دولاب الزمن

21

#دولاب_الزمن21
Shahd Alsalman
وديتلهم الجاي ومن فتت هم سكتو واكيد ديحجيلهم عني مثل ما كاللهم بس باوعت لوجوههم تغيرت ونظرتهم قلت حديتها تجاهي كأنما بلشو يتعاطفون وياية خليت الصينية وفتت لغرفتي ظليت اتكلب بفراشي مكدرت انام وما اعرف شديحجون ذبيت حملي على رب العالمين وخلص شيصير خل يصير
الله ارحم الراحمين

حجيت لامي ونسرين متوقعت حيتفاعلون ويا قصتها كامو يبجون وامي بس تتحسب عليهم نسرين كالت خطية شكد مارة بظروف صعبة بس وجهها ما فاركتة الابتسامة من جينا لليوم ومبينة مقدرة مساعدتك الها لان مخلتنا نسوي ولا شي و شايلتنا على كفوف الراحة

امي كالت ما اخليها تروح لمكان تبقى يمنا واذا اهلهم صار واتذكروهم والله اشتكي عليهم
امي كلش تتعاطف ويا الناس و تحاول تساعد كدما تكدر واني ماخذ هالطبع منها واللي يلجأ الها ما تتركة الا تحل مشكلتة وتوكف وياه

والحمدلله تقبلت كعدتهم عندي بس عتبت علية انه ما حجيتلها على اللي صار ولا كتلها اكو احد كاعد يمي وعادي راضيتها وانتهى الموضوع وباستني من راسي تكلي مضاعت بيك تربيتي وبقت تدعيلي شكبرها بعيني فرحة امي بية وافتخارها احس مسوي فد انجاز كلش عظيم

الليلة نمت بحضنها بس بقى بالي يم ربا مشفتها زين ولا حجيت وياها ومو مال اروحلها للغرفة زحمة انتظرت للصبح حتة نطلع للعيادة غفيت

ثاني يوم شفتها مبدلة ومحضرة الريوك ودتبوس ادم لان حيروح للمدرسة سلمت عليهم ويا حلاة هالصباح اللي اشوفها بي
كعدنا تريكنا اني وهي جانت هادية وساكتة واني بس اباوعلها لان اعرف بشنو دتفكر خلصنا ريوك وكمت بدلت وطلعنا
- دكتور ممكن نحجي شوية قبل لا نبلش شغل
- اي تعالي كعدي بس قبل لا نبدي بشي
ممكن اعرف شوكت حتصيحيلي بأسمي
- لا العفو شون اصيحلك باسمك ما ترهم
- لا ترهم لا تسوين هيج ورسميات مو كافي
- ميخالف اني ارتاح هيج ومو موضوع رسميات بس تعودت
- اممم على راحتج شنو ردتي تكولين
- يعني بخصوص والدتك اني اعتذر لان سببتلك احراج وياها
- احراج ليش
- لان يعني احنا غربة وكاعدين يمك وببيتها ومتعرف بينا شميكون هي وياها حق
- اني حجيتلها كل شي ولعلمج هي ما تقبل انتو تطلعون بعد
- لا دكتور لازم نطلع ونشوفلنا بيت ثاني هيج مترهم و راح نزاحمك ونحرجك ويا الوالدة اكثر
- بالعكس لو شفت بيها اي احراج راح اخليلكم مكان ثاني قابل حخجل منكم انتو اهلي صرتو واكيد حتتفهمون الوضع بس صدكيني هي متقبل تطلعون وحتى كالت اذا دوروكم اهلكم تشتكي عليهم وما تنطيكم الهم
- يعني هي عرفت كل شي
- اي كل شي هي ونسرين صار واضح كل شي يمهم
- يا الله شكد عيب والله ما اعرف وين اودي وجهي من الفشلة والخجل
- اللي لازم يخجل ويفشل هم ابوج ومرتة مو انتو لا تفكرين بهاي الطريقة
- ميخالف مهما يكونون محسوبين احنا عليهم واهلنا
- هاي الكلمة انسيها احنا اهلكم لان هم ميستاهلوكم ولا يحلمون ترجعون الهم مرة ثانية
- ما اكدر هذا ابويا هي انساها بس بابا لا صعبة حيل
- اني اسف مو قصدي ابجيج واضوجج والله بس ... 
- لا تكلي انساه ولا تكلي ما عندج اهل هالشي يوجع الكلب محد يحس بي اني كل يوم اتمنى لو اشوفة واعرف اخبارة محتاجتلة حتى لو هو ظلمنا
- خلص اهدي والله مو قصدي ربا اني اسف ومراح اعيد هالحجي ابد

انفعلت وبجت من كتلها لا تكولين اهلي و شكلها جانت مكبوتة وحاصرتها هالبجية كامت من يمي وطلعت من الغرفة خليتها على راحتها تفرغ بالبجي
بقيت احوص اريد اطلعلهة
انفتحت الباب وتفاجئت بالمراجع
- دكتور مفتحين لو شنو
- اي تفضل سجل اسمك يم السكرتيرة
- وينها ماكو احد
- شون ماكو احد موجودة هي برة
- والله ماكو احد بس اني و2 كاعدين ومحد ع المكتب

طلعت اشوف صدك ديحجي لكيتها مو ع المكتب وماكو جنطتها رحت للحمام دكيت الباب ماكو هي
دكيت لامي كلت يجوز رجعت للبيت بس كالت لا محد اجة وبس اني ونسرين وطلبت منها من تجي تنطيني خبر وين راحت يا ربي اني صوجي حجيت هيج وياها وقهرتها شكد غبي

كلت اخلص المراجعين العندي لان بعد اجوي ما ترهم اكلهم لا واني اساسا اجلتهم اسبوع واطلع ادورلها ..

من كالي ما عندج اهل وانسيهم عبالك حط سجين بكلبي تذكرت ادم وكلامة البارحة وبابا قبل لا يتزوج نورهان و بعد ما اتزوجها هي لحظات بس كل شي تذكرت بيها وكلبي صار نار على بابا ما اعرف ليش هيج اشتاقلة واحن الة دا اموت كل يوم لان ما ادري شي عنة
مجرد وجودة بحياتنا حتى لو ما قدملنا اي شي يحسسني بامان

اخذت جنطتي وطلعت اتمشى ما كتلة للدكتور حطلع اريد اخذ نفس واحس حيل مختنكة من ودي اصرخ و اتهستر واطلع كل شي بكلبي شكد ثكيل الاحسة
رحت لمكان قريب الشط وبقيت ابجي لوحدي لحد ما تعبت تقريبا صار وكت الظهر رجعت للبيت ما بية حيل ارجع للعيادة احس جسمي مكسر وتعبانة كلش
بس اريد انام

فتت للبيت وامة ونسرين كالولي وين جنتي باسل كالب الدنيا عليج مكدرت اجاوبهم كعدت ع الميز وامة تلزم براسي وتكلي خدج احمر و نار جسمج شبيج ماما
حسيت محتاجة احضنها واكمل بجي حضنتها وبجيت وهي تصلي ع النبي وتمسح على راسي كومتني لغرفتي وغطتني كالت نامي اني يمج ظليت لازمة ايدها وابجي وهي تهدي بية وغفيت بس جسمي مكسر كلش ..