دولاب الزمن

4

#دولاب_الزمن4
ShahdAlsalman
مرة من المرات تعاركو ادم ونرجس هيج جهال بينهم على لعبة هذا يصيح مالتي وهي تصيح مالتي اني جنت فوك ودا اسمعهم كلت بس اكمل البيدي وانزللهم ما سمعت الا عيطة ادم وديكول لا خالة و الله ما عيدها ويصيح بعد حيل ما بية

نزلت اشوفة لكيتها دتحمي شيش وتريد تجوي وهو ميت خوف و بجي  عطت بيها كتلها شدسوين اليوم اكلب الدنيا على راسج مخليت شي مكسرتة تهسترت صريخ وعياط وحجي بحيث المطبخ عبارة عن شظايا كزاز اجة جمال شافني هيج دا اكسر وامة نورهان تصيح بية مخبلة انت مخبلة تريدين تكتليني ادري بيج حتى اموت بس من يجي ابوج اني اعرف شغلي و تهدد بية
اخذت ادم ودفعت جمال حتى افوت وصعدت فوك خليتة بحضني وسالتة اذا اذتة او كتلتة كالي لا وكام يبجي

لحد ما هدى ونومتة اني متشاهدة من نام هو كمت ابجي واكول لو امي هنا مجان صار كل هذا ولا احد ذلنا هيج العب بشعرة وابجي وابوس بي خايفة لا يصيرلي شي ومن بعدي يتأذى ادم او يمشي بغلط وميلكى احد يوجهة ويساعدة هالدنيا كلش حقيرة وصعبة مو مثل ما جنت اشوفها قبل لا تتوفى امي

جنت اكول احنا ما نهتم لشي ابسط شي مجنت اكعد اني هي تكعدني للمدرسة من بعدها صرت اكعد كبل الوكت احضر ادم واتحضر اني ونطلع
لو الطبخ لو التنظيف هذني اشياء كلها مجنت احس بيها من بعدها عشتها وحسيتها وتحملتها

ما عندي اي ذكريات تخص الطفولة من فتحت عيني وبديت استوعب ماتت وراحت عنا وتركتنا للي ميخافون من الله وابويا اكيد يعرف اللي ديصير ويانة بس ما يسوي شي لان هي صارت المسيطر الوحيد وبحجة تربينا وخايفة علينا مسكتة بابا

من رجع بابا من الدوام شاف المطبخ هوسة والغراض مكسرة ونورهان تبجي من سألها كايلتلة ربا كسرتهم وغلطت عليا وشوية بهارات حطت ع الموضوع ابويا تخبل صعدلي وادري راح انكتل فطلعت من الغرفة حتى لا يحس ادم على شي
اول مشافني ضربني راشدي وجرني من بلوزي لجوة يم نورهان نرجس تضحك بخبث عبير متضايقة بس ما بيدها شي جمال جان طالع ميدري شكو

لو باقي ضاربني ولا كايلي هيج وذالني هي سوت نفسها منهارة بالبجي كالي بوسي ايدها واعتذري منها مقبلت اني ووخرت اريد اصعد جرني من ايدي كمت اصيح وخر عني ما اريد
هو هاج علية وبقى يضربني شمرني بنص الهول ولا كامت نورهان ولا كالتلة عوفها او خطية كل شي ماكو ولا حجاية حجت
ظليت مغطية وجهي وراسي حتى يتأذون وهو يكتلني ولا جني بنتة لحد ما اجة جمال سحبة مني كالة لا عمو شدسوي خطية عوفها
فنورهان كالتلة خلي يربيها اني مدا اكدرلها وهي كل يوم اكل منها كتلة وكفخة شكل واني ممسوية شي

هدا ابويا وحس على نفسة جمال صار بيني وبيني وكام يهددني ويكلي تجرين عدل لو راسج اكسرة
و جمال يكلة لا هي حبابة تسمع الكلام هاهية عوفها اني احجي وياها
احس عظامي تكسرو وجسمي يوجعني راسي كل مكان بية ياذيني كتلة الرجال مو مثل المرة

كمت غسلت وجهي وبدلت هدومي لميت المطبخ ونظفتة وشلت كل الكزاز كملت وصعدت كعدت ادم حتى ادرسة حاولت ما ابين شصاير بس هو ديشوف جسمي واثر الضرب واضح بي سالني ليش هيج اكو زراك وحمار بجسمي كتلة عندي حساسية بالجلد هو ما اقتنع بس شرحتلة وقشمرتة فسكت

المشكلة لشوكت حبقى هيج اقشمر بي هو ديكبر ويوعى ويحس ويفهم اكثر من قبل خايفة لا يتأثر اني كل الاريدة منة يركز بدراستة و يرفع راسي وراس ماما

من هنا اجتني فكرة انه نعوف البيت ونترك كل شي بس احنا بعدنا صغار ظليت افكر شلون ممكن نطلع ووين نروح اني ما اعرف احد ولا اشتغل ولا عندي بيت لاخ كلت اخلي هالفكرة ببالي واحاول اجمع من يوميتي والعيديات لحد منكبر تخيلت هالشي حيكفي هههه

بس من كدما تعبت من الاهانة وحسيت بذل دا افكر بهالطريقة وما ردت ادم يشوفني بهالحال لان اعرف حيستمر الوضع هيج اذا مو نورهان تضربني او تسبني فبابا ميقصر ولا كأنو احنا جهالة صارت ما عندة اي مشاعر تجاهنا واني كرهي الة يزيد كل يوم اكثر من القبلة وصلت مرحلة ادعي علي بداخلي حتى الله ينتقم منة وياخذة وادري غلط بس محروك كلبي وتعبت ...