرب وياية وطبعا مجنت اخليها تتقرب لادم اتحمل كل شي بس هو مريض ميكدر وما اريد تتعب نفسيتة اني اتحمل مو مثلة
كبرت و راح اتخرج من الابتدائية بس شايلة هم لان ادم بعدة ولو اني كمت اعلمة شون يدافع عن نفسة وشون يشتكي للمدير اذا احد ضوجة لان مباقية وياه
مدرستي المتوسطة جانت يم مدرستة يعني بس انجح من السادس راح اداوم بيها بس شلون اباوعله واشوفة السياج اللي بيناتنا بي اسلاك شائكة كلت الله كريم لحد ما اطلع عود هي تصفى

ابن نورهان اسمة جمال صار بالمتوسطة اكبر من عدنا هو جان حباب بس اني اللي ما احبة ولا اطيقة لا هو ولا نرجس ولا عبير خواتة

مرات من جانت تصير عركات يجي يتعارك وياية او يجيب لفتة ويكعد يمي ويم ادم ما اهتملة كلش بس احسة حباب ويجيب اختة عبير وياه
هي جانت بس نرجس خبيثة مثل امها وحقيرة برغم صغيرة لكن عدها لؤم مو طبيعي

اجتني فكرة انه اتقرب لعبير و جمال حتى يبقون يم ادم ويساعدو و ميخلو لوحدة فعلا كلما تقربتلهم اكثر كلما اندمجت وياهم تقريبا هم يشبهونا اني وادم هم حنونين و جمال كلش يخاف على عبير ويحبها حتى نرجس بس يميل لعبير اكثر
ناكل سوة نطلع نلعب بالفرصة سوة ادم مرتاح وياهم كلش بس من نرجع للبيت هم وحدهم واحنا وحدنا لان امهم متخليهم

مرة جنا نلعب غميضان اني وادم وجمال وعبير جان اجتماع المعلمين بالمدرسة نهاية الدوام وكلها شاغر من جنت خاتلة ورة الحمامات حسيت احد جر شعري قوي ردت اوكع بس موكعت شفت هذا نفسة الولد الجر شعري بمرة من المرات واصدقاءة وياه

هو هسة بعمر المتوسطة و مع كل ضخامتة بس عقلة صغير وكفت كتلة هاي شسويت هو دفعني ع الحايط اني هم دفعتة وما شفت الا هجوم صار علية ضرب من كل الجهات وواحد منهم جرني من رجلي وكعني و دك كتل واني ادفر واضرب اريد بس احد يوخرهم عني والصوت مينسمع لان هوسة الطلاب

شفت مكص صغير بيدة كالي شوفي هذا شعرج الا اكصة ولزمة وهو جان طويل كلش كمت اصيح عبالك دياخذ روحي مني لان غالي علية امي جانت تحبة كلش سرح وطويل وثخين لونة على شكار واني هم كل يوم امشطة واظفرة او اسوي ذيل حصان اهتم بي لان يذكرني بيها

المهم بصيحتي اجة جمال الظاهر سمعني او اجة ديشوفني وين صرت لان يعرف راح اختل هناك
دفع الولد عني ودك بوكسات جمال جان طويل وعندة جتاف يعني جسمة من الاصل كأنما معضل موتهم كتل ويكلهم اذا شفتكم تتقربولها يا ويلكم مني

هم خافو وانهزمو اجة علية جنت مجرحة برجليا وايدي صدريتي كلها تراب وشعري مخربط
كمت ابجي وكتلة خما كص شعري

هو كالي لا مكصة شحدة اليطخج امشي اغسلج كام يغسلي واني ابجي اجوي عبير وادم سالوني شبيج وجمال حجالهم كال انتبهو عليهم خاف يرجعون مرة لوخ عليكم وادم حبيبي لزم ايدي يبوس بيها واني بعدني خايفة لا كص شعري كتلة لادم شوفة حبيبي مكصوص منة كالي لا وهم لزمة وباسة

رحنا للمعلمة تنطينا كطن ومعقم ومكنالهة شي جمال كاللهة وكعت داوتني دك الجرس ورجعنا للبيت
نورهان من شافت هدومي وصخة ومجرحة هيج كامت تغلط علية وجرتني جر للحمام كلتلي اغسلي هدومج و هذني همين اغسليهم وياج شغلتني واني توني فايتة وتعبانة جنت ومتخليني اشغل الغسالة الا بيدي لحد ما خلصتها سبحت و صعدت لادم ادرسة وسالتة اذا اكل كال اي واني بقيت جوعانة من كملتلة رحت اكل ما لكيت شي طلعت تفاحة واكلتها وبلشت اقرة دروسي تعبت ونمت يم ادم حضنتة محسيت الا للصبح ورحنا للمدرسة
كامو من يشوفوني يخافون هذولة الولد ويروحون بغير اتجاه

اول مرة احد يدافعلي او ياخذلي حقي او حتى احس احد واكف وياية وبظهري ما فد يوم اعتمدت على احد و جمال هو اللي ساعدني وخلاهم يبتعدون عني ويخافون

مرت الايام واني تخرجت من السادس ابتدائي ورحت بعد اداوم متوسطة بالمدرسة القريبة لمدرسة ادم والحمدلله انه جمال وعبير وياه يعني ما راح اخاف علي ولو بالي مشغول بي دائما بس هم يمة ومراح يخلون احد يضوجة

من نطلع من الدوام انتظرة وهو يجيني ملهوف يركض ويبوس بية واني جنت اشتريلة بالمصروف اللي ينطينيا بابا و ما اشتري شي الي حتى افرحة بي وارجع للبيت اقري واقرة اني هم بس مسؤوليات البيت زادن ونورهان متخليني بحالي لازم اشتغل ولازم اظل اخدم بيها ما يهمها عندي امتحان عندي قراية او تعبانة المهم هي شتريد

بابا مجان يعرف بمعاملتها الي ولا اسلوبها وخباثتها لان كدامة تمثل حبنا بس من يكون خفر او يسافر برة كم يوم علمود الشغل هي تسرح وتمرح ولا عبالك عدها جهال تنتقم مني و تحاول تأذي ادم بس ما اخليها ..