دولاب الزمن

11

#دولاب_الزمن11
Shahd Alsalman
باليوم الثالث اجتي نورهان ما اعرف صبح الدنيا لو ليل المخزن اظلم بي ضوة خفيف دخل علية ادم اجة حضنتة واني جسمي يملخني من الوجع بس ميخالف اتحمل لان مشتاقتلة لادم ثاري متوسل بنورهان حتى بس يشوفني وهي تباوع بطرف عينها علينا
كالتلي كومي سبحي وداوي نفسج دا ارجعج لهنا
يلة
وعاطت بية ووخرت ادم عني كالتلة روح لا ابوك يجي يملخكم انتو الاثنين
كمت امشي على كيفي واجر بنفسي كوة الهدوم لازكة على مكان الجرح ومن اشيلها تشوغ روحي بجيت على حالي ووضعي وانقهرت على ادم لان توسل بيها علمودي وحدة متخاف الله وما ادري ليش تصلي وتقرة قران والعبادة والديانة المن وهي ما بكلبها انسانية ولا رحمة
كملت سبح وداويت جروحي والجويات مشطت شعري واجتي سجانتي رجعتني للمخزن

ورة ساعات هيج انفتحت الباب وجان بابا دخل شافني مبدلة وسابحة كام يصيح
- نورهاااان
- ها عيني شبيك
- هاي الجلبة شوكت طلعتيها
- حبيبي مو كلت خل تبدل لا تلتهب جروحها نوب نحير بيها
- خلي تموت وشنو يعني بحالها عساها تفطس
- كول يا الله بعد اكيد هي اخذت درس امشي وياية دا اغديك شون غدا مسويتلك

سحب ايدة منها على كيف واجة علية اني وهو واحد يباوع بعيون الثاني اشوفة بعين القهر والكبرياء ويباوعلي بعين الغضب

نزل يمي ولزم فجي بكل قوتة
- تدرين شكد اكرهج واتمنى لو ممخلفج
- واني اكرهك واتمنى لو انت بمكان امي مجان سوت هيج بية
- منيلج هالصلافة والرد علمج هذا الحقير التنامين وياه ترة باجر اخذج افحصج اذا مسوي بيج شي اذبج بالشارع بعد ما اكتلج واخلي الجلاب تنهش بجثتج
- واذا ماكو شي شتسوي وين تروح من الله
- لج حيوانة احترمي هذا لسانج اكصة والله وانعل هالخلفة العار هو اذا مصاير شي ومنايمة وياه مو المخازي مالتج والرسايل حتى بنات الليل ما يسونها
- الايام بيناتنا وحتندم انت وياها الله لا يسامحكم

من بابا سمعني هيج احجي كام يضربني وهاج علية ويسب بية اجة ادم وعبير ونورهان جرو مني وطلعو قفلت علية الباب و راحو

رجع ادم من ورة الباب سالني انت زينة كتلة زينة اني اسال نورهان وابوك زينين انتو على الظلم الظلمو الي ابجي بس بدون صوت و دموعي تنزل مثل نيران تحرك بوجهي غفيت من التعب

صارلي كم يوم هنا وما رحت للدوام ودروس فاتتني واني بكالوريا المفروض اقرة هواية وما اضيع ولا دقيقة حيضيع مستقبلي بسببها حسبي الله ونعم الوكيل بيها

صار المخزن هو مكاني وغرفتي حرموني من المدرسة اطلع منة بس على كد الحمام وارجع
بابا سوة باب خارجي على الحمام البرة حتى ميشوف وجهي ومخلي اسلاك مكهربها وكزاز مكسر بالكاع حتى لا انهزم من اطلع للحمام
وطبعا سوالي فحص وطلع نظيف و ما بية اي شي

وهو هذا كلة من تدبير نورهان اني عبالي ازمة وتمر بس بعد ما سوة الباب ايست وعرفت هي تريد تحبسني هنا وابويا موافق على اللي تكولة
ادم اشوفة كل فترة ومرات من اطلع للحمام يجي من ورة السلك واخاف لا يلزمة وينتل ابجي ويبجي وياية ومرات ادرسة او اسمعلة شي وكل مرة يتوسل تواسيل بنورهان حتى تفوتة كمت اني هم اتوسل واذل روحي لان مشتاقة احضنة واشوفة واكول ميخالف كل شي يهون واذا تريد انزل ابوس رجلها اني راضية بس اشم ريحة اخويا واحضنة وما اريد شي بعد ابد

ابوية اصلا بعد ما شفتة الوكت الاشوفة بي هو وكت الكتل والضرب لو مرات من كل عقلة بنص الليل ينزل يفتح الباب يسبني ويفشر علية واني استفزة واضحك هو يتخبل يشمر علية اي شي يشوفة درنفيس شحاطة قديمة سندانة بلاستك حتى لو برغي المهم يبرد كلبة

بس مراح يبرد لان ظلمني و متاكدة اني مراح يضيع حقي مدام سلمتهم بيد الله هو ونورهان و مستحيل اسامحهم بيوم على كل اللي سووه بية والاذية السببوها الي و ضيعو مستقبلي لو يبجون دم كبالي ما اسامح حتى لو كالو علية حاقدة اي اني حاقدة وكلبي اسود وما يرتاح الا اشوفهم متعذبين مثلي

صارلي سنتين محبوسة هنا محد يدري شبية ما بية لا اهلي لا كرابتي صرت منسية شلون اللي ينفو بغير بلد اللي مينساني ابد هو ادم حتى هو المسكين ما سلم منها واذتة تشوط روحي للسما وما اكدر اسوي شي من ودي املخها تملخ هي وابويا على الظلم الشفناه

جنت ممكن اسامح بحقي وانسى كل الصار بس من تقربو من ادم كرهتهم من صدك ولو اكدر اطلع من هالحبس جان قتلتهم بيدي واخذتة وانهزمت ولا اريد احد منهم بعد وانعل ابو اليبقى هنا

ما خلت احد ما بعدتة عني بالاول ابوية اخذتة وبعدها من حست علية مرتاحة ويا جمال شمرتة بحجة يدرس وهسة اخويا بلتة بلوة تريدة يطلع من البيت كوة واصفى لوحدي اني بلا كل شي منسية ونوب تخلي ادم حبيبي يروح بعد يصير حالي حال اللي دفنو بالنجف بين الكبور و التهو اهلة عنة ما يزورو ...